Read Biblia Revisión Chuya Qellqa 1992 – Chuya Qellqa 1992 Salmos 116 Bible Online

Salmos 116 - Biblia Revisión Chuya Qellqa 1992 – Chuya Qellqa 1992 bible

Salmos 116

¹Ñoqaqa Tayta Diostam kuyani, payqa qayakullasqaytam uyariykuwan.

²Chaylla uyariwasqanraykum kawsanaykama payta qayakusaq.

³Wañuymi waskanwan chaqnaruwarqa, wañuypa ñakarichikuyninmi hayparuwarqa, nanaywan llakikuymi pamparuwarqa.

⁴Hinaptinmi Tayta Diosta qayakurqani: Dios Taytalláy, almallayta libraykuy, nispay.

⁵Tayta Diosqa kuyapayakuqmi, payqa allinlla ruwaqmi; Diosninchikqa llakipayakuqmi.

⁶Tayta Diosqa llampu sonqoyuqkunatam waqaychan, mana kallpayuq kachkaptiymi hatariykachiwarqa.

⁷Tayta Dios yanapaykuwasqanraykum, hawkayaytaña tarini.

⁸Dios Taytalláy, almallaytam wañuymanta hurqoykuwanki, weqellaytam pichaykuwanki, urmanaymantam hapiykuwanki.

⁹Kawsaqkunapa allpanpipas Tayta Diostam kasukusaq.

¹⁰Hatun llakikuypim kachkani nichkaspaypas payllapim hapipakusaq.

¹¹Runakunaqa llulla-llullam, nispaymi muspaypi hina rimarqani.

¹²Tukuy ima qowasqanmantaqa ¿imatataq Tayta Diosman kutichipusaq?

¹³Salvación copamantam hoqarisaq, Tayta Diospa sutintam kusikuywan hatunchasaq.

¹⁴Tayta Diosman prometekusqaytam llapa llaqtakunapa qayllanpi qosaq.

¹⁵Diospi iñiqkunapa wañukusqantaqa Tayta Diosqa allinpaqmi qawan.

¹⁶Dios Taytalláy, ñoqaqa serviqnikim kani, siervaykipa wawanmi kani, qanman hapipakuq churillaykim kani, chaqnawaqniy waskatam tipirunki.

¹⁷Graciasta qospaymi sacrificiokunata ofrecesqayki, Dios Taytalláy, sutillaykitam hatunchasaq.

¹⁸Prometekusqaytam llapa runakunapa qayllanpi Tayta Diosman qosaq.

¹⁹Chaytaqa Jerusalén llaqtapim, Tayta Diospa templonpa pationpim chaykunataqa qosaq. ¡Aleluya!