Read Biblia Revisión Chuya Qellqa 1992 – Chuya Qellqa 1992 Salmos 14 Bible Online

Salmos 14 - Biblia Revisión Chuya Qellqa 1992 – Chuya Qellqa 1992 bible

Salmos 14

¹Diosman Davidpa takisqan Ruqru runam nin: “Diosqa manam kanchu”, nispa. Paykunaqa millakuypaq huchamanmi qokurunku, millakuypaq kaqkunallatañam ruwanku, manam pipas allin ruwaqqa kanñachu.

²Tayta Diosmi runakunata hanaq pachamanta qawamuchkan, pillatapas yachayniyuqta maskaspan, pillatapas Dios maskaqta tariykunanpaq.

³Ichaqa lliw runam pantay ñanta pasakunku, lliwmi millakuypaq huchata ruwanku. Manam pipas allin ruwaqqa kanñachu, manam hukllapas kanñachu.

⁴Mana allin ruwaq runakunaqa lliwmi mana yachayniyuq rikurirunku. Tantata mikuchkaq hinam runaykunatapas mikurunku, Tayta Diostapas paykunaqa manam qayakunkuchu.

⁵Mana allin ruwaq runakunaqa manchakuymantam katkatatanqaku, kasukuq runakunawan Dios kasqanrayku.

⁶Paykunaqa wakchakunapa imapas ruway munasqanmantam burlakunku, chaywanpas Tayta Diosmi wakchakunapa waqaychaqninqa.

⁷¡Ima allinraq kanman Sionmanta Israelpaq salvación hamuptinqa! Llapa preso apasqakunata Tayta Dios kutichimuptinmi Jacobqa llumpayta kusikunqa, Israelpa mirayninkunam kusikunqaku.