Read Biblia Revisión Chuya Qellqa 1992 – Chuya Qellqa 1992 Eclesiastés 9 Bible Online

Eclesiastés 9 - Biblia Revisión Chuya Qellqa 1992 – Chuya Qellqa 1992 bible

Eclesiastés 9

¹Tukuy kaykunamanmi tukuy sonqoymanta qokururqani, chaynapi allin ruwaq runakunawan yachayniyuqkunapas, chaynataq ruwayninkunapas Diospa makinpi kasqanta yachanaypaq. Runaqa qayllanpi kachkaptinpas, manam yachanchu imam kuyakuy nitaq cheqnikuy kasqantapas.

²Llapa runapa tukupayninqa hukllam; allin kawsaqpaq mana allin kawsaqpaqpas, allin runapaq mana allin runapaqpas, chuyanchakuqpaq huchallikuqpaqpas, sacrificio qoqpaq mana qoqpaqpas, huchayuqpaq mana huchayuqpaqpas, juraqpaq mana juraqpaqpas.

³Llapa runapa ruwayninpim kay mana allin tarikun: Lliw runapa tukupayninqa hukllam. Runapa sonqonqa mana allinpa huntasqanmi tarikun, kawsayninpipas mana yachayniyuq kayninmi munaychakun, hinachkaspam wañuypi tukurunqa.

⁴Kawsaq runapaqqa kanraqmi ñan akllakunanpaq, wañusqa leonmantaqa kawsaq allqoraqmi aswan allinqa.

⁵Kawsaqkunaqa yachankum huk punchaw wañurunankuta, wañusqakunam ichaqa mana imatapas yachankuñachu, nitaqmi imatapas suyankuñachu; chayraykum paykunaqa qonqasqaña.

⁶Kuyakuyninkupas, cheqnikuyninkupas, envidiakuyninkupas chaypim tukurun, kawsaqkunapa kasqanpiqa manañam paykunaqa imatapas ruwanqakuñachu.

⁷Chaynaqa, tanta mikusqaykiwan, vino upyasqaykiwanyá kusikuy, ruwaynikikuna Diospa munasqanpaq hina kasqanrayku.

⁸Tukuy tiempoyá yuraq pachawan pachakuy, umaykimanpas perfumewanyá tukuy tiempo tallikuy.

⁹Kