Read Biblia Revisión Chuya Qellqa 1992 – Chuya Qellqa 1992 Salmos 22 Bible Online

Salmos 22 - Biblia Revisión Chuya Qellqa 1992 – Chuya Qellqa 1992 bible

Salmos 22

¹Kay takitaqa “achikyaq luwichu” nispa sutiyuq takita hinam takina Diosnilláy, Diosnilláy, ¿imanasqataq saqerullawanki? ¿Imanasqataq mana salvaykuwankichu? ¿Imanasqataq qayakamusqayta mana uyarillawankichu?

²Diosnilláy, tuta punchawmi qayakamullayki ichaqa manam contestamullawankichu. Ñoqapaqqa manam samariypas kanñachu.

³Chaywanpas qamqa chuyam kanki, qamqa munaychakuq reymi kanki, Israelpa yupaychayninpa chawpinpim kawsakunki.

⁴Taytaykupas qampim hapipakurqaku, qampi hapipakusqankuraykum libraykurqanki.

⁵Qamta qayakamusqankuraykum librasqa karqaku, qamllaman hapipakuspankum mana penqaypichu karqaku.

⁶Ñoqam ichaqa urulla kani, manam runachu, runakunapa wischupakusqanmi kani, llaqtapa qepanchasqanmi kani;

⁷lliw rikuwaqniykunam ñoqamanta asikunku, umankuta aywikachaspam ñoqamanta burlakunku.

⁸Paykunaqa kaynataraqmi ninkupas: “Tayta Diospim hapipakurqa, yaqachus librarunqa; Diosqa anchatam kuyarqa, yaqachus salvarunqa”, nispanku.

⁹Ichaqa qanmi mamaypa wiksanmanta hurqoykuwarqanki, qanmi mamaypa marqayninpi hawkallata uywakuwarqanki.

¹⁰Manaraqpas nacechkaptiymi ñoqataqa waqaychaykuwarqanki, qamqa mamaypa wiksanmantapuni Diosniymi kanki.

¹¹Amayá ñoqamanta karunchakuychu, llakikuypa patanpim tarikuni, manam pipas yanapaykuqniy kanchu.

¹²Enemigoykunam piña torokuna hinaraq muyuruwanku, Basán lawpi kallpasapa torokuna hinaraqmi chawpicharuwanku.

¹³Manchakuypaq león hinaraqmi qaparispa llikiparuwanankupaq pawaykamuwanku.

¹⁴Yaku tallisqa hinam kachkani, tulluykunapas lliwmi rakinakurun. Sonqollaypas cera hinam ukullaypi chullurirun.

¹⁵Kallpallaypas teja hinam pasaypaqta chakirun, qallullaypas paladarniymanmi laqakurun. Qamqa wañuqkunapa kasqan qotqo allpamanmi churaykullawanki.

¹⁶Allqokunam muyuriruwan, mana allin runakunam chawpicharuwanku, makillaytawan chakillaytapas lliwmi kachuparuwanku.

¹⁷Tullullaykunatapas yupaniñam, enemigoykunañataqmi qawarayawanku.

¹⁸Pachaytapas sorteaspam rakinakurunku.

¹⁹Dios Taytalláy, amayá ñoqamantaqa karunchakuychu. Kallpanchaqlláy, utqayman hamuspa yanapaykullaway.

²⁰Espadapi wañunaymanta libraykullaway, allqokuna wañurachiwananmanta hurqoykullaway.

²¹Leonkunapa siminmanta salvaykullaway, piña torokunapa waqranmanta libraykullaway.

²²Wawqeykunamanmi qanmanta willakusaq, qamllatam huñunakuypipas yupaychasqayki.

²³Tayta Diosta manchakuqkuna, llapallaykichik payta yupaychaychik; Jacobpa mirayninkuna, llapallaykichik hatunchaychik; Israelpa mirayninkuna, llapallaykichik kasukuychik.

²⁴Mana piniyuqkunapa ñakariynintapas payqa manam qepancharqachu nitaqmi qonqarqachu, manataqmi paykunamantaqa pakakuykurqachu, aswanqa qayakuptinkum uyariykurqa.

²⁵Llaqtaykipa hatun huñunakuyninpim yupaychasqayki, hatunchasuqnikikunapa qayllanpim, prometekusqayta cumplisaq.

²⁶Wakchakunam saksanankukama mikunqaku; maskaqninkunam Tayta Diosta yupaychanqaku, payta maskaqkunaqa wiñaypaqmi kawsakunqaku.

²⁷Tukuy hinastinpi kaqkunam, Tayta Diosta yuyarispanku payman kutirikunqaku. Nacionkunapi llapallan ayllukunapas payllatam yupaychanqaku,

²⁸Tayta Diosllam munaychakuqqa, hina payllataqmi lliw nacionkunapi munaychakuqpas.

²⁹Kay pachapi atiyniyuqkunam mikuykuspanku payta hatunchanqaku, ñutu allpaman kutiykuqkunam paypa ñawpaqninpi qonqorakunqaku, vidankutapas mana takyachiy atiqkunam paypa ñawpaqninpi qonqorakunqaku.

³⁰Qepa wiñaykunam payta servinqaku, qepa hamuqkunamanmi Señormanta willanqaku.

³¹Qepa punchaw nacemuqkunamanmi allin arreglo ruwaq kasqanmanta yachachinqaku, admirakuypaq kaqkuna ruwasqanmantam willanqaku.