Read Biblia Revisión Chuya Qellqa 1992 – Chuya Qellqa 1992 Salmos 25 Bible Online

Salmos 25 - Biblia Revisión Chuya Qellqa 1992 – Chuya Qellqa 1992 bible

Salmos 25

¹Davidpa takin (Kay Salmoqa original qellqapiqa, alfabeto hebreowan kayna rakinasqam karqa). Dios Taytalláy, qamllatam mañakamullayki;

²Dios Taytalláy, qamllamanmi hapipakamullayki, amayá penqaypi kanaytaqa munaychu, amayá enemigoykunaqa asikuwachunkuchu.

³Qanman hapipakuqkunaqa manam penqaypichu kanqaku, contraykipi hatariqkunam ichaqa penqaypi tarikunqaku.

⁴Dios Taytalláy, ñannikitayá reqsiykachiway, ñannikitayá pusaway.

⁵Cheqap kaqnikiman pusawaspa yachachiway, salvaykuqniy Diosmi qamqa kanki, sapa punchawmi qamllapi suyallani.

⁶Dios Taytalláy, wiñaypaq kuyapayakuynikitawan llakipayakuynikita yuyariy.

⁷Dios Taytalláy, jovenllaraq kachkaspa mana allinta ruwaspay huchallikusqaytaqa amañayá yuyariychu. Kuyapayakuynikiman llakipayakuynikiman hina ñoqallayta yuyariykullaway.

⁸Tayta Diosqa allinpunim, mana pimanpas sayapakuqmi, chayraykum payqa huchayuqkunata allin kawsakuyta yachachin.

⁹Mana piniyuqkunatam munasqanman hina kawsachin, llampu sonqokunamanmi ñanninta reqsichin.

¹⁰Tayta Diosqa, pacto ruwasqantawan kamachikuyninkunata kasukuqkunawanqa, kuyakuyninman chaynataq cheqap kayninman hinam ruwan.

¹¹Dios Taytalláy, sutillaykiraykuyá llapa huchallaykunata pampachaykullaway.

¹²Tayta Dios kasukuqkunamanqa paymi allin kawsakuyta yachachinqa;

¹³payqa allintam kawsakunqa mirayninkunapas kay pachatam herenciapaq chaskinqa.

¹⁴Dios Taytaqa allin amigom kasukuqninkunapaqqa, paykunamanmi pacto ruwasqanta yachachinqa.

¹⁵Ñawillaykunapas Dios Taytallatam qawan, paymi ima sasachakuymantapas libraykuqniyqa.

¹⁶Señorlláy, qawariykamuwaspa llakipayariykullaway, sapallaymi llakisqa kallachkani.

¹⁷Sonqollaymi llakipa intusqan tarikun, kay llakimanta hurqoykullaway.

¹⁸Ñakariyniytawan llamkallasqayta qawariykuspa huchallaykunata pampachaykuway.

¹⁹Enemigoykunata qawariy, llumpaytam paykunaqa mirarunku, manañam rikuytapas atiwankuñachu.

²⁰Libraykuwaspa waqaychaykullaway, amayá penqaymanqa churaykullawaychu, ñoqaqa qamllapim hapipakullani.

²¹Munasqaykiman hina kawsakuyniywan mana pantaspa kawsakuyniy waqaychallawachun, ñoqallayqa qamllamanmi hapipakullani.

²²Diosnilláy, Israelpa mirayninkunata llapa sasachakuyninmanta hurqoykuy.