Read Biblia Revisión Chuya Qellqa 1992 – Chuya Qellqa 1992 Salmos 30 Bible Online

Salmos 30 - Biblia Revisión Chuya Qellqa 1992 – Chuya Qellqa 1992 bible

Salmos 30

¹Templota dedicanapaq taki Dios Taytalláy, libraykuwasqaykimantam yupaychallayki, enemigoykuna asikuwanankumantam harkawarqanki.

²Dios Taytalláy, qayakamullaptiymi hampiykuwarqanki.

³Wañuypa patanmantam libraykuwarqanki, wañuqkunapa kasqanman rinaymantam kawsayta qoykuwarqanki.

⁴Tayta Diospa chuyanchasqankuna, payman takillaychik, chuya kayninmanta yupaychaychik.

⁵Payqa piñakunpas manam unaypaqchu, kuyakuyninmi ichaqa wiñaypaq. Tutanña waqaspapas achikyaqtaqa kusikusunmi.

⁶Allin kawsakuyniypim nirqani: “Manam imapas wichichiwanqachu”, nispay.

⁷Dios Taytalláy, llakipayaykuwaspaykim allinta takyachillawarqanki, ñoqamanta anchuriptikim ichaqa chaylla hukmanyarullarqani.

⁸Dios Taytalláy, qamllatam qayakamullayki, Señorlláy, qamllatam mañakamullayki.

⁹¿Imapaqtaq ñoqapa wañukuyniy allinman? ¿Imapitaq sepulturaman risqay servisunkiman? ¿Yaqachu allpa yupaychasunkiman? ¿Yaqachu cheqap kaqnikita willakunman?

¹⁰Dios Taytalláy, uyariykuwaspa llakipayariykullaway; Dios Taytalláy, yanapaykullaway.

¹¹Qamqa llakikuyniytam kusikuspa tusuymanña tikraykapuwanki, luto pachayta chustuykuwaspaykim kusikuy pachawanña pachaykachiwanki.

¹²Chayraykum Señorlláy, Dios Taytalláy, qamllataña yupaychallasqayki, qamllamanñam takipullasqayki, qamllatañam wiñaypaq reqsikullasqayki.