Read Biblia Revisión Chuya Qellqa 1992 – Chuya Qellqa 1992 Salmos 34 Bible Online

Salmos 34 - Biblia Revisión Chuya Qellqa 1992 – Chuya Qellqa 1992 bible

Salmos 34

¹David loco tukuptin rey Abimelec wischurusqanmanta Tukuy tiempom ñoqallayqa Tayta Diosta alabasaq, mana upallaspaymi ñoqallayqa yupaychasaq.

²Tayta Diospim ñoqallayqa alabakullasaq, llampu sonqokunapas uyarispankum kusikunqaku.

³Tayta Diosta huklla hatunchasun, sutillanta llapallanchik huklla yupaychasun.

⁴Tayta Diosta maskaptiymi uyariykullawarqa, tukuy manchakuyniymantam libraykullawarqa.

⁵Tayta Diosman asuykuqkunaqa kusikuymantam kancharinqaku, paykunaqa manam penqachisqachu kanqaku.

⁶Kay wakcha qayakullaptiymi Tayta Dios uyariykamullawarqa, lliw sasachakuyniymantam libraykullawarqa.

⁷Tayta Diospa angelninqa, Diosta manchakuqkunapa muyuriqninpi churakuykuspanmi waqaychan.

⁸Qawaykuychik, Tayta Diospa allin kasqanta reqsiykuychik. ¡Mayna kusisqam payman hapipakuqkunaqa!

⁹Chuyanchasqankuna Tayta Diosta kasukuychik, kasukuqninkunapaqqa manam imankupas pisinqachu.

¹⁰Uña leonkunaqa mikuymantam yarqachikun, Tayta Diosta maskaqkunapam ichaqa imankupas mana pisichinqachu.

¹¹Churillaykuna, asuykamuspa uyariwaychik; Tayta Dios kasukuytam yachachisqaykichik.

¹²¿Munawaqchu unay watakuna kawsakuyta? ¿Munawaqchu unayta kawsaspa allin kaqkunata rikuyta?

¹³Mana allin rimaymanta simikita waqaychay, llulla rimaymanta simikita wichqay.

¹⁴Mana allinta saqespa allin kaqkunata ruway, hawkayayta maskaspa chayllata qatiy.

¹⁵Tayta Diosqa allin ruwaq runakunatam qawachkan, paykunapa qayakuynintam uyarichkan.

¹⁶Tayta Diospa piñakuyninqa mana allin ruwaqkunapaqmi, kay allpamantam paykunata chinkachinqa.

¹⁷Tayta Diosqa allin ruwaq runakunapa qayakuynintam uyarin, tukuy ñakariyninkunamantam libraykun.

¹⁸Tayta Diosqa, llakisqa sonqoyuqkunapa hichpallanpim kachkan, payqa llakisqa sonqoyuqkunatam salvaykun.

¹⁹Allin kawsakuqkunapa ñakariyninqa achkallañam, ichaqa Tayta Diosmi tukuy chaykunamanta libranqa.

²⁰Tayta Diosmi tullunkunatapas waqaychanqa, manam huk tullullantapas pakinqakuchu.

²¹Mana allin runataqa, mana allin ruwasqallanmi wañuchinqa, allin kawsakuq runata cheqniq runaqa castigasqam kanqa.

²²Tayta Diosmi serviqninkunataqa libraykunqa, payman hapipakuqkunaqa manam castigasqachu kanqaku.