Read Biblia Revisión Chuya Qellqa 1992 – Chuya Qellqa 1992 Salmos 33 Bible Online

Salmos 33 - Biblia Revisión Chuya Qellqa 1992 – Chuya Qellqa 1992 bible

Salmos 33

¹Allin ruwaq runakuna, Tayta Diospi kusikuychik, chuya runakunapa takinqa suma-sumaqmi.

²Tayta Diosmanyá arpakunawan graciasta qoychik, arpakunawan chaynataq salteriowanyá takipuychik.

³Paymanyá musoq takikunata takipuychik, kusikuywan tocaspayá qapariychik.

⁴Tayta Diospa chuya siminqa cheqapmi, tukuy ima ruwasqanpas mana pantayniyuqmi.

⁵Payqa allin kawsakuytawan allin ruwaytam kuyan, kuyakuyninwanmi kay pachata huntaykun.

⁶Tayta Diospa rimariyllanwanmi cielokuna unanchasqa karqa, samaynillanwanmi chaypi kaqkunapas unanchasqa karqa.

⁷Lamar qochapi yakukunatam payqa huk hawaqllaman huñunarun.

⁸Kay pachapi llapallan yachaqkuna, Tayta Diosta manchakuychik; kay pachapi llapallan kawsaqkuna, Tayta Diospa qayllanpi katkatataychik.

⁹Pay niykuptillanmi imapas rikurirqa, pay kamachiptillanmi imapas paqarirqa.

¹⁰Tayta Diosqa nacionkunapa rimanakusqantam yanqachan llaqtakunapa tanteanakusqantam tuñichin.

¹¹Tayta Diospa tanteasqanmi ichaqa wiña-wiñaypaq takyan, sonqonpa munasqankunapas wiña-wiñaypaqmi takyan.

¹²¡Mayna kusisqam Tayta Diosman hapipakuq nacionqa! ¡Mayna kusisqam Tayta Diospa akllakusqan llaqtaqa!

¹³Tayta Diosqa hanaq pachamantam qawamuchkan, payqa llapallan runakunatam rikumuchkan.

¹⁴Payqa maymi yachasqanmantam kay pachapi yachaqkunata qawamuchkan.

¹⁵Paymi llapa runakunapa sonqonta ruwarqa, payqa runakunapa imam ruwasqantam qawamuchkan.

¹⁶Reyqa manam salvakunqa tropasapallaña kasqanraykuchu, soldadopas manataqmi librakunqa kallpasapallaña kasqanraykuchu.

¹⁷Caballoqa maynaña kallpayuq kaspapas manam pitapas libranmanchu.

¹⁸Tayta Diosmi respetaqnin runataqa waqaychan, kuyapayakuyninpi suyaqkunatapas waqaychanmi.

¹⁹Paykunataqa wañuymantapas salvaykunqam, yarqay tiempopipas mikusqatam uywanqa.

²⁰Ñoqanchikqa Tayta Diosmanmi hapipakunchik, payqa waqaychaspa yanapaqninchikmi.

²¹Payllapim sonqonchikpas kusikun, ñoqanchikqa chuya sutinpim hapipakunchik.

²²Dios Taytalláy, qamllapi suyasqaykuman hina kuyapayakuyniki ñoqaykuwan kachun.