Read Biblia Revisión Chuya Qellqa 1992 – Chuya Qellqa 1992 Salmos 37 Bible Online

Salmos 37 - Biblia Revisión Chuya Qellqa 1992 – Chuya Qellqa 1992 bible

Salmos 37

¹Davidpa takisqan Ama piñakuychu hucha ruwaqkunawanqa, ama envidiakuychu mana allin ruwaqkunamantaqa.

²Paykunaqa pasto hinam chaylla qawirunqaku, paykunaqa qora hinam chaylla chakirunqaku.

³Tayta Diosman hapipakuspayá allinta ruway, kay pachapi yachaspa sunita sayay.

⁴Tayta Diospi anchallataña kusikuy, paymi sonqoykipa munasqanta qosunki.

⁵Tayta Diospa makinman vidaykita churaykuy, payllaman hapipakuy, paymi lliwta ruwanqa.

⁶Paymi allin kawsaynikita achkita hina kancharichinqa, paytaqmi allin ruwaynikitapas intita hina achkirichinqa.

⁷Tayta Diospa qayllanpi upallalla kay, yanapasunaykita pacienciawan suyay; pipas apuyaptinqa ama piñapakuychu, runakunapa mana allinkuna ruwasqanwanqa ama piñakuychu.

⁸Ama piñakuychu, rabiakuykunata wischuy, chaykunaqa mana allinkunatam ruwachisunkiman.

⁹Mana allin ruwaqkunaqa tuñichisqam kanqaku, Tayta Diospi suyaqkunam ichaqa allpata herenciankupaq chaskinqaku.

¹⁰Mana allin ruwaqkunaqa chayllam chinkarunqaku, maskaspapas manam paykunataqa tarinkiñachu.

¹¹Llampu sonqoyuqkunam ichaqa herenciankupaq allpata chaskinqaku, paykunaqa kusikuywanmi hawkayaypi kawsanqaku.

¹²Mana allin runaqa, allin ruwaq runakunapa contranpim hatarin, kiruntapas kachupakunraqmi.

¹³Diosmi ichaqa mana allin runakunamanta asikun, payqa yachanmi puchukananku punchaw chayamunanta.

¹⁴Mana allin runakunaqa espadankutam hurqonku, flechankutam alistanku, wakchakunata, mana piniyuqkunata, allin kawsakuqkunata wañuchinankupaq.

¹⁵Ichaqa kikinkupa espadallanmi sonqonkupi tuksirunqa, flechankupas pakipasqam kanqa.

¹⁶Mana allin runakunapa achkallaña kapuqninmantaqa, allin ruwaqkunapa pisillapas kapuqninmi allinqa.

¹⁷Mana allin runakunapa atiyninqa chinkachisqam kanqa, allin ruwaq runakunatam ichaqa Tayta Dios takyachinqa.

¹⁸Tayta Diosmi mana huchayuq runakunataqa nanachikun, herencia chaskisqankupas wiñaypaqmi takyanqa;

¹⁹sasachakuy tiempopipas manam penqaypaqchu kanqaku, yarqay tiempopipas saksasqam kanqaku.

²⁰Mana allin ruwaq runakunaqa qora hinam chakirunqaku, Diospa enemigonkunaqa qosni hinam chinkarunqaku.

²¹Mana allin runaqa prestakuruspapas mana pagakuqmi; allin ruwaq runam ichaqa llakipayakuspa chaylla qokuykuq.

²²Tayta Diospa bendecisqankunaqa herenciankupaqmi allpata chaskinqaku, paypa ñakasqankunam ichaqa llapallanku chinkachisqa kanqaku.

²³Tayta Diosmi runakunataqa maynin rinanta pusan, paypa munasqanman hina kawsaqkunatam takyachin.

²⁴Tayta Diospa makinpi kasqanraykum wichiykuspapas pampapiqa mana qepanqachu.

²⁵Warmam karqani, kunanqa machuyaruniñam; allin ruwaq runataqa manam haykapipas qonqasqataqa rikurqanichu, wawa-churintapas manam limosnakuqtaqa rikurqanichu.

²⁶Allin ruwaq runaqa tukuy tiempo kuyakuqmi, chayna kawsakuq runaqa imallanpas prestakuykuqmi, wawa-churinkunapas ancha bendicionmi kanqaku.

²⁷Mana allin ruwaymanta anchurikuy, allin kaqkunata ruway, chaynapiqa wiñaypaqmi kawsakunki.

²⁸Tayta Diosqa allin ruwaytam kuyan, payman hapipakuqkunataqa manam saqenchu, paykunaqa wiñaypaq waqaychasqam kanqaku. Mana allin runakunatam ichaqa chinkachispa mana mirayniyuqta saqerunqa.

²⁹Allin ruwaq runakunam herenciankupaq allpata chaskinqaku, paykunaqa wiñaypaqmi chaypi kawsakunqaku.

³⁰Allin ruwaq runaqa yachaywanmi riman, allin ruwaq runaqa allin arreglomantam riman.

³¹Diosninpa kamachikuyninpas sonqollanpim kachkan, chayraykum chakinpas mana haykapipas lluchkanqachu.

³²Millay runaqa allin ruwaq runatam wañuchinanpaq wateqachkan,

³³Tayta Diosmi ichaqa makinman wichinanta mana munanqachu, juiciopiña kaptinpas manam pierdenanta saqenqachu.

³⁴Tayta Diosman hapipakuspa payllata kasukuy, allpata chaskinaykipaqmi hatunchasunki. Mana allin ruwaqkuna puchukaqtam rikunki.

³⁵Mana allin runatam llumpay hatunchakuqta rikurqani, rapisapa sacha hinaraq chutarikuqtam rikurqani.

³⁶Ichaqa chinkarusqanraykum manaña tarikurqañachu, maskaspaypas manañam tarirqaniñachu.

³⁷Allin kawsakuq runata qawaykuy, Diospa munasqanman hina kawsakuq runata rikuykuy, hamuq tiempopipas payqa hawkam kawsakunqa.

³⁸Mana kasukuqkunaqa llapallanmi tukunqa, huchallikuqkunaqa puchukachisqam kanqaku.

³⁹Tayta Diosmi allin runakunapa salvaykuqninqa, payllam sasachakuy tiempopipas pakaykuqninqa.

⁴⁰Tayta Diosmi paykunataqa yanapaykuspa libraykunqa, mana allin runamantam salvaykunqa, payman hapipakusqankuraykum salvaykunqa.