Read Biblia Revisión Chuya Qellqa 1992 – Chuya Qellqa 1992 Eclesiastés 7 Bible Online

Eclesiastés 7 - Biblia Revisión Chuya Qellqa 1992 – Chuya Qellqa 1992 bible

Eclesiastés 7

¹Miski asnaq perfumemantaqa ancha reqsisqa kaymi aswan allinqa. Nacesqanchik punchawmantaqa wañukusqanchik punchawmi aswan allinqa.

²Convido wasiman rinamantaqa wañuchikuqpa wasinman riymi aswan allinqa, runakunapa tukupayninqa wañuymi chaytam kawsaqkunaqa yuyarinanku.

³Asikuymantaqa waqaymi aswan allinqa, uyata llakichispapas ichaqa sonqotam kusichin.

⁴Yachayniyuq runaqa wañuypim yuyaymanan, mana yachayniyuq runakunam ichaqa kusikuyllapi yuyaymanan.

⁵Mana yachayniyuqkunapa alabasqan kaymantaqa yachayniyuqkunapa qaqchakuynin uyariymi aswan allinqa.

⁶Mana yachayniyuqpa asikuyninqa ninapi toqyaq kichka hinam. Chaypas waspiy hina chinkaruqllam.

⁷Yachayniyuq runa pitapas ñakarichispanqa mana yachayniyuq hinam ruwachkan, sayniyuta chaskiq runaqa sonqontam mana allinman tikrachkan.

⁸Imapas qallariymantaqa imapas tukupayninmi aswan allinqa; hatun tukuq kaymantaqa pacienciakuymi aswan allinqa.

⁹Amayá chayllaqa piñakuruychu, chaylla piñakuruyqa mana yachayniyuqkunapa ruwayninmi.

¹⁰Amayá tapukuychu imanasqam ñawpaq tiempokuna allin kasqanmantaqa; chayqa manam yachayniyuqpa tapukuyninchu.

¹¹Yachayqa kay pachapi kawsaqkunapaqqa allinpunim, sichum herenciatawan kuskata chaskisqaqa.

¹²Yachayqa qollqe hinam waqaychakun; chaywanpas yachaymi aswan allinqa, hatalliqninkunaman kawsayta qosqanrayku.

¹³Diospa ruwayninkunatayá qawariy. ¿Pitaq paypa qewisqanta derecharunman?

¹⁴Imapas allin lloqsisuptikiqa kusikuyá, sasachakuykuna chayamusuptikiyá ichaqa yuyaymanay. Kusikuytapas sasachakuytapas Diosmi unancharqa, chaynapi llapa runakunaqa qepa punchawkuna imakunam pasakunanta mana yachanankupaq.

¹⁵Yanqa kawsayniypim kaykunata rikurqani: Allin ruwaq runaqa allin ruwaq kachkaspapas chaylla wañusqanta, mana allin ruwaqñataqmi mana allin ruwaq kachkaspapas unay kawsasqanta.

¹⁶Amayá llumpay allin runaqa kaychu, nitaq llumpay yachaysapapas kaychu. Chayna kaspaqa kikillaykim sasachakuypi tarikurunki.

¹⁷Amayá llumpay mana allin ruwaqqa kaychu, nitaq llumpay mana yachayniyuqpas kaychu, ¿Imanasqataq manaraq tiempoykipi wañuwaq?

¹⁸Allin kaqta hapiynikiqa allinmi mana allin kaqta mana kachariynikipas allinmi. Diosta manchakuq runam ichaqa imapipas allin lloqsinqa.

¹⁹Llaqtapi kamachikuq chunka runakunamantapas mastaqa yachayninmi kallpanchan yachayniyuq runataqa.

²⁰Kay pachapiqa manam hukllapas kanchu allinllata ruwaspa mana haykapipas huchallikuq runaqa.

²¹Amayá lliw rimasqankutaqa kasuychu, chaynapim criadoykipa rimakususqaykitapas mana uyarinkichu.

²²Qampas allintam sonqoykipi yachakunki runamasikimanta achka kutipi rimasqaykitaqa.

²³Tukuy chaykunata yachaywan qatipaykuspam nirqani: “Yachayniyuqcha kasaq” nispay; yachaymi ichaqa ñoqamanta karupi karqa.

²⁴Tukuy ima kaqpas mana entiendey atinam, ñoqapas manam entiendeyta atinichu, cheqaptapuniqa mana pipapas haypay atinanmi.

²⁵Chaymi yachaymanta imaynam kasqanta yachaykuyta munaspay qatipayta qallaykurqani, hinaspaymi hayparurqani mana yachayniyuq kayqa mana allin kasqanta, mana tanteoyuq kayqa locopa ruwaynin kasqanta.

²⁶Kaytam tarirurqani: Warmiqa wañuymantapas aswanraq ñakarichikuq kasqanta, wichichikuq trampa hina kasqanta, sonqonpas toqlla hina kasqanta, makinkunapas cadena hina kasqanta. Diosta kasukuqkunallam chay warmimantaqa lluptiyta atinqa, huchasapa runam ichaqa chaylla wichiykunqa.

²⁷Ñoqa predicadormi tukuy imapas imaynam kasqanta yachaypi rispay, kayta yacharurqani:

²⁸¡Imam maskasqaytaqa manam tariniraqchu! Waranqa runakunamantam allin runataqa chullallata tariruni, warmikunamantam ichaqa hukllatapas mana tarinichu.

²⁹Kayllatam tariruni: Diosqa mana huchayuqtam runataqa unancharqa, runam ichaqa tukuy rikchaq sasachakuykunata maskakun.