Read Biblia Revisión Chuya Qellqa 1992 – Chuya Qellqa 1992 Salmos 94 Bible Online

Salmos 94 - Biblia Revisión Chuya Qellqa 1992 – Chuya Qellqa 1992 bible

Salmos 94

¹Vengakuq Dios Taytalláy, vengakuq Dios kasqaykita qawaykachikuy.

²Kay pachata juzgaq Diosnilláy, ¡hatarispayki hatun tukuqkunata castigay!

³Dios Taytalláy, ¿haykapikamataq mana allin runakuna kusikunqaku?

⁴¿Haykapikamataq hatun tukuspa rimanqaku? ¿Haykapikamataq mana allin ruwaqkuna qari tukunqaku?

⁵Dios Taytalláy, llaqtaykitam sarupanku, akllakusqaykikunatam ñakarichinku.

⁶Viudakunatawan huklaw llaqtayuqkunatam wañuchinku, mana tayta-mamayuqkunatam wañuchinku.

⁷Paykunam ninku: Tayta Diosqa manam rikunchu, Jacobpa Diosninqa manam musyanchu, nispanku.

⁸¡Ruqru runakuna, uyariychik! mana yachayniyuq runakuna, ¿haykapitaq yachayniyuq kankichik?

⁹Rinri ruwaq Diosqa ¿manachum uyarirunqa? Ñawi ruwaq Diosqa ¿manachum rikurunqa?

¹⁰Nacionkuna castigaq Diosqa ¿manachum castiganqa? Runakuna yachachiq Diosqa ¿manachum yachanqa?

¹¹Tayta Diosqa yachanmi runaqa mana allinkunalla yuyaymanasqanta.

¹²Dios Taytalláy, ¡mayna kusisqam corregisqayki runaqa! ¡Mayna kusisqam kamachikuynikikuna yachachisqayki runaqa!

¹³Sasachakuy punchawkunapim paytaqa hawkayachinki, millay runapaqmi ichaqa sepulturata toqonqaku.

¹⁴Tayta Diosqa manam llaqtantaqa qepanchakunqachu, nitaqmi akllasqankunataqa saqenqachu.

¹⁵Juezkunapas mana pimanpas sayapakuspañam juzganqaku, allin sonqoyuq runakunapas chaypim hapipakunqaku.

¹⁶Millay runakunamantaqa, ¿pitaq harkaykuwanqa? Mana allin ruwaqkunamanta, ¿pitaq nanachikuwanqa?

¹⁷Sichum Dios Tayta mana yanapaykuwaptinqa wañuypa patanpiñam kachkayman karqa.

¹⁸Chakillaymi lluchkaykuchkanña nispa qapariptiymi Dios Taytalláy kuyakuywan yanapaykullawarqanki.

¹⁹Llakipa intusqan kallaptiymi sonqollayta tiyaykachispa kusiykachillawarqanki.

²⁰Mana allin juezkunawanqa manam hukllawakuwaqchu, paykunaqa kamachikuynikikunata qepanchaspam runakunata ñakarichinku.

²¹Paykunaqa allin ruwaqpa contranpim huñunakunku, mana huchayuq runatam wañuchinankupaq sentencianku.

²²Tayta Diosmi harkaykuwaqniyqa, Diosniymi qaqa hina pakaykuwaqniyqa.

²³Tayta Diosmi, mana allin ruwasqankuta kikillankuman kutichinqa, mana allinkuna ruwasqankumantam chinkachinqa, Señorninchik Tayta Diosmi paykunata tuñichinqa.