Read Biblia Revisión Chuya Qellqa 1992 – Chuya Qellqa 1992 Salmos 9 Bible Online

Salmos 9 - Biblia Revisión Chuya Qellqa 1992 – Chuya Qellqa 1992 bible

Salmos 9

¹Kay takiqa arpakunawan qenakunawan takinam (Isqon Salmowan chunka kaq Salmoqa original qellqapiqa hukllam karqa, chaymi alfabeto hebreowan rakinasqa karqa). Dios Taytalláy, tukuy sonqoymantam yupaychasqayki, admirakuypaq kaqkuna ruwasqaykimantam willakusaq.

²Dios Taytalláy, qamqa tukuy imapa hawanpi munaychakuqmi kanki, ñoqaqa qamllapim llumpayta kusikusaq, takispaymi sutikita yupaychasaq.

³Qampa ñawpaqnikimantam enemigoykuna ayqenku, ñawpaqnikipi wichiykuspankum puchukarunku.

⁴Qamqa allin juezmi kanki, tronoykipi tiyaykuspam allin arreglota ruwanki.

⁵Llapa nacionkunatam qaqchaparurqanki, mana allin ruwaqkunatam puchukarachirqanki, sutinkutapas wiñaypaqmi chinkarachirqanki.

⁶Enemigoykunam wañurunku, wiña-wiñaypaqmi puchukarunku, manaña pipas yuyarinankupaqmi llaqtankutapas purmarachinki.

⁷Tayta Diosqa wiña-wiñaypaq munaychakuqmi, juzgananpaqmi tiyananta alistarun.

⁸Allin arregloman hinam kay pachata juzganqa, munasqanman hinam llaqtakunatapas sentencianqa.

⁹Dios Taytalláy, ñakariqkunapa amparakunanmi kanki, sasachakuy tiempopi waqaychaqninmi kanki.

¹⁰Sutiki reqsiqkunaqa qamllapim hapipakunqaku, maskaqnikikunataqa manam haykapipas saqerunkichu.

¹¹Sionpi munaychakuq Tayta Diosmanyá takiychik. Tukuy imakuna ruwasqanmantayá runakunaman willakuychik.

¹²Tayta Diosqa ñakariqkunatam yuyarin, qayakuyninkutapas manam qonqanchu; wañuchiqpa yawar chaqchusqantaqa manapunim qonqanqachu.

¹³Dios Taytalláy, llakipayaykullaway, cheqniqniykunapa causanpi ñakarisqayta qawariykullaway, wañuypa patanmanta hurqoykullaway,

¹⁴hatunchasqa kanaykimanta Jerusalén llaqtapa punkupi willakunaypaq, salvaykuwasqaykimanta kusikunaypaq.

¹⁵Nacionkunam kikinkupa uchkusqankuman wichiykunku, kikinkupa toqlla churasqankuwanmi hapirachikunku.

¹⁶Tayta Diosqa mana pimanpas sayapakuq juez kasqanpim reqsichikun; mana allin ruwaqqa kikinpa trampallanmanmi wichiykun.

¹⁷Mana allin runakunaqa, Diosta qonqaruq nacionkunaqa, wañuqkunapa kasqanmanmi apasqa kanqaku.

¹⁸Wakchakunaqa manam wiñaypaqchu qonqasqa kanqaku, ima suyasqankupas manam wiñaypaqchu chinkachisqa kanqa.

¹⁹Dios Taytalláy, hatariy; runaqa amayá hatun tukuchunchu, nacionkunapas ñawpaqnikipi juzgasqa kachunku.

²⁰Dios Taytalláy, paykunatayá hatu-hatunta mancharichiy, wañuq runalla kasqankuta yachakunankukama.