Read Biblia Revisión Chuya Qellqa 1992 – Chuya Qellqa 1992 Proverbios 24 Bible Online

Proverbios 24 - Biblia Revisión Chuya Qellqa 1992 – Chuya Qellqa 1992 bible

Proverbios 24

¹Mana allin runakunamantaqa ama envidiakuychu, amataq paykunawanqa hukllawakuychu.

²Sonqonkupipas paykunaqa runa wañuchiyllatam tanteanku, paykunaqa mana allinkuna ruwayllamantam rimankupas.

³Wasitaqa yachaywanmi hatarichina, allinta tantearispam cimientonta churana.

⁴Yachaywanmi cuartonkunatapas sumaq kaqkunawan chaynataq valorniyuq kaqkunawan huntachina.

⁵Yachayniyuq runaqa atiyniyuqmi, yachayniyuq runaqa ancha kallpayuqmi.

⁶Guerramanqa allinta tantearispam yaykuna, vencenapaqqa achkawanmi consejachikuna.

⁷Mana yachayniyuqpaqa yachaypas mana haypay atinam, chayraykum juezpa qayllanpipas mana ima rimaytapas atinchu.

⁸Mana allinllata ruway munaqtaqa, “mana allinllata tanteaq” nispam sutichanku.

⁹Mana yachayniyuq runaqa huchallapim yuyaymanan, burlakuq runataqa lliwmi cheqninku.

¹⁰Sasachakuy punchawpi hukmanyaruspaqa pisi kallpayuqmi rikurirunki.

¹¹Wañuypaq sentenciasqa kaqkunata libray, wañuypa patanpi kaqkunata salvay.

¹²“Ñoqaqa manam yacharqanichu” niptikipas juzgasuqnikiqa yacharunqam, imaynam kawsasqaykita qawasuqnikiqa reqsirunqam, sapakamaman ruwayninman hina pagaqmi musyarunqa.

¹³Churilláy, abejapa miskintaqa allin kasqanraykuyá mikukuy, miskillaña kasqantayá malliykuy.

¹⁴Yachaywan, yachayniyuq kaypas chayna miskim kanqa; chaykunata tariruspaykiqa allinmi kawsakunki, ima suyasqaykipas manam yanqapaqchu kanqa.

¹⁵Allin ruwaq runapa contranpiqa amayá ima mana allintapas tanteaychu, wasinmantapas amayá imantapas suwakuychu.

¹⁶Allin ruwaq runaqa qanchis kutikamaña wichispapas qanchis kutikamam hatarinqa; mana allin runakunam ichaqa sasachakuyman wichinqaku.

¹⁷Enemigoyki sasachakuypi tarikuptinqa amayá asipayaychu, urmaruptinpas amayá sonqoykipiqa kusikuychu.

¹⁸Yanqañataq chay ruwasqaykita qawaspa Tayta Dios piñakurunman, hinaspa enemigoykimanta piñakuyninta asurachinman.

¹⁹Mana allin runakunapaqqa ama piñakuychu, mana allin ruwaqkunamantaqa ama envidiakuychu.

²⁰Mana allin runaqa mana allinpim tukunqa, mana allin runaqa mechero hinam wañurunqa.

²¹Churilláy, Tayta Diosta hatunchay, reytapas kasukuytaq; mana kasukuqkunawanqa ama hukllawakuychu.

²²Paykunamanqa sasachakuymi qonqayta chayarunqa, manam pipas yachanchu Tayta Diospas chaynataq reypas castigarunantaqa.

²³Kaykunapas yachayniyuqkunapa rimarisqankunam: Juzgadopi hukkaqllanman sayapakuruyqa manam allinchu.

²⁴Huchayuq runata “mana huchayuqmi kanki” niq jueztaqa, llaqtakunam ñakanqaku, nacionkunam cheqninqaku.

²⁵Hucha ruwaqta castigaqkunam ichaqa kusisqa kaspa bendecisqa kanqaku.

²⁶Allinta contestakuq runapa rimayninqa simipi muchaykuy hinam.

²⁷Hawapi ruwanaykikunataraq ruwamuy, chakra llamkanaykitaraq llamkamuy, chaymantaña wasikitaqa ruway.

²⁸Runamasikipa contranpiqa ama yanqamantaqa testigakuychu, amataq llullakunatapas paymantaqa rimaychu;

²⁹amayá niychu: “Imaynam ruwawasqanta hinallam paytapas ruwasaq, ruwawasqanman hinam kutichipusaq”, nispaqa.

³⁰Qella runapa chakran chawpintam pasarqani, mana yuyayniyuqpa uvas chakrantam pasarqani,

³¹hinaspaymi rikururqani chay chakrapiqa kichkakunallaña wiñarusqanta, cerconkunapas tuñisqa kasqanta.

³²Chayta qawaspaymi yuyaymanarqani, rikuruspaymi kayta yacharurqani:

³³Puñunaykikamam, puñuywan aysachikunaykikamam, makikita oqllapakuykuspa puñunaykikamam,

³⁴yanqa purikuq qella runa hina wakchayay chayaramusunki, armasqa suwa hinam wakchayay hayparamusunki.