Read Biblia Revisión Chuya Qellqa 1992 – Chuya Qellqa 1992 Salmos 10 Bible Online

Salmos 10 - Biblia Revisión Chuya Qellqa 1992 – Chuya Qellqa 1992 bible

Salmos 10

¹Dios Taytalláy, ¿imanasqataq karunchakurunki? ¿imanasqataq sasachakuy tiempopi pakakurunki?

²Mana allin runam hatun tukuspa piñasqallaña wakchakunata qatikachan, ichaqa kikinpa toqlla churasqallanwanmi hapirachikun.

³Mana allin runaqa mana allinkuna munapayasqanmantam alabakun; kikillanpaq munaq runaqa Tayta Diostapas ñakaspam mana kaqpaq hapin.

⁴Mana allin runaqa, qari tukuspam Tayta Diosta mana maskanchu, manataqmi Diosmantaqa yuyaymananchu.

⁵Paypaqqa ima ruwasqanpas allinpaqmi rikchakapun, Diospa kamachikuyninkunapas paymantaqa karupim tarikun, llapa enemigonmantapas burlakunmi.

⁶Chayna runaqa sonqonpipas ninraqmi: “Manapunim haykapipas ñoqaqa wichisaqchu, manam haykapipas sasachakuyqa haypamuwanqachu”, nisparaq.

⁷Siminpas ñakaywan huntasqam kachkan, siminpas llullakuywan, engañowan huntasqam kachkan, qallunpipas mana allin rimaykunallam tarikun.

⁸Llaqtakunapim pitañapas wateqan, mana huchayuqtam pakapallapi wañuchin; mana piniyuqtam pakakuspalla wateqan,

⁹machaypi pakakuq león hinaraqmi wakcha runata hapirunanpaq wateqan, hapiruspanmi mallanpi qatatyan.

¹⁰Kurkuykuspa chintiparikuptinmi makinman mana piniyuqkuna wichiykunku;

¹¹payqa sonqonpipas ninraqmi: “Kaytaqa Diosqa qonqarunmi, uyanta taparuspanmi mana imatapas rikunchu”, nisparaq.

¹²Dios Taytalláy, ¡hatariy! Hatarispa makikita hoqariy, wakchakunata ama qonqaychu.

¹³Diosnilláy, ¿imanasqataq mana allin runakuna despreciasunki? Paykunaqa sonqonkupim ninku: “Diosqa manapunim juzgawasunchu”, nispanku.

¹⁴Qampunim rikurqanki ñakarichispa mana allin ruwasqanta, chay ruwasqanman hina pagaykapuy; mana piniyuqkunaqa qamllamanmi hapipakusunki, qamllam mana tayta-mamayuqkunata waqaychanki.

¹⁵Mana allin runapa makinta pakiy, mana allin ruwayninkunamanta cuentata mañaspa pasaypaqta chinkarachiy.

¹⁶Tayta Diosqa wiña-wiñaypaq munaychakuqmi, mana allin runakunaqa allpankumanta qarqosqam kanqaku.

¹⁷Dios Taytalláy, qamqa uchuychakuqkunapa mañakuynintam uyarinki, uyariykuspam paykunata kallpanchanki.

¹⁸Qamqa mana piniyuqkunatawan ñakarichisqakunatam allin arreglota ruwanki, chaynapi allpamanta ruwasqa runaqa pitapas amaña manchachinanpaq.