Read Biblia Revisión Chuya Qellqa 1992 – Chuya Qellqa 1992 Salmos 89 Bible Online

Salmos 89 - Biblia Revisión Chuya Qellqa 1992 – Chuya Qellqa 1992 bible

Salmos 89

¹Etanpa takisqan Dios Taytalláy, kuyapayakuq kasqaykimantam wiñaypaq takillasaq, hapipakunapaq kasqaykimantam miraymanta-miraykamam willakullasaq.

²Kuyapayakuynikiqa wiñaypaq kasqantam willakusaq; cheqap kaynikiqa cielo hina mana kuyuriq kasqantam willakusaq.

³Davidwanmi pactota ruwarqanki, akllasqayki serviqnikimanmi prometerqanki:

⁴“Wiñaypaqmi miraynikikunata takyachisaq, rantikipi munaychakunankupaqmi tronoykiman churasaq”, nispayki.

⁵Dios Taytalláy, cielokunam admirakuypaq ruwasqaykimanta kusikunku, chuyakunam huñunakuyninkupi cheqap kasqaykimanta yupaychasunki.

⁶Dios Taytalláy, cielokunapi kaqkunamanta ¿pitaq qanman rikchakuq kanman? Atiyniyuqkunapa churinmanta ¿pitaq qanman rikchakuq kanman?

⁷Diosnilláy, hatun huñunakuypim chuya runakuna manchakusunki, muyuriqnikipi kaqkunapaqqa llumpay manchakunanmi kanki.

⁸Tukuy Atiyniyuq Dios Taytalláy, ¿pitaq qam hina atiyniyuq kanman? ¿Pitaq qam hina tukuypi hapipakuna Dios kanman?

⁹Qanmi hoqarikuruq lamar qochapi munaychakunki, qamqa hatun olankunatam hawkayachinki.

¹⁰Qanmi Rahabta ayata hina llapirurqanki, enemigoykikunatam hatun atiynikiwan cheqerachirqanki.

¹¹Hanaq pachapas kay pachapas qampam, qanmi kay pachata chaynataq tukuy imankunatapas unancharqanki.

¹²Norte lawpi, sur lawpi kaqkunatam unancharqanki, Tabor orqowan Hermón orqopas kusikuyllawanñam yupaychasunki.

¹³Brazoykiqa atiyniyuqmi, makikiqa kallpayuqmi, alleq makikiqa venceqmi.

¹⁴Munaychakuynikipa sapinqa allin arreglo ruwaywan mana pimanpas sayapakuymi, kuyapayakuywan cheqap kaymi qayllaykipi tarikun.

¹⁵Dios Taytalláy, ¡mayna kusisqam, kusikuywan qaparispa yupaychasuqniki llaqtaqa! kanchariptikim qayllaykipi purinqaku.

¹⁶Paykunaqa sutikipim tukuy tiempo kusikunqaku, allinkuna ruwasqaykiraykum hatunchasqa kanqaku.

¹⁷Qanmi atiyninpas, kallpanpas kanki, munakuynikiman hinam kallpaykuta yapaykunki.

¹⁸Tayta Diosmi harkaykuwaqninchikqa, Israelpa chuya Diosninmi reyninchikqa.

¹⁹Huk kutipim visionpi qawachispa, hapipakusuqniki serviqnikikunaman nirqanki: Llaqtaymantam huk allinnin qari-qarita akllaruni, hatunchaspaymi yanaparqani.

²⁰ Serviqniy Davidtam tarirqani, aceitewan tallispaymi rey kananpaq sapaqcharqani.

²¹Makiywanmi paytaqa takyachisaq, atiyniywanmi paytaqa kallpanchasaq.

²²Enemigonkunapas manam imanayta atinqachu, millay runakunapas manam ñakarichiyta atinqachu.

²³Aswanqa enemigonkunatam ñawpaqninpi chinkarachisaq, cheqniqninkunatam tuñirachisaq.

