Read Biblia Revisión Chuya Qellqa 1992 – Chuya Qellqa 1992 Salmos 140 Bible Online

Salmos 140 - Biblia Revisión Chuya Qellqa 1992 – Chuya Qellqa 1992 bible

Salmos 140

¹Diosman Davidpa takisqan Dios Taytalláy, millay ruwaq runamanta libraykuway; peleolla maskaq runakunamanta waqaychaykuway.

²Chayna runakunaqa, sonqonkupipas mana allinllatam tanteanku, sapa punchawmi peleollata hatarichinku.

³Qallunkupas maqta urupa lancetan hinaraqmi, siminkupas maqta urupa venenon hinaraqmi.

⁴Dios Taytalláy, mana allin runapa makinmanta waqaychaykuway, peleolla hatarichiq runamanta harkaykuway, paykunam urmachiwanankupaq tanteanakurunku.

⁵Hatun tukuqkunam wichichiwanankupaq toqllata churarunku, purinay ñanpim mallata mastarunku; purinay ñanpim trampata churarunku.

⁶Tayta Diostam nini: Qamqa Diosniymi kanki, nispay. Dios Taytalláy, qayakuyniyta uyariykullaway.

⁷Tukuy Atiyniyuq Dios Taytalláy, atiywan salvaqniymi kanki, guerrapipas qanmi kawsakuyniyta waqaychanki.

⁸Dios Taytalláy, mana allin ruwaqkunapa tanteasqankuta tuñichiy; ama munaychu mana allin tanteasqanku ruwasqa kananta, chaynapi ama hatun tukurunankupaq.

⁹Contraypi tukuy mana allin tanteasqanku kikillankuman chayachun.

¹⁰Paykunaman nina sansa wichiykuchun, nina sansaman wischusqa kachunku; manaña haykapipas lloqsimunankupaq uku-uku uchkukunaman wischusqa kachunku.

¹¹Nina qallu runaqa manam takyanqachu, peleolla hatarichiq runataqa sasachakuykuna hayparuspa tuñirachichun.

¹²Yachanim Tayta Diosqa wakchakunata nanachikusqanta, mana imayuqkunata yanapasqantapas.

¹³Cheqaptapunipas chuya runakunaqa sutikitam yupaychanqaku, allin kawsakuqkunaqa qayllaykipim kawsakunqaku.