Read Biblia Revisión Chuya Qellqa 1992 – Chuya Qellqa 1992 Salmos 71 Bible Online

Salmos 71 - Biblia Revisión Chuya Qellqa 1992 – Chuya Qellqa 1992 bible

Salmos 71

¹Dios Taytalláy qamllam pakaykuqniyqa kanki, amayá penqaypi kanaytaqa munaychu.

²Allin ruwaynikiman hina yanapaykuwaspa libraykullaway; uyariykuwaspaykiyá salvaykullaway.

³Pakaykuqniy qaqayá kaykuy, salvaykuqniy torreyá kaykuy, chayman sapa kutilla ayqenaypaq. Qamyá salvasqa kanaypaq kamachikuy, qamllam waqaychaqniy qaqa kanki qamllam pakaykuqniy perqaqa kanki.

⁴Diosnilláy, millay runamanta libraykullaway, wañuchikuq runamanta pakaykullaway, maqakuq runamanta waqaychaykullaway.

⁵Dios Taytalláy, qamllapim suyallani, warma kasqaymantaraqmi qamllapi hapipakullani.

⁶Mamaypa wiksanmantaraqmi yanapaykullawarqanki, mamaypa wiksanmantam paqariykachiwarqanki, qamllatam wiñaypaq yupaychasqayki.

⁷Achkallañam ñoqamanta admirakunku, ichaqa qamllam amparakunayqa kanki.

⁸Tukuy atiyniyuq kasqaykimantam simillaywan sapa punchaw yupaychamuyki,

⁹Yuyaqyarullaptiypas ama wischurullawaychu; pisi kallpayuqña rikurirullaptiypas ama saqerullawaychu.

¹⁰Enemigoykunam contraypi rimanakunku, wañuchiwanankupaqmi huñunakuspa tanteanakunku,

¹¹kaynatam ninakunku: “Paytaqa Diospas saqerunñam, qatispa hapiramusun, manam pipas paytaqa nanachikunqachu”, nispanku.

¹²Diosnilláy, amapuni ñoqamanta karunchakuychu, utqayman hamuspa yanapaykullaway.

¹³Wañuchiway munaqkunaqa penqayman churasqa kaspa chinkachisqa kachunku, mana allinniy munaqkuna pantachispa penqayman churasqa kachunku.

¹⁴Ñoqam ichaqa tukuy tiempo hapipakullasqayki, aswan-aswanmi yupaychasqayki.

¹⁵Tukuy punchawmi allinlla ruwaq kasqaykimanta rimallasaq, salvacionnikimantam willakusaq; allinkuna ruwasqaykiqa mana yupay atinam.

¹⁶Dios Taytalláy, atiywan ruwasqaykimantam willakusaq; Señorlláy, allin ruwaq kasqaykimantam yuyaymanasaq.

¹⁷Diosnilláy, warma kasqaymantaraqmi yachachiwarqanki, kunankamapas admirakuypaq ruwasqaykikunamantam willakuchkani.

¹⁸Diosnilláy, yuyaqyaruspa soqo umaña kaptiypas ama qonqarullawaychu; kunan miraykunamanpas, qepa miraykunamanpas atiynikimanta willakunaypaq.

¹⁹Diosnilláy, allin kaqkuna ruwasqaykiqa hanaq pachakamam chayan. Hatu-hatunmi qampa ruwasqaykiqa, manam pipas qam hinaqa kanchu.

²⁰Llumpay llakikuytawan mana allinkunallata qawachiwaspaykipas, huktawanmi kawsarichiwanki; allpapa sonqonmantam hatarichimuwanki.

²¹Aswanraq hatunchaykuwaspaykim yapamanta sonqollayta tiyaykachinki.

²²Diosnilláy, cheqap kasqaykimantam arpata tocaspa yupaychasqayki. Israelpa Chuya Diosnin, salteriowan takispam yupaychasqayki.

²³Kusikuywan qaparispaymi takipusqayki, salvawasqaykimantam yupaychasqayki.

²⁴Allin ruwaq kasqaykimantam tukuy punchaw willakusaq; mana allinniy maskaqkunam pantachispa penqayman churasqa tarikurunku.