Read Biblia Revisión Chuya Qellqa 1992 – Chuya Qellqa 1992 Salmos 105 Bible Online

Salmos 105 - Biblia Revisión Chuya Qellqa 1992 – Chuya Qellqa 1992 bible

Salmos 105

¹¡Tayta Diosman graciasta qoychik! ¡Sutinta hatunchaychik! ¡Ruwasqankunata llaqtakunaman willakuychik!

²Paytayá takikunawan yupaychaychik, admirakuypaq ruwasqankunamantayá rimaychik.

³Chuya sutinmanta kusikuychik, Tayta Diosta maskaqkunaqa tukuy sonqomanta kusikuychik.

⁴Tayta Diospa atiyninta maskaychik, payllataña tukuy tiempo maskaychik.

⁵Admirakuypaq kaqkuna ruwasqankunata yuyariychik, kamachikuyninkuna rimarisqanta yuyariychik.

⁶Serviqnin Abrahampa mirayninkuna, akllakusqan Jacobpa mirayninkuna,

⁷payqa yupaychasqanchik Tayta Diosmi, kay pacham Diospa kamachikuyninwan huntasqa kachkan;

⁸wiñaypaq pacto ruwasqantaqa manam qonqanchu, waranqantin miraykunapaq kamachisqantaqa manam qonqanchu.

⁹ Chay pactotaqa Abrahamwanmi ruwarqa, chaynataqa Isaacmanmi jurarqa.

¹⁰Jacobmanmi kamachikuyninkunata qorqa, Israelmanmi wiñaypaq pactonta qorqa.

¹¹Abrahamtam Dios nirqa: Canaán allpatam qanman qosqayki, herenciayki kananpaqmi qosqayki, nispa.

¹²Paykunaqa asllaraq kachkaptinkupas, kay pachapi mana llaqtayuq kachkaptinkupas,

¹³llaqtan-llaqtan purichkaptinkupas, nacionkunapi purichkaptinkupas,

¹⁴Tayta Diosqa manam pipas ñakarichinantaqa munarqachu, paykunaraykum reykunatapas kaynata qaqcharqa:

¹⁵¡Sapaqchakusqaykunataqa amam imanankichikchu, profetaykunataqa amam ñakarichinkichikchu! nispa.

¹⁶Kay pachamanmi yarqayta kachamurqa, mikunanku kawsaytam chinkarachirqa.

¹⁷Paykunapa ñawpaqnintam huk runata kacharqa, esclavopaq rantikusqanku Joseytam kacharqa.

¹⁸Chakinkunatam cadenawan chaqnarqaku, kunkantam cadenawan watarqaku.

¹⁹Chaynaqa, karqa Joseypa rimasqan cumplikunankamam, paypa rimasqanqa cheqap kasqanta Tayta Dios qawachinankamam.

²⁰Reymi runankunata kamachispan Joseyta kachaykachirqa, llaqtakunapi munaychakuqmi payta kachaykachirqa.

²¹Wasinpi kamachikuq kananpaqmi churaykurqa, tukuy kapuqninkunapi kamachikunanpaqmi churaykurqa.

²²Kamachikuqkunatapas, ancianokunatapas yachachinanpaqmi churaykurqa.

²³ Israelmi Egipto nacionman yaykurqa, Jacobmi [1]Cam miraypa allpanpi yacharqa.

²⁴Tayta Diosmi llaqtanta llumpayta mirarachirqa, Egipto runakunamantapas aswan kallpayuqtam ruwarurqa.

²⁵Llaqtanta cheqninanpaqmi, Diospa serviqninkunata engañananpaqmi, Egipto runakunapa sonqonta rumiyarachirqa,

²⁶Serviqnin Moisestam, akllasqan Aarontawan kuskata kamachirqa.

²⁷Paykunam Egipto runakunapa qayllanpi milagrokunata ruwarqaku, Cam llaqtapim admirakuypaq kaqkunata ruwarqaku.

²⁸Diosmi lliw Egiptota tutayarachirqa, ichaqa manam rimasqankunata kasurqakuchu.

²⁹Yakukunatam yawarman tikrarurqa, challwakunatam lliw wañurachirqa.

³⁰Llaqtankupim karyakuna mirarurqa, reypa palacionmanpas yaykururqam.

³¹ Rimariykuptillanmi nana-nanaq tankayllukunawan kachukuq chuspikuna llaqtata intururqa.

³²Parapa rantinpim runtu paratawan lenwachkaq ninata kachaykurqa.

³³Uvas chakrankutapas, higos chakrankutapas lliwtam tukururqa. Egiptopi sachakunatapas lliwtam pakiparurqa.

³⁴Rimariykuptillanmi manaña yupay atina aqaruwaykunawan pinki-pinkikuna rikurirurqa.

³⁵Nacionpi qorakunatam mikururqaku, chakrapi kawsaykunatam tukururqaku.

³⁶Egipto llaqtapi piwi runakunatam wañurachirqa, punta kaq mirayninkutam wañurachirqa.

³⁷Israel llaqtantam hurqomurqa, qori qollqe qepirisqata. Paykuna ukupiqa manam mayqanninkupas onqoq runaqa karqachu.

³⁸Egipto runakunam lloqsimusqankuwan kusikurqaku, Israelta manchakusqankuraykum kusikurqaku.

³⁹Diosmi puyuta mastarispan paykunata waqaycharqa, tutanñataqmi ninawan achkichirqa.

⁴⁰Aychata mañakuptinkum codornizkunata kachamurqa, hanaq pacha tantawanmi paykunata saksachirqa.

⁴¹Qaqata kichaykuptinmi yaku pawamurqa, chaki allpantam mayu hinaraq kallparqa.

⁴²Serviqnin Abrahamman prometesqantam yuyarirqa, manam qonqarqachu.

⁴³Llaqtantam llumpay kusisqata hurqomurqa, akllasqankunatam sinchi kusisqata hurqomurqa.

⁴⁴Huklaw nacionniyuq runakunapa allpantam qoykurqa, chay runakunapa llamkasqanpa ruruntam qoykurqa,

⁴⁵chaynapi kamachikuyninkunata kasukunankupaq, yachachisqankunata ruwayman churanankupaq. ¡Diosninchik yupaychasqa kachun! ¡Aleluya!