Read Biblia Revisión Chuya Qellqa 1992 – Chuya Qellqa 1992 Salmos 112 Bible Online

Salmos 112 - Biblia Revisión Chuya Qellqa 1992 – Chuya Qellqa 1992 bible

Salmos 112

¹¡Aleluya! ¡Aleluya! ¡Mayna kusisqam Tayta Diosta kasukuq runaqa! ¡Mayna kusisqam kamachikuyninkunapi kusikuq runaqa!

²Mirayninkunapas kay pachapim munaychakunqaku, allin kawsakuq runapa mirayninkunaqa llumpay bendecisqam kanqaku.

³Wasinkupas qori-qollqewan huntasqam kanqa, allinkuna ruwasqankupas wiñaypaqmi kanqa.

⁴Allin kawsakuq runaqa achkiy hinam tutayaypipas kancharinqa, tutayaypi achkiy hinam allin kawsaqkunata ñawpaqman pusanqa.

⁵Allin ruwaq runaqa kuyapayakuspa qokuykuqmi, imata ruwaspapas manam runamasintaqa engañanchu.

⁶Payqa manam haykapipas mitkanqachu, wiñaypaq yuyarisqam kanqa.

⁷Mana allin noticiatapas manam manchakunqachu, Tayta Diosman hapipakusqanraykum, paypa sonqonqa hawkalla kachkan.

⁸Sonqonpas qaqa hinam kachkan mana manchakuqmi kanqa, enemigonkunapa puchukasqantam asikuspa qawanqa.

⁹Wakchakunamanmi imallantapas aypuykarin, allin ruwasqanqa wiñaypaqmi kanqa, allin ruwasqankunawanmi ancha reqsisqa kanqa.

¹⁰Mana allin ruwaq runapas payta qawaspam piñakunqa, mana ima ruwayta atispam kachupakunqa. Mana allin ruwaqkunapa munasqanqa pasaypaqtam chinkarunqa.