Read Biblia Revisión Chuya Qellqa 1992 – Chuya Qellqa 1992 Proverbios 4 Bible Online

Proverbios 4 - Biblia Revisión Chuya Qellqa 1992 – Chuya Qellqa 1992 bible

Proverbios 4

¹Warmakuna, taytaykichikpa yachachikuyninta uyariychik, allin tanteakuq kanaykichikpaq sumaqta uyariychik.

²Allin yachachikuytam qoykichik, yachachikuyniykunata ama qonqaychikchu.

³Ñoqapas taytayuq warmam karqani, mamaypa ancha kuyasqanmi karqani.

⁴Taytaymi yachachiwaspan kaynata niwaq: Yachachikuyniykunata sonqoykipi waqaychay, kamachikuyniykunata kasukuy, hinaspaqa unaymi kawsakunki.

⁵Yachayta maskay, allin yuyayniyuq kayta maskay, yachachikuyniykunata ama qonqaychu, amataq haykapipas sapaqchakuychu.

⁶Yachaymanta ama rakikuychu paymi waqaychasunki, yachayta kuyaptikiqa paymi waqaychasunki.

⁷Tukuy imamantapas puntataqa yachaytawan allin yuyayniyuq kaytayá maskay.

⁸Yachayta kuyaptikiqa paypas hatunchasunkim, yachayman hapipakuptikiqa ancha reqsisqatam ruwasunki,

⁹suma-sumaq adornotam churasunki, corona hinam umaykipi kanqa, nispa.

¹⁰Churilláy, rimapayasqaykunata uyariy, rimapayasqaykunata chaskikuy, hinaspaqa unay watakunatam kawsakunki.

¹¹Ñoqam chay yachay ñanninta pusasqayki, allin ñannintam purichisqayki.

¹²Purispapas manam arwitakunkichu, kallpaspapas manam mitkakunkichu.

¹³Yachayman hapipakuy ama kacharikuychu; waqaychay, payqa kawsachisuqnikim.

¹⁴Mana allin runakunapa ñanninmanqa ama yaykuychu, mana allin kawsaynintapas amataq qatipakuychu,

¹⁵paykunapa ñanninmanta ayqekuy, chaymanta rakikuspayki ñawpaqman riy.

¹⁶Paykunaqa manam puñuytapas tarinkuchu ima mana allintapas mana ruwaspankuqa, pitapas urmachinankukamam rikchankupas,

¹⁷mikuyninkupas mana allin ruwayllam, upyayninkupas runa wañuchiyllam.

¹⁸Allin runakunapa ñanninqa pacha achikyay hinam, achkimusqanman hinam suma-sumaqta kancharimun.

¹⁹Mana allin runakunapa ñanninmi ichaqa tutayay, paykunaqa manam yachankuchu imapim urmaruytapas.

²⁰Churilláy, rimapayasqaykunata uyariy, yachachikuyniykunata sumaqta uyariy,

²¹chaykunamantaqa ama sapaqchakuychu, sonqoykipi waqaychay,

²²chaykunaqa tariqninkunapaqqa kawsaymi, chaykunaqa cuerponkupaqpas hampim.

²³Tukuy ima waqaychasqaykimantapas, aswanqa sonqoykitayá waqaychay, chaymantam imayna kawsaypas lloqsimun.

²⁴Simikimanta mana allin rimaykunata wischuy, simikimanta llullakuyta wischuy.

²⁵Ñawikikunapas allin kaqta qawachun, ñawikiqa ñawpaqmanyá qawachun.

²⁶Maymi purisqaykita allinta qaway, puriynikikunaqa allinyá kachun.

²⁷Alleqmanpas nitaq ichoqmanpas ama sapaqchakuychu. Mana allin ñanmantaqa chakikita asuchiy.