Read Biblia Revisión Chuya Qellqa 1992 – Chuya Qellqa 1992 Salmos 104 Bible Online

Salmos 104 - Biblia Revisión Chuya Qellqa 1992 – Chuya Qellqa 1992 bible

Salmos 104

¹Tukuy almaywanmi Tayta Diosta yupaychasaq. Yupaychasqay Dios Taytalláy, ¡mayna hatunmi qamqa kanki! Atiywan chaynataq kanchariywan pachasqam kachkanki.

²Achkiwanpas pachawan hinam churakunki, cielokunatapas telata hinam mastarinki.

³Yakukunapa hawanpim wasikita hatarichinki, puyukunatam carretaykipaq hapinki, wayrapa rapranpim qamqa purinki.

⁴Qanmanta willakuqkuna kananpaqmi wayrakunata hapinki, serviqnikikuna kananpaqmi ninapa rupayninta churanki.

⁵Kay pachatam maymi tiyananpi paqarichirqanki, manam haykapipas chaymantaqa kuyurinqachu.

⁶Uku-uku lamar qochawanmi kay pachata qataykurqanki, pachawan hinam tapaykurqanki, orqokunatapas yakukunawanmi pampaykachirqanki.

⁷Qaqchaykuptikim lamar qocha suchurirqa, rimasqayki rayo hinaraq toqyaptinmi lluptikurqaku.

⁸Orqokunamanmi qespirurqaku, wayqokunamanmi lloqllarirqaku; maymi nisqaykimanmi rirqaku.

⁹Mana llimpamunanpaqmi linderonkunata churarunki, kaqllamanta allpata mana pampaykunanpaq.

¹⁰Qanmi pukyukunamanta yakuta toqyachispa wayqonkunata kallpachinki, orqokunapa chawpintam mayukunata kallpachinki.

¹¹Purunpi animalkunam chay yakuta tomanku, monte asnokunam yakunayayninkuta tanichinku.

¹²Pawaq urpikunam mayupa patanpi qesachakuspa yachanku, pawaq urpikunam sachakunapa kallmanpi takinku.

¹³Cielomanta parachimuspam orqokunata parqonki, allpatapas paraykiwanmi saksachinki.

¹⁴Animalkunapaqmi qorakunata wiñachinki, ruruq sachakunatañataqmi runa mikunanpaq wiñachinki:

¹⁵Vinotam ruwanku sonqonkuta kusichinankupaq, aceitetam ruwanku uyankuta llusikunankupaq, tantatam ruwanku mikunankupaq.

¹⁶Tayta Diospa sachankunapas, Líbano lawpi cedrokunapas yakuwan saksasqam kachkanku.

¹⁷Chaypim alton pawaq urpikunapas qesachakunku, ciprés sachapim cigüeñakunapas qesachakunku.

¹⁸Alto orqokunapim monte cabrakuna kallpakachanku, qaqapa raqrankunapiñataqmi vizcachakuna wasichakunku.

¹⁹Killatam unancharqa tiempokuna qawanapaq, intipas yachanmi imay horam seqaykuyta.

²⁰Qanmi tutatapas chayachimunki, chaymi tuta puriq animalkuna lloqsimunku.

²¹Leonkunam mikunanta maskaspa qaparkachanku, qanmantam mikunankuta suyanku.

²²Achikyaruptinmi kutiykunku, machayninman yaykuspam chaypi waqtapanku.

²³Runañataqmi llamkananpaq lloqsin, hinaspam tutaykunankama llamkan.

²⁴Dios Taytalláy, ruwasqaykikunaqa mana yupay atinam, tukuy chaykunataqa yachaywanmi ruwarqanki, kay pachatam unanchasqaykikunawan huntaykunki.

²⁵Chaypim machu-machu lamar qochapas tarikun, chaypiqa animalkunapas mana yupay atinam kachkan, taksapas hatunpas tukuy rikchaqmi kachkan.

²⁶Chaynintam barcokunapas purin, qanmi Leviatantapas unancharqanki chaypi pukllakunanpaq.

²⁷Llapallankum qamllamanta suyanku, tiempollanpi mikuchinaykipaqmi suyanku.

²⁸Qoptikim mikunankuta chaskinku, makikita haywariptikim allin kaqkunawan saksanku.

²⁹Mana yanapaptikiqa pasaypaqtam mancharikunku, samayninta qechuruptikiqa wañuruspam allpayarunku.

³⁰Espirituykita kachaspaykim paqarichinki, kay pachapa rikchaynintam kaqllamanta musoqyachinki.

³¹Tayta Diospa atiynin wiñaypaq kachun, Tayta Diosqa unanchasqankunapim kusikun.

³²Pay qawarimuptinqa kay pachapas katkatatanmi, llapchaykuptinqa orqokunapas qosnirinmi.

³³Kawsanaykamam Tayta Diosman takisaq, kawsanaykamam Diosniyman takipusaq.

³⁴Yuyaymanayniypas paypaq hinayá kachun, Tayta Diosllapim ñoqaqa kusikusaq.

³⁵Kay pachamanta huchasapakuna chinkachunku, mana allin ruwaqkunaqa pasaypaqta chinkachunku. ¡Ñoqaqa tukuy almaywanmi Tayta Diosta qapaqchasaq! ¡Aleluya!