Read Biblia Revisión Chuya Qellqa 1992 – Chuya Qellqa 1992 Eclesiastés 3 Bible Online

Eclesiastés 3 - Biblia Revisión Chuya Qellqa 1992 – Chuya Qellqa 1992 bible

Eclesiastés 3

¹Kay pachapiqa imapas tiempoyuqllam, kay pachapiqa ima ruwaypas horayuqllam.

²Kanmi tiempo nacenapaq kantaqmi wañunapaqpas, kanmi tiempo plantanapaq kantaqmi plantasqata chutanapaqpas.

³Kanmi tiempo wañuchinapaq kantaqmi hampinapaqpas, kanmi tiempo tuñichinapaq kantaqmi hatarichinapaqpas.

⁴Kanmi tiempo waqanapaq kantaqmi asinapaqpas, kanmi tiempo lutokunapaq kantaqmi tusunapaqpas.

⁵Kanmi tiempo rumikunata cheqechinapaq kantaqmi huñunapaqpas, kanmi tiempo abrazanapaq kantaqmi rakinakunapaqpas.

⁶Kanmi tiempo tarinapaq kantaqmi chinkachikunapaqpas, kanmi tiempo waqaychanapaq kantaqmi wischunapaqpas.

⁷Kanmi tiempo llikinapaq kantaqmi siranapaqpas, kanmi tiempo upallanapaq kantaqmi rimanapaqpas.

⁸Kanmi tiempo kuyanapaq kantaqmi cheqninapaqpas, kanmi tiempo guerrapi kanapaq kantaqmi hawkayanapaqpas.

⁹¿Imatataq runa hurqokun afanakuspa llamkasqanmanta?

¹⁰Rikurqanitaqmi imaynatam Diosqa runakunaman imapas ruwaykuna qosqanta chaypi llamkaspa kanankupaq

¹¹Diosqa tiempollanpim imatapas sumaqta ruwarqa, hinaspam runakunaman qorqa wiñaypaq kaqkunamanta yuyaymanananpaq. Chaywanpas runapa yuyaymanayninqa manam haypayta atinmanchu qallariyninmanta tukupayninkama Diospa ruwasqankunataqa.

¹²Runapa ruwayninqa kawsayninpi kusikuspa allin kaqkunata ruwayllam,

¹³mikukuspa tomakuspa llamkasqanpa rurunwan kusikuyllam. Yachanitaqmi chaykunaqa Diospa kuyakuynin kasqanta.

¹⁴Yachanim Diospa ruwasqankunaqa wiñaypaq kasqanta, manam chaymanqa imatapas yapachwanchu nitaq qechuchwanchu. Diosmi chaynata ruwarqa runakuna payta manchakunankupaq.

¹⁵Kunan kaqkunaqa ñawpaqmantaraqmi karqaña, manaraq kaqkunapas ñam karqaña. Diosmi ñawpaq kaqkunata kaqmanta hatarichin.

¹⁶Kay pachapiqa rikurqanitaqmi kaykunatapas: Allin ruwaypa rantinpi mana allin ruwayta, allin ruwaypa rantinpi mana allin kaqkunallata.

¹⁷Chaymi sonqoypi nirqani: Allin runatapas mana allin runatapas Diosmi juzganqa; imapas tiempollanpim pasakun, ima ruwaypas tiempoyuqllam, nispay.

¹⁸Runapa kawsayninmantapas kaynatam nirqani: Diosmi runakunata pruebachkan animalkunaman rikchakuq kasqankuta yachakunankupaq.

¹⁹Runakunapas animalkunapas chay destinoyuqllam, hina chayna wañuqkamallam, chay samayllawanmi kawsankupas. Runaqa manam animalmanta maschu. ¡Chaypas waspiy hina chinkaruqllam!

²⁰Lliwmi huk hawaqllaman rinku, lliwpas allpamanta ruwasqallam, allpamantaqmi kutiykunqakupas.

²¹¿Pitaq runakunapa espiritun hanaq pachaman qespisqanta yachan, otaq animalpa espiritun allpa ukuman risqantapas?

²²Chaywanmi yachaykurqani: Runapa paqonqa allin llamkayninwan kusikuy kasqanta. Wañukuptinqa ¿pitaq qepa punchawkunaman imam pasakusqanta qawananpaq kutichimunman?