Read Biblia Revisión Chuya Qellqa 1992 – Chuya Qellqa 1992 Eclesiastés 12 Bible Online

Eclesiastés 12 - Biblia Revisión Chuya Qellqa 1992 – Chuya Qellqa 1992 bible

Eclesiastés 12

¹Jovenllaraq kaynikipiyá unanchaqnikimanta yuyariy, sasachakuy punchawkuna manaraq chayaramuchkaptin, yanqañataq chayna punchawkuna chayamuptin niwaq: “Manam kusikuyta tariniñachu”, nispa.

²Intipa achkiynin manaraq tutayaruchkaptin, killapa chaskakunapa kanchaynin manaraq tutayaruchkaptin, parapa qepanta puyukuna manaraq kutiramuchkaptin.

³Chayamunqam punchaw palaciota waqaychaq runakunapas katkatatanankupaq, qari-qari runakunapas kumuykunankupaq, molinokunapas asllayaruspa wichqakurunankupaq, ventananta qawaqkunapas manaña rikunankupaq.

⁴Chay punchawpiqa hawa lawman qawaq punkukunapas wichqakurunqam, molinopa punrunyayninpas upallarunqam, urpikunapas manam takinqañachu, takikunapas manam uyarikunqañachu.

⁵Chay punchawpiqa wichayman qespiytapas manchakunkim, ñanpipas manchakuykunam kanqa, almendras sachapas waytarunqam, aqaruway urupas llasakunqam, mikuy ganaspas chinkarunqam; runaqa wiñaypaq yachananmanmi richkan, wañuruptin waqaqkunapas callekunamantam muyupayamunqaku.

⁶Unanchaqnikitayá yuyariy qollqe cadena manaraq tipiruchkaptin, qori manka manaraq pakiruchkaptin, puyñupas yakupa patanpi manaraq pakiruchkaptin, yaku hurqona waskapas manaraq tipipakuruchkaptin.

⁷Ñutu allpapas manaraq allpaman kutiykuchkaptin, espiritupas Diosman manaraq kutiruchkaptin.

⁸Predicadormi nirqa: ¡Tukuy imapas chinkaruqllam! ¡Imapas tukuruqllam! nispa.

⁹Predicadorqa, aswan yachayniyuq kasqanman hinam imam yachasqanta runakunaman yachachirqa. Sumaqta uyariykuspa, sumaqta qatipaykuspanmi achka sumaq yachachikuykunata qellqarqa.

¹⁰Predicadorqa anchatam kallpanchakurqa sumaq rimaykunata tariypi, chaynapi cheqap rimaykunata imam kaqta qellqananpaq.

¹¹Yachayniyuqkunapa rimasqanqa ñawchi puntayuq kaspikuna hinam, yachachikuqkunapa rimasqanqa clavokuna hinam, chaynam michiqpa rimariyninqa.

¹²Chaynaqa, churilláy, kay yachachikuykunatayá chaskikuy. Librokuna qellqayqa manam haykapipas tukunmankuchu, llumpay estudiaypas cuerpotam pisipachin.

¹³Kay uyarisqayki yachachikuykunapa tukupayninqa kaymi: Diosta manchakuspa kamachikuyninkunata kasukuy, chayllam runapa ruwayninqa.

¹⁴Runaqa imataña ruwaspanpas, allin kaqta otaq mana allin kaqtaña ruwaspanpas, mana pipa rikusqantaña ruwaspanpas, Diospa juzgasqanmi kanqa.