²⁴Cheqap kayniywan kuyakuyniymi paywan kanqa, ñoqapa sutiypim atiyninpas huntarinqa.

²⁵Atiynintawan munaychakuynintam sapinchasaq, Mediterráneo lamar qochamanta Eufrates mayukama.

²⁶Paymi kaynata qayakamuwanqa: Qanmi Taytay kanki, qanmi Diosniy kanki, waqaychawaspa salvaykuwaqniymi kanki, nispa.

²⁷Ñoqañataqmi piwi churipa derechonta qosaq, kay pachapi reykunapa hawanpim churasaq.

²⁸Kuyakuyniypas tukuy tiempom paywan kanqa, paywan pacto ruwasqaypas allin takyaqmi kanqa.

²⁹Hanaq pacha kanankamaqa mirayninkunapas paypa rantinpim wiñaypaq munaychakunqaku.

³⁰Sichum mirayninkuna kamachikuyniyta saqeruspa yachachikuyniykunaman hina mana kawsaptinkuqa,

³¹sichum kamachikuyniykunata sarutyaspanku mana ruwayman churaptinkuqa,

³²varawanmi castigasaq, mana allin ruwasqankumantam azotesaq.

³³Chaywanpas kuyapayakuyniytaqa manam qechurusaqchu, paytaqa manam qepanchakurusaqchu.

³⁴Pactoytaqa manam pakisaqchu, rimasqaytaqa manam qonqasaqchu.

³⁵Huk kutillatam chuya kasqayrayku jurarqani: Manam Davidtaqa llullakusaqchu.

³⁶Mirayninkunam rantinpi wiñaypaq munaychakunqaku, munaychakuyninqa inti hinam takyanqa.

³⁷Munaychakuyninqa killa hinam wiñaypaq kanqa, killaqa testigo hinam cielopi kachkan, nispa.

³⁸Chaywanpas piñakuruspaykim reypaq akllasqaykita qepanchakururqanki, paypaqmi piñakururqanki.

³⁹Serviqnikiwan pacto ruwasqaykitam pakirurqanki, coronantapas pampamanmi wischururqanki.

⁴⁰Murallankunatapas uchkuparurqankim, llaqtankunatapas purmarachirqankim.

⁴¹Haykam chayninta puriqkunam munasqankuta suwakunku, muyuriqninpi yachaqkunam paymanta burlakunku.

⁴²Contranpi kaqkunatam kallpancharqanki, enemigonkunatam kusichirqanki.

⁴³Espadanpa filontapas laqoyarachirqankim, guerrapipas manam yanaparqankichu.

⁴⁴Atiynintam yanqacharurqanki, munaychakuynintapas pampamanmi wischururqanki.

⁴⁵Warma vidantam menosyarachirqanki, hatun penqaymanmi churarurqanki.

⁴⁶Dios Taytalláy, ¿haykapikamataq pakakuspa kanki? ¿Wiñaypaqchu piñakuyniki nina hinaraq ruparinqa?

⁴⁷Yuyariy, wataykunaqa pisi punchawlla kasqanta, ¿Yanqapaqchu runata unancharqanki?

⁴⁸¿Ima runataq mana wañuq kanman? ¿Pitaq wañuypa atiyninmanta lluptinman?

⁴⁹Señorlláy, ¿maytaq chay punta kuyakuynikiqa? ¿Maytaq mana qepanchanaykipaq Davidman prometesqaykiqa?

⁵⁰Señorlláy, serviqnikikuna kamisqa kasqankuta yuyariy, llapa runakunapa kamiwasqankuqa sonqoypim kachkan.

⁵¹Dios Taytalláy, chaynatam enemigoykikuna kamiwanku, chaynatam akllakusqaykita sapa kutilla kamiwanku.

⁵²¡Tayta Diosyá wiñaypaq qapaqchasqa kachun! ¡Amén!