Read Biblia Revisión Chuya Qellqa 1992 – Chuya Qellqa 1992 Salmos 40 Bible Online

Salmos 40 - Biblia Revisión Chuya Qellqa 1992 – Chuya Qellqa 1992 bible

Salmos 40

¹Davidpa takin Pacienciakuspam Tayta Diosta suyarqani, payñataqmi kumuykamuspa qayakusqayta uyariykamuwarqa;

²wañuy pozomantam hurqoykuwarqa, asnarichkaq mitumantam hurqoykuwarqa. Hatun rumimanraqmi payqa churaykuwarqa, lluchkananmantam chakillaytapas takyaykachillarqa.

³Payta yupaychanaypaqmi simillaymanpas musoq takita churaykurqa. Chayta qawaykuspam Tayta Diosta manchakunqaku, chayta qawaykuspam Tayta Diosman hapipakunqaku.

⁴¡Mayna kusisqam Tayta Diosman hapipakuq runaqa! Payqa manam hatun tukuq runakunawanqa hukllawakunchu, idolokuna yupaychaqkunawanqa manam hukllawakunchu.

⁵Señorlláy, Dios Taytalláy, achkallañam admirakuypaq kaqkuna ruwasqaykiqa, achkallañam allinniykupaq ruwasqaykiqa, yupayta munaspaypas manam atiymanchu, willakuyta munaspapas manam tukuymanchu.

⁶Sacrificiokunatawan ofrendakunatapas manam munarqankichu, lliw kañana sacrificiotawan hucharayku ofrendatapas manam mañakurqankichu; ichaqa uyarikuq kanaypaqmi rinrillayta kichaykurqanki,

⁷chaymi nirqani: “Kayqaya hamuchkani, wankusqa libropim ñoqamanta qellqasqa kachkan.

⁸Diosnilláy, munasqaykiman hinam ruwayta munani, kamachikuynikipas sonqollaypim kachkan”, nispa.

⁹Dios Taytalláy, llaqtaykipa hatun huñunakuyninpim allin ruwaynikimanta willakurqani; qanmi yachanki mana upallaykuspa willakusqayta.

¹⁰Allinkuna ruwasqaykimantaqa manam upallakurqanichu, cheqap rimaq kaynikimantapas willakurqanim, salvakuq kasqaykimantapas willakurqanim; llaqtaykipa hatun huñunakuyninpiqa, cheqap kaynikimantapas kuyapayakuynikimantapas manam upallakurqanichu.

¹¹Dios Taytalláy, amayá llakipayakuynikitaqa qechurullawaychu, kuyapayakuynikiwan cheqap kaynikiyá tukuy tiempo waqaychallawachun.

¹²Manaña yupay atina sasachakuykunam waykarullawan, mana allin ruwallasqaykunam hayparamullawan, ñawillaypas tutayarunñam; mana allin ruwasqaykunaqa umaypi chukcha hina mana yupay atinam, sonqollaypas hukmanyarunñam.

¹³Dios Taytalláy, kallpamuspa libraykullaway, utqayman yanapaykullaway.

¹⁴Wañuchiway munaqkuna penqaypi kachunku, llapallanku muspaypi hina tarikuchunku, wichichiway munaqkuna penqakuypaq ayqechunku,

¹⁵asikuwaqniykunapas penqakuymanta ayqechunku.

¹⁶Maskasuqnikikunaqa kusikuspa asikuchunku, salvacionnikita kuyaqkuna nichunku: “Tayta Diosyá hatunchasqa kachun”, nispanku.

¹⁷Dios Taytalláy, mana imayuqña, llakisqaña kallachkaptiypas ama qonqarullawaychu. Qamllam yanapaykuwaspa libraykuqniyqa kanki, Dios Taytalláy, amapuni unamuychu.