Read Biblia Revisión Chuya Qellqa 1992 – Chuya Qellqa 1992 Proverbios 13 Bible Online

Proverbios 13 - Biblia Revisión Chuya Qellqa 1992 – Chuya Qellqa 1992 bible

Proverbios 13

¹Yachayniyuq warmaqa taytanpa corregisqantam chaskikun, mana yachayniyuq warmam ichaqa corregisqapas mana kasukuq.

²Runaqa allin rimasqanpa ruruntam mikunqa, iskay uya runam ichaqa runamasin wañuchiymanta yarqachikun.

³Rimaynin controlakuq runaqa kawsaynintam waqaychakun, rimaysapa runam ichaqa sasachakuyman kikillan churakun.

⁴Qella runaqa maynata munaspapas manam imatapas tarinchu, llamkakuq runam ichaqa kapuqniyuq kanqa.

⁵Allin kawsakuq runaqa llullakuytam cheqnin, mana allin runam ichaqa cheqnichikun hinaspa penqaypi tarikun.

⁶Allin kawsakuq runataqa allin kawsakuyninmi waqaychan, huchasapa runatam ichaqa mana allin ruwayninkuna chinkarachin.

⁷Kanmi mana imayuq kachkaspapas apu tukuq runakuna, kantaqmi tukuy imayuq kachkaspapas wakcha tukuqkuna.

⁸Apu runataqa kapuqninkunam vidanta salvan, wakcha runam ichaqa mana ima amenazatapas chaskinchu.

⁹Allin ruwaq runaqa achkiy hinam, mana allin runam ichaqa wañusqa mechero hina.

¹⁰Hatun tukuq runaqa peleollatam hatarichin, yachaymi ichaqa uchuychakuqkunawan tarikun.

¹¹Mana allinkunata ruwaspa tarisqa qollqeqa chayllam tukurun; llamkakuspa huñusqa qollqem ichaqa miranqa.

¹²Imapas munasqan unamuptinqa runapa sonqonmi ñakarin, munasqan cumplikuruyninmi ichaqa kawsay qokuq sacha hinaraq.

¹³Kamachikuyta mana kasukuq runaqa chinkanqam, kamachikuyta kasukuqmi ichaqa pagota chaskikunqa.

¹⁴Yachayniyuqpa yachachikuyninqa kawsachikuq yaku hinam, wañuypa makinmantapas librakunmi.

¹⁵Allinta tantearispa ruwaq runaqa kuyasqam kanqa, iskay uya runam ichaqa chinkayman richkan.

¹⁶Allinta tanteakuspa ruwaq runaqa yachaywanmi imatapas ruwan, mana tantearikuq runam ichaqa mana yachayniyuq kayninta qawachikun.

¹⁷Mana allin willakuq runaqa sasachakuytam apamun, imam kaqta willakuq runam ichaqa hampi hina.

¹⁸Yachachikuyta qepanchaq runaqa sasachakuypi wakchayaypim tukunqa, corregichikuq runam ichaqa ancha reqsisqa kanqa.

¹⁹Imapas munasqata hayparuyqa sonqotam kusichin. Mana yachayniyuq runapaqqa mana allin ruwaymanta rakikuypas millakuypaqmi.

²⁰Yachayniyuqkunawan hukllawakuqqa yachayniyuqmi kanqa, mana yachayniyuqkunawan hukllawakuqmi ichaqa sasachakuypi tarikunqa.

²¹Sasachakuyqa huchasapakunatam qatikachan, allin ruwaq runakunam ichaqa allin kaqkunawan premiasqa kanqa.

²²Allin ruwaq runaqa willkankunamanmi herenciata saqen, huchasapa runapa kapuqninkunam ichaqa allin runapaq waqaychasqa kachkan.

²³Wakchakunapa chakranpiqa mikuypas puchu-puchum, mana allinpa kasqanpim ichaqa chinkarun.

²⁴Churinta mana corregiq runaqa churintam cheqnin, churin kuyaqmi ichaqa chaylla corregiykun.

²⁵Allin ruwaq runaqa saksanankamam mikun mana allin runam ichaqa manaña saksariq.