Read Biblia Revisión Chuya Qellqa 1992 – Chuya Qellqa 1992 Salmos 92 Bible Online

Salmos 92 - Biblia Revisión Chuya Qellqa 1992 – Chuya Qellqa 1992 bible

Salmos 92

¹Samana punchawpi Diosman takinapaq Dios Taytalláy, ¡mayna sumaqmi qanman yupaychayqa! Tukuy imapa hawanpi munaychakuq Diosnilláy, ¡mayna sumaqmi sutikita hatunchaspa takiyqa!

²¡Mayna allinmi kuyapayakuynikimanta sapa achikyayta willakuyqa! ¡Mayna sumaqmi cheqap kaynikimanta tutankunapas willakuyqa.

³Mayna sumaqmi arpawan takiyqa, mayna sumaqmi salteriowan yupaychayqa.

⁴Dios Taytalláy, ruwasqaykikunawanmi kusichiwanki, ruwasqaykikunamantam kusikuywan yupaychasqayki.

⁵Dios Taytalláy, ¡mayna hatunmi ruwasqaykikunaqa! ¡Mana haypay atinam piensasqaykikunaqa!

⁶Asno runaqa manam chaytaqa entiendenchu.

⁷Mana allin runakunam qora hina ikllirunku, millay ruwaqkunam qora hina waytarunku, ichaqa wiñaypaq chinkachisqam kanqaku.

⁸Dios Taytalláy, qanmi ichaqa wiñaypaq munaychakunki.

⁹Dios Taytalláy, cheqaptapunipas enemigoykikunaqa chinkachisqam kanqaku, mana allin ruwaqkunaqa cheqechisqam kanqaku.

¹⁰Qanmi ichaqa kallpanchaykuwanki, purun torota hinam kallpanchaykuwanki, miski asnaq aceitewanmi umayman talliykuwanki.

¹¹Enemigoykunapa imaynam wichisqantam qawasaq, vencechikuspa qaparkachasqankutam uyarisaq.

¹²Allin ruwaq runakunaqa palmera hinam waytarinqaku, Libanopi cedro sacha hinam wiñanqaku.

¹³Tayta Diospa templonpi plantasqa hinam, Diosninchikpa templonpa pationpi waytarinqaku.

¹⁴Chay sachakunaqa machuyaruspapas rurunqakuraqmi, kallpallanpim llanllay-llanllay kanqaku.

¹⁵Chaynapim willakunqaku waqaychaqniy Tayta Diosqa mana pantaq kasqanta, willakunqakutaqmi mana pimanpas sayapakuq kasqanta.