Read Biblia Revisión Chuya Qellqa 1992 – Chuya Qellqa 1992 Proverbios 27 Bible Online

Proverbios 27 - Biblia Revisión Chuya Qellqa 1992 – Chuya Qellqa 1992 bible

Proverbios 27

¹Paqarin punchaw imam ruwanaykimantaqa ama alabakuychu, paqarin punchaw imam pasakunantaqa manam yachankichu.

²Amayá kikillaykiqa alabakuychu, runamasikikuna alabasuynikim allinqa.

³Rumipapas aqopapas llasayninmantaqa mana yachayniyuq runapa piñakuyninmi aswan llasaqqa.

⁴Piñakuyqa manchakuypaqmi, rabiakuyqa tuñichikunmi, ichaqa ¿pitaq envidiakuypa qayllanpi takyanman?

⁵Uyanpi niykuymi aswan allinqa sonqollapi kuyakuymantaqa.

⁶Amigoqa kuyasuspaykim nanaypaq qaqchaykusunki, cheqnisuqnikipa muchaykususqaykim ichaqa pantachisuqniki.

⁷Saksasqa runaqa abejapa miskintapas wischupakunmi, yarqasqa runapaqmi ichaqa qatqepas miskillaña.

⁸Wasinta saqespa purikuq runaqa qesanta saqespa llutanpi pawakuq urpitu hinam.

⁹Perfumewan miski asnaq aceiteqa sonqotam kusichin, amigopa consejakuyninqa runatam kusichin.

¹⁰Amigoykitawan taytaykipa amigontaqa amayá saqeychu. Sasachakuy chayamusuptikiqa amayá wawqekipa wasinmanqa kallpaychu, karupi yachaq wawqekimantaqa vecinoykim aswan allinqa.

¹¹Churilláy, yachayniyuqyá kay, sonqollaytayá kusichiy, chaynapim insultaqniyta kutipakusaq.

¹²Yachayniyuq runaqa sasachakuyta qawaspam asurikun, mana yuyaymanayniyuqmi ichaqa sasachakuyman yaykuspa ñakarin.

¹³Mana reqsisqa runata garantizaqtaqa pachanta qechuychik, qosanta engañaq warmiman manuqtaqa pachanta prendapi hapiychik.

¹⁴Amigonta tutapayta qaparispa rimaykuq runaqa, insultaqpaq hapisqam kanqa.

¹⁵Peleollata kuyaq warmiqa para tiempopi sutukuq wasi hinam,

¹⁶chayna warmita upallachiyqa wayrata harkay hinam otaq aceiteta makiwan putqokuy hinam.

¹⁷Fierrotaqa fierrowanmi ñawchiyachina, runapas huk runawanmi yachanakun.

¹⁸Higos sachata cuidaq runaqa ruruntam mikunqa, patronninta nanachikuqqa alabasqam kanqa.

¹⁹Uyaqa yakupim imayna kasqanta qawakun, chaynam runapas sonqonpi yachakun imaynam kasqanta.

²⁰Imaynam wañuywan sepultura mana haykapipas saksanchu, chaynam runaqa ima munasqanwanpas haykapipas mana contentakunchu.

²¹Qoritawan qollqetaqa ninapi chulluchispam imaynam kasqanta yachanku, chaynam runapas alabasqa kasqanpi imaynam kasqanta qawachikun.

²²Mana yachayniyuq runapa mana yachayniyuq kayninqa trigota hina maraypi chamchasqapas manam allichakunqachu.

²³Ovejaykikunata sumaq reqsiypi kallpanchakuy, ovejaykikunata sumaqta nanachikuy,

²⁴tukuy imayuq kaypas manam unaypaqchu, coronapas manam wiñaypaqchu.

²⁵Lliwa wiñaruptinmi, pasto iklliruptinmi, orqopi pastokuna rutusqa kaptinmi,

²⁶ovejaykikunapa millwanwan pachakunki, cabrayki rantikusqaykiwanmi allpata rantinki.

²⁷Cabraykikunapa achkallaña lechenwanmi, qampas, aylluykikunapas chaynataq criadaykikunapas vidata pasankichik.