Read Biblia Revisión Chuya Qellqa 1992 – Chuya Qellqa 1992 Eclesiastés 4 Bible Online

Eclesiastés 4 - Biblia Revisión Chuya Qellqa 1992 – Chuya Qellqa 1992 bible

Eclesiastés 4

¹Kay pachata qawarispaymi rikchaqmana ñakarichinakuyta rikurqani: Ñakarichisqakunam waqanku, ichaqa manam pipas consuelaqninku kanchu; atiyniyuqkunam ñakarichinku, manam pipas consuelaqninku kanchu.

²Chayraykum nirqani: Mayna kusisqam wañukuqkunaqa, mayna llakikuypaqmi kawsaqkunaqa;

³ichaqa kay iskayninmantapas aswan allinqa kachkanku manaraq nacemuqkunam, paykunaqa manaraqmi kay pachapi tukuy mana allin ruwaykunata rikunkuraqchu, nispay.

⁴Kaytapas rikurqanim: Pipas llamkakuspa imatapas armakuptinqa runakunam envidiakunku. Chaypas yanqallam, waspiy hina chinkaruqllam.

⁵Mana yuyayniyuq runaqa makinkunata oqllapakuykuspam yarqaymanta wañun.

⁶Iskay hora llamkanamantaqa huk horata samaykuymi aswan allinqa, llumpayta llamkayqa yanqapaqmi.

⁷Huktawan qawarispaymi kay pachapi kay mana pasaq kaqkunata rikurqani:

⁸Mana wawqeyuq, mana churiyuq, mana piniyuq runatam rikurqani. Mana samaykuspam llamkan, tukuy imayuq kasqanwanpas manam contentakunchu. Payqa manam tapukunchu: “¿Pipaqtaq kusikuytapas qepancharispay kaynataña llamkani?” nispaqa. Chaypas waspiy hina chinkaruqllam.

⁹Chullalla runamantaqa iskay runam aswan allinqa, iskayninkuqa achkatam ganakunqakupas.

¹⁰Huknin wichiptinpas hukninmi hatarichinqa. Ichaqa ¡mayna llakikuypaqmi chullalla runaqa! Wichiykuptinpas manam pipas hatarichiqnin kanqachu.

¹¹Iskayqa puñuspapas qonichinakunqakum, chullallaqa ¿imaynatataq qonirinman?

¹²Chullallaqa vencerachikunmanmi, iskaymi ichaqa allinta sayanqaku; kimsa patawan kawchusqa waskaqa sasa tipiymi.

¹³Allin consejokunata mana chaskiy munaq machuyasqa reymantaqa, wakcha kaspapas yachayniyuq jovenmi aswan allinqa.

¹⁴Chay joventaqa carcelmanta lloqsimuqña kaptinpas otaq chay nacionninpi wakchaña naceruspa munaychakuyman chayaruptinpas,

¹⁵rikurqanim kay pachapi llapa runakuna chay joventa yanapasqankuta.

¹⁶Manaña yupay atina runakunam payta qatirqaku, chaywanpas qepa wiñaykunaqa manam paywanqa kusisqachu karqaku. Chaypas yanqallam, waspiy hina chinkaruqllam.