Read Biblia Revisión Chuya Qellqa 1992 – Chuya Qellqa 1992 Salmos 66 Bible Online

Salmos 66 - Biblia Revisión Chuya Qellqa 1992 – Chuya Qellqa 1992 bible

Salmos 66

¹Davidpa takisqan Kay pachapi llapallan yachaqkuna, kusikuywan Diosman takiychik,

²ancha reqsisqa sutinmanta takiychik, hatunchaspa yupaychaychik.

³Tayta Diosta niychik: Mayna admirakuypaqmi ruwasqaykikunaqa, hatun atiyniyuq kasqaykiraykum enemigoykikuna ñawpaqnikipi qonqoranqaku.

⁴Kay pachapi yachaqkunam hatunchasunki, ancha reqsisqa sutikimantam takipusunki, nispa.

⁵Hamuspayá Diospa ruwasqankunata qawaychik, runankunapaq admirakuypaq kaqkuna ruwasqankunata qawaychik:

⁶ Payqa lamar qochatam chakirachirqa, pasanankupaqmi mayutapas chakirachirqa. Diosllapi llumpayta kusikusun.

⁷Payqa atiyninwanmi wiñaypaq munaychakun, ñawinwanmi nacionkunata qawachkan, mana kasukuqkuna paypa contranpi ama hatarinankupaq.

⁸Llapachallan runakuna, Diosniykuta bendeciychik, takikunawan payta yupaychaychik.

⁹Paymi ñoqaykutaqa kawsachiwarqaku, mana urmanaykupaqmi takyachiwarqaku.

¹⁰Diosnillayku, qanmi pruebaman churawarqankiku, qollqeta chulluchichkaq hinam chuyanchawarqankiku.

¹¹Mallamanmi wichiykachiwarqankiku, llasaq qepitam qepiykachiwarqankiku.

¹²Umaykupim runakunawan saruparachiwarqankiku; yakutaraq ninataraqmi pasachiwarqankiku, chaywanpas allin kaqmanmi hurqoykuwarqankiku.

¹³Temploykiman yaykuspam lliw kañana sacrificiokunata ofrecemusqayki, prometekusqaykunatam apamullasqayki.

¹⁴Sasachakuypi kaspaymi simillaywan chaykunata rimarqani.

¹⁵Poqosqa animalkunatam lliwta kañaspa ofrecemusqayki; carnerokunata, torokunata, chivatokunatam ofrecemusqayki.

¹⁶Tayta Diosta manchakuqkuna hamuspa uyariwaychik, ñoqapaq imam ruwasqanmantam willasqaykichik.

¹⁷Paytam simiywan qayakurqani, qalluywanmi yupaycharqani.

¹⁸Sonqoypi hucha kaptinqa, Tayta Diosqa manam uyariwanmanchu karqa.

¹⁹Ichaqa Tayta Diosmi uyariykuwarqa, qayakusqaytam chaskiykuwarqa.

²⁰Tayta Diosyá hatunchasqa kachun, payqa mañakusqaytam uyariykuwarqa kuyapayakuynintam qawaykachiwarqa.