Read Biblia Revisión Chuya Qellqa 1992 – Chuya Qellqa 1992 Salmos 145 Bible Online

Salmos 145 - Biblia Revisión Chuya Qellqa 1992 – Chuya Qellqa 1992 bible

Salmos 145

¹Davidpa takin Reynilláy, Diosnilláy, hatunchasqaykim, wiñaymanta wiñaykamam sutikita yupaychasqayki.

²Sapa punchawmi qapaqchasqayki, wiñaymanta wiñaykamam sutikita yupaychasaq.

³Tayta Diosqa ancha hatunmi, payqa yupaychanapaq hinam, hatun kayninqa mana entiendey atinam.

⁴Miraymanta-miraykamam ruwasqaykikunamanta yupaychasunki, atiywan ruwasqaykikunatam willakunqaku.

⁵Ancha hatun kaynikimantam rimanqaku, ñoqañataqmi admirakuypaq ruwasqaykikunapi yuyaymanasaq.

⁶Atiywan ruwasqaykikunamantam rimanqaku, ñoqañataqmi hatun kaynikimanta willakusaq.

⁷Ancha hatun kuyakuynikimantam willakunqaku, allin ruwaq kasqaykimantam takinqaku.

⁸Tayta Diosqa, llakipayakuspa kuyapayakuqmi, mana chaylla piñakuruqmi, kuyapayakuyninqa ancha hatunmi.

⁹Tayta Diospa kuyakuyninqa llapallan runakunapaqmi, tukuy unanchasqankunatam llakipayaspa waqaychan.

¹⁰Dios Taytalláy, lliw unanchasqaykikunam yupaychasunki, llapa chuyanchasqaykikunam qapaqchasunki.

¹¹Munaychakuynikipa ancha reqsisqa kayninmantam rimanqaku, atiywan ruwasqaykikunamantam willakunqaku,

¹²chaynapi atiywan ruwasqaykikunamanta, munaychakuynikipa kanchariyninmanta, runakunapa mirayninkunaman yachachinankupaq.

¹³Munaychakuynikiqa wiñaymanta wiñaykamam, kamachikuynikipas miraymanta-miraykamam.

¹⁴Tayta Diosqa ñakariqkunatam kallpanchan, wichisqakunatam hatarichin.

¹⁵Llapallankum qamllamanta suyanku, qamñataqmi mikunankuta tiempollanpi qonki.

¹⁶Makillaykita kicharispam llapallan kawsaqkunata mikuchinki.

¹⁷Tayta Diosqa ima ruwasqanpipas mana pantaqmi, imatapas llakipayakuywan ruwaqmi.

¹⁸Tayta Diosqa, qayakuqninkunapaqqa hichpallanpim kachkan, sonqomanta qayakuqninkunapaqqa hichpallanpim kachkan.

¹⁹Kasukuqninkunapaqqa munasqantam ruwanqa, qayakuptinkupas uyariykuspam salvaykunqa.

²⁰Tayta Diosqa kuyaqninkunatam waqaychan, millay ruwaqkunatam ichaqa tuñichinqa.

²¹Tayta Diostam simillayqa yupaychanqa, lliw runakunayá, chuya sutinta wiñaymanta wiñaykama qapaqchachunku.