Read Biblia Revisión Chuya Qellqa 1992 – Chuya Qellqa 1992 Proverbios 22 Bible Online

Proverbios 22 - Biblia Revisión Chuya Qellqa 1992 – Chuya Qellqa 1992 bible

Proverbios 22

¹Qori-qollqemantapas aswan allinqa ancha reqsisqa kaymi, qori-qollqemantapas aswan allinqa kuyasqa respetasqa kaymi.

²Apupas wakchapas chaynakamallam kanku Tayta Diospa unanchasqan kasqankupim.

³Allin tanteakuq runaqa sasachakuyta qawarispam suchurikun, mana yachayniyuq runam ichaqa sasachakuyman yaykuruspan ñakarin.

⁴Tayta Diosta uchuychakuspa kasukuyqa apuyaytawan ancha reqsisqa kayta hinaspa kawsakuytam apamun.

⁵Mana allin runapa ñanninqa kichkakunapa trampakunapa huntasqanmi tarikun, vidanta llakipayakuq runaqa chaykunamantam karunchakun.

⁶Warmataqa imaynam kawsanantayá yachachiy, yuyaqña kaspapas chay yachasqanmantaqa manam sapaqchakunqachu.

⁷Apuqa wakchakunapim munaychakun, prestakuqñataqmi prestaqninpa criadon rikurirun.

⁸Mana allin kaqkunallata tarpuqqa sasachakuyllatam cosechanqa, Tayta Diosmi piñakuy tawnanwan tuñichinqa.

⁹Runamasinta llakipayaq runaqa, wakchakunaman mikuykachisqanraykum bendecisqa kanqa.

¹⁰Piñanakuylla maskaq runata qarqorusqaqa piñanakuypas, cheqninakuypas, kaminakuykunapas tukurunqam.

¹¹Allin kawsakuq runaqa, sumaq rimayninwanmi reypa kuyakuyninta haypan.

¹²Tayta Diosmi yachaytaqa nanachikun, llulla runapa rimasqantam ichaqa yanqacharun.

¹³Qella runaqa kaynatam nin: “Hawapiqa leonmi kakuchkan ñanpim sipiruwanman”, nispa.

¹⁴Qosan engañaq warmipa siminqa uku-uku pozom; Tayta Diosta piñachiq runaqa chay pozomanmi wichiykunqa.

¹⁵Mana allinkuna ruwayqa warmakunapa sonqonpim tarikun, ichaqa latigowanmi corregikunqa.

¹⁶Apuyananrayku wakchata ñakarichiq runaqa, otaq apuman qoykuq runaqa, wakchayaypim tukunqa.

¹⁷Yachayniyuq runapa rimasqantaqa rinrita kicharispa sumaqta uyariy, yachachisqaykunapiyá sumaqta yuyaymanay.

¹⁸Umaykiman churakuspa simikiwan rimaptikiqa kusichisunkim.

¹⁹Kaykunatam kunan yachachiki Tayta Diosman hapipakunaykipaq.

²⁰Kimsa chunka yachachikuykunatam qampaq qellqarqani, chaykunaqa yachaytawan sumaq rimaykunatam qosunki;

²¹chaynapi cheqap kaqta yachachisuptiki, pipas tapusuptiki imam kaqta willakunaykipaq.

²²Wakchataqa wakcha kasqanraykuyá ama imantapas qechuychu, mana piniyuq runatapas amayá juezpa qayllanpiqa ñakarichiychu.

²³Paykunamantaqa Tayta Diosmi nanachikun, imallantapas qechuqtaqa Tayta Diosmi ñakarichinqa.

²⁴Chaylla piñakuruq runawanqa ama amistadta armaychu, piña-piña runawanqa ama kuskapas puriychu.

²⁵Yanqañataq mana allin ruwayninta qatipakuspa vidaykita sasachakuyman qaykuruwaq.

²⁶Ama haykapipas prometekuychu hukpa manukusqanta paganaykipaqqa.

²⁷Mana pagayta atispaykim puñunayki camatawanpas qechurachikuwaq.

²⁸Tayta-mamaykipa churasqan linderokunataqa ama haykapipas suchuchiychu.

²⁹Pipas ruwananta allinta llamkakuqqa reykunatam servinqa, manam huk runataqa servinqachu.