Read Biblia Revisión Chuya Qellqa 1992 – Chuya Qellqa 1992 Salmos 35 Bible Online

Salmos 35 - Biblia Revisión Chuya Qellqa 1992 – Chuya Qellqa 1992 bible

Salmos 35

¹Davidpa takisqan Dios Taytalláy, contraypi sayariqkunapa contranpi sayariy, maqawaqniykunata maqay.

²Escudoykita hapiy, yanapaykuwanaykipaq hamuy.

³Qatikachawaqniykunapa contranpi hatarispa lanzaykita hurqoy. Almallayta niykuy; “Ñoqam salvaqniki kani”, nispayki.

⁴Wañuchiway munaqkunaqa penqaypiyá kachunku, mana allin ruwaway munaqkunaqa qepaman kutichisqayá kachunku,

⁵wayrapa apasqan qopa hinayá kachunku, Tayta Diospa angelninyá qatikachachun.

⁶Ñanninpas tutayaq hinaspa lluchkayasqayá kachun, Tayta Diospa angelninyá qatikachachun.

⁷Paykunaqa yanqamanta wichinaypaqmi trampata churarqaku, mana imanachkaptiymi wichinaypaq uchkuta toqorqaku.

⁸Paykunamanyá qonqaymanta sasachakuy hamuchun, kikillankupa trampa churasqanmanyá wichichunku, toqosqanku uchkumanyá wichichunku.

⁹Chaynapiqa Tayta Diospim kusikusaq, salvaykuwasqanmantam kusikusaq.

¹⁰Tukuy sonqoywan qaparispam nisaq: Dios Taytalláy, qam hinaqa manam pipas kanchu, ñakariqkunatam llapa ñakarichiqninmanta libranki, mana imallapaq llamkachiqninkunamantam libranki, nispay.

¹¹Mana allin testigokunam hatarirunku, mana yachasqaymantam tapupayawanku.

¹²Allin ruwasqaymantam mana allinwan kutichiwanku, chaymi sonqoyta nanachin.

¹³Ñoqam ichaqa onqoptinkupas paykunamanta sinchita llakikurqani, qachqa pachawan churakuspaymi ayunarqani, sonqoypipas paykunapaqmi mañakurqani.

¹⁴Wawqeymantapas otaq puriqmasiymantapas hinam llakisqa puriqani, mamaymanta lutokuq hinam uchuychakurqani.

¹⁵Paykunam ichaqa sasachakuypi tarikullaptiypas huñunakuspa asipayawarqaku, mana reqsisqa huklaw runata hinam mana samaykuspa ñakarichiwarqaku.

¹⁶Ñakarichiwaspankum, burlakuwarqaku, kirunkutapas kirichichisparaqmi rabiawan qawawarqaku.

¹⁷Señorlláy, ¿haykapikamataq kayta qawakunki? tuñichiqniykunamanta libraykuway, leonpa siminmanta qechuykuway.

¹⁸Achkallaña runakunapa huñunakuyninpim graciasta qosqayki, achkallaña runakunapa chawpinpim yupaychasqayki.

¹⁹Amayá yanqamanta enemigoykunaqa ñoqamanta kusikuchunchu, Amayá yanqamanta cheqniqniykunapas qemchipayanakuchunchu.

²⁰Paykunaqa manam hawkayaytaqa maskankuchu, aswanqa hawka kawsakuq runakunapa contranpim mana allinllata tanteanku.

²¹Siminkutapas hatunmanta kicharispam kaynata ninku: “Mana allinman wichisqantaqa ñawiykuwanmi rikurqaniku”, nispanku.

²²Dios Taytalláy, qamqa rikurqankim, ama upallakuychu. Señorlláy, ama ñoqallaymanta karunchakuychu.

²³Señorlláy, Diosnilláy, rikchariy, hatarispa allin arreglota ruwaykuway, ñoqapa rantiypi churakuykuspa yanapaykuway.

²⁴Señorlláy, Dios Taytalláy, allin arregloykiman hina juzgaykuway, amayá ñoqamanta asikuwachunkuchu.

²⁵Amayá sonqonkupiqa nichunkuchu: “Kaytam munarqanchik, millpuypaqmi millpurunchik”, nispankuqa.

²⁶Sasachakuypi kasqaymanta asikuqkuna penqaypi kachunku, contraypi hatun tukuqkuna humillasqa kachunku.

²⁷Mana huchayuq kasqaymanta favorniypi kaqkuna kusikuspa takichunku, paykunayá ñataq-ñataq nichunku: “Tayta Diosyá hatunchasqa kachun, payqa serviqninpa hawka kanantam munan”, nispanku.

²⁸Simillaypas allin arreglo ruwaq kasqaykimantam rimanqa, sapa punchawmi yupaychasqayki.