Read Biblia Revisión Chuya Qellqa 1992 – Chuya Qellqa 1992 Salmos 69 Bible Online

Salmos 69 - Biblia Revisión Chuya Qellqa 1992 – Chuya Qellqa 1992 bible

Salmos 69

¹Davidpa takisqan Diosnilláy, salvaykullaway, yakupim heqeparuchkaniña.

²Mitumanmi wichiykullani, manam chaypi sayayta atinichu. Yaku ukupim kallachkani, kallpaq mayum apallawachkan.

³Qayakamusqaypim kunkallaypas saqrayarunña, Diosllayta suyasqaypim ñawillaypas utirunña.

⁴Yanqamanta cheqniqniykunaqa chukchaymantapas aswan achkallañam, mana imamanta tuñichiway munaqkunam mirarunku, mana suwakusqaymantam kutichipunayta munanku.

⁵Dios Taytalláy, yachankim mana yachayniyuq kasqaytaqa, huchaykunataqa manam pakaykimanchu.

⁶Tukuy Atiyniyuq Dios Taytalláy, qanman hapipakuqkunaqa amayá ñoqaraykuqa penqaypi kachunkuchu. Israelpa Diosnin, maskasuqnikikunaqa amayá ñoqaraykuqa penqaypi kachunkuchu.

⁷Qamraykum kamisqa karqani, uyallaypas penqakuymantam pukayarqa.

⁸Wawqeykunapaqpas mana reqsisqam karqani, mamaypa wawankunapaqpas huklaw llaqtayuq hinam karqani.

⁹ Temploykita kuyayniymi nina hinaraq sonqoypi ruparin, contraykipi hatarispanku kamisuptikim sonqoy nanawarqa.

¹⁰Ayunaspa waqaptiypas insultawarqakum;

¹¹lutowan churakuptiypas asikuwarqakum.

¹²Llaqtapa punkunpi huñunakuqkunapas contraypim rimanku, sinkakunapas takita hurqospam takipayawanku.

¹³Dios Taytalláy, ñoqam ichaqa qamllata mañakullayki, Diosnilláy, kunanyá yanapaykullaway, hatun kuyakuynikirayku uyariykullaway, yanapaykuwaspayki salvaykullaway.

¹⁴Mituman chinkaykunaymanta hurqoykullaway; cheqniwaqniymanta libraykullaway, uku-uku yakumanta hurqoykullaway.

¹⁵Amayá kallpaq yaku apawanantaqa munaychu, amayá millpukuq yakumanqa kachaykuwaychu, amayá wañuyqa millpuruwachunchu.

¹⁶Dios Taytalláy, kuyapayakuynikiman hina uyariykullaway, ancha llakipayakuynikiman hina qawariykullaway.

¹⁷Kay serviqllaykimantaqa ama uyallaykita pakaykuwaychu, sasachakuypi kasqayrayku utqayman uyariykullaway.

¹⁸Asuykamuwaspa salvaykullaway, enemigoykunamanta libraykullaway.

¹⁹Qamqa yachankim, insultasqa, penqachisqa, llakichisqa kasqaytaqa. Yachankitaqmi pikunam enemigoykuna kasqantapas.

²⁰Kamiwaptinkum sonqollaypas nanay-nanay kachkan; hukmanyasqa mana kallpayuqñam kallachkani. Sonqollay tiyaykachiqta maskaspaypas manam tarinichu.

²¹Yarqawaptinpas qatqe mikuytam mikuchiwarqaku, yakunayawaptinpas vinagretam tomachiwarqaku.

²²Mikuy ruwasqanku paykunata wichiykachichun, fiesta ruwasqanku trampa hina urmachichun.

²³Ama qawakunankupaq ñawinkuta tutayarachiy kallpankuta chinkarachiy.

²⁴Piñakuyniki paykunapa hawanman chayachun, piñakuyniki paykunata haypachun.

²⁵Palacionkunapas chunnichun, campamentonkupas chunnichun.

²⁶Llakichisqayki runatam paykunaqa ñakarichinku, nanay qosqaykimantapas asikunkum.

²⁷Mana allin ruwasqankumanta mana allinwan kutichipuy, huchankutapas ama pampachaychu.

²⁸Sutinkutapas kawsay libromanta chinkarachiy, amayá allin runakunapa sutintawan kuskataqa sutinkutapas qellqaychu.

²⁹Diosnilláy, ñoqatayá ichaqa, onqosqa kachkaptiypas hampiykullaway, wakchayaywan ancha llakisqa kachkaptiypas salvaykullaway.

³⁰Tayta Diospa sutintam yupaychasaq, graciasta qospaymi hatunchasaq;

³¹Chaytam Tayta Diosqa chaskinqa waqrayuq, situyuq toro ofrecesqaymantapas.

³²Chayta qawaspam ñakariqkuna kusikunqaku, Tayta Diosta maskaq runakunapa sonqonmi kawsaparikunqa.

³³Tayta Diosqa wakcha runakunataqa uyarinmi, presochasqa llaqtantapas manam qepanchanchu.

³⁴Hanaq pachawan kay pacha Tayta Diosta yupaychaychik, lamar qochawan chaypi kaqkunapas payta hatunchaychik.

³⁵Diosmi Sión llaqtata salvanqa, Judá llaqtatam musoqmanta hatarichinqa, chaypiña yachaspankum munaychakunqaku.

³⁶Serviqninkunapa mirayninmi herenciapaq chaskinqaku, Diospa sutinta kuyaqkunam chaypi yachanqaku.