Read Biblia Revisión Chuya Qellqa 1992 – Chuya Qellqa 1992 Salmos 7 Bible Online

Salmos 7 - Biblia Revisión Chuya Qellqa 1992 – Chuya Qellqa 1992 bible

Salmos 7

¹Benjaminpa miraynin Cus insultaruptin David takisqanmanta Dios Taytalláy, qamllapim hapipakullani, llapa qatikachawaqniymanta salvaykuwaspa libraykullaway.

²Yanqañataq paykunaqa mana pipapas amachakusqanta león hina llikiparuwanmanku.

³Dios taytalláy, sichum imamantapas huchayuq kaptiyqa, makiypas mana allin ruwaq kaptinqa,

⁴hawka kaqmasiyta ima mana allintapas ruwaruptiyqa, enemigoytapas mana kaqmanta ñakarichiptiyqa;

⁵qatikachawaspa enemigoy hapiruwachun, pampakunapi saruparuwachun, honorniytapas pampaman wikaparuchun.

⁶Dios Taytalláy, piñakuynikipi hatariy, enemigoykunapa piñakuyninpa contranpi hatariy, ñoqaraykuyá allin arreglota ruwaykuy.

⁷Achka llaqtakunata qayllaykiman huñunay, paykunapa hawanpi munaychakuy.

⁸Dios Taytalláy, qamqa llaqtakuna juzgaqmi kanki; allin sonqoyuq kasqayman hinam, mana huchayuq kasqayman hinam, ñoqallaytaqa allin arreglota ruwaykullawanki.

⁹Qamqa mana pimanpas sayapakuq Diosmi kanki, qanmi runapa tanteasqanta yachanki, qanmi runapa sonqonta reqsinki. Mana allin runakunapa ruwayninta puchukarachiy, allin ruwaq runatañataq takyachiy.

¹⁰Dios Taytalláy, pakaykuwaqniymi qamqa kanki, chuya sonqokunatam qamqa salvanki.

¹¹Diosqa allin arreglo ruwaq juezmi, mana allin ruwaq runataqa tukuy tiempom cheqnin.

¹²Mana wanakuptinqa, Diosmi espadanta ñawchiyaykachinqa, flechanan arcontam alistaykunqa;

¹³rupachkaq flechankunatam alistarunña, wañuchiq armankunatam ruwarunña.

¹⁴Millay runata qawariychik, mana allin ruwaytam wiksayakurun, payqa nanaywan hapirachikuspam llullallata wachakurun.

¹⁵Payqa uku-uku uchkutaraqmi toqorun, ichaqa chay uchkusqallanmanmi wichiykun.

¹⁶Mana allinkuna ruwasqanpas kikillanmanmi kutirun, mana allinkuna ruwasqanpas kikillanmanmi chayarun.

¹⁷Ñoqam ichaqa allin arreglo ruwaq kasqanmanta Tayta Diosta yupaychasaq, tukuy imapa hawanpi munaychakuq Diostam yupaychasaq.