Read Biblia Revisión Chuya Qellqa 1992 – Chuya Qellqa 1992 Salmos 80 Bible Online

Salmos 80 - Biblia Revisión Chuya Qellqa 1992 – Chuya Qellqa 1992 bible

Salmos 80

¹Asafpa takisqan Israel nacionpa michiqnin uyariykuy, Joseypa mirayninkunata ovejata hina michiq, querubinkunapa chawpinpi tarikuq, kancharimuy.

²Efrainpa, Benjaminpa, Manasespa qayllanpi atiynikita qawachikuy, salvaykuwanaykikupaq kallpamuy.

³Diosnillayku, huktawan hatariykachiwayku, kuyapayakuynikiman hina salvaykuwayku.

⁴Tukuy Atiyniyuq Dios Taytallayku, ¿haykapikamataq piñakunki mañakuyniykutapas mana uyariwanaykikupaq?

⁵Mikuypa rantinpim weqeykuta mikuchiwarqankiku; yakupa rantinpim achka weqeta tomachiwarqankiku.

⁶Muyuriqniykupi yachaqkunapa burlakunantam ruwaruwarqankiku, enemigoykupa asipayanantam ruwaruwarqankiku.

⁷Tukuy Atiyniyuq Diosnillayku, huktawan hatariykachiwayku, kuyapayakuynikiman hina salvaykuwayku.

⁸Egiptomantam huk uvas plantata apamurqanki, huchasapa nacionkunata qarqoruspaykim chaypi plantaykurqanki.

⁹Chakratam allicharqanki, uvasta plantaykuptikim sapichakuspa allpata huntaykurqa.

¹⁰Llantuyninwanmi orqokunatapas pampaykurqa, kallmankunam cedro sachakunatapas llantuykurqa.

¹¹Lamar qochakamaraqmi kallmankunapas mastarikurqa, Eufrates mayukamaraqmi ikllipankunapas chayarqa.

¹²¿Imanasqataq chay uvas huertapa cerconta taqmaparunki ñannin puriqkuna uvasta pallakunankupaq?

¹³Monte kuchikunam chaqoparunku, purun animalkunam mikukurunku.

¹⁴Tukuy Atiyniyuq Diosnillayku, ñoqaykuman kutirimuy, hanaq pachamanta qawarimuspa kay uvas plantaykita llakipayariykuwayku;

¹⁵Chay uvasqa alleq makikiwan plantasqaykim, ikllichispa qampaq wiñachikusqaykim.

¹⁶Chay plantata kuchuspa kañaqkunata piñakuynikiwan puchukachiy.

¹⁷Akllakusqayki runatayá yanapaykuy, takyachisqayki runapa miraynintayá yanapaykuy.

¹⁸Chaynapim qanmanta mana rakikusaqkuchu, kawsakuyta qoykuwayku qamllataña qayakamunaykupaq.

¹⁹Tukuy Atiyniyuq Dios Taytallayku, huktawan hatarichiwayku, kuyapayakuynikiman hina salvaykuwayku.