Read Biblia Revisión Chuya Qellqa 1992 – Chuya Qellqa 1992 Salmos 90 Bible Online

Salmos 90 - Biblia Revisión Chuya Qellqa 1992 – Chuya Qellqa 1992 bible

Salmos 90

¹Diospa serviqnin Moisespa mañakusqan Señorllayku, miraymanta miraykama waqaychaqniykum, kanki.

²Manaraqpas orqokuna rikurichkaptin, manaraqpas allpa pacha paqarichkaptin, wiñaymanta wiñaykama Diosmi kanki.

³Runakunata ñutu allpaman kutiykachispam ninki: “Runakuna ñutu allpaman kutiykuychik”, nispayki.

⁴Qampaqqa waranqa watakunapas qayna punchaw pasaruq hinallam, tutapi kimsa hora hinallam.

⁵Runataqa lloqlla hinam aparunki, kawsayninkuqa huk puñuy hinallam, tutapayta iklliramuq pasto hinallam.

⁶Achikyaqtam wiñaruspan waytarun, tardeykuqtañataqmi qawiruspa chakirun.

⁷Cheqaptapunipas rabiakuynikipa tukusqanmi kaniku, piñakuynikipa hukmanyachisqanmi kaniku.

⁸Huchaykutam ñawpaqnikiman churaykunki, pakasqa huchaykutapas sutillatam rikuriykachinki.

⁹Cheqaptapunim vidallaykuqa piñakuynikiwan pasaypaqta tukurun; kawsasqayku watakunaqa samay hinallam tukurun.

¹⁰Runapa kawsakuyninqa qanchis chunka watallam, kallpasapankunallam pusaq chunka watakama chayanku, chaywanpas unay kawsakuyqa sasachakuytawan waqakuytam apamun. Imaynam watakuna chaylla pasarun, chaynam vidaykupas tukurun.

¹¹¿Pitaq piñakuynikipa atiyninta reqsinman? Piñakuynikiqa ancha hatunmi, chayman hinam manchakusqaykiku.

¹²Kawsasqayku punchawkuna yupayta yachachiwayku, chaynapi yachayniyuq kanaykupaq.

¹³¡Dios Taytalláy, kutirimullawayku! ¿Haykapikamataq unamunki? Serviqnikikunata llakipayarillawayku.

¹⁴Achikyamuyta kuyakuynikiwan huntaykuwayku, hinaptinqa kawsanaykukamam kusisqa takisaqku.

¹⁵Llakichiwasqaykiku punchawkunaman hinayá, ñakarichiwasqaykiku watakunaman hinayá kusirichillawayku.

¹⁶Serviqnikikunaman ruwasqaykikunata rikuchiy, atiynikita churinkuman qawachiy.

¹⁷Señorninchik Tayta Diospa achkiriynin ñoqanchikpi kachun, llamkasqaykuta allinta takyachiy, imam ruwasqaykuta allinta takyachiy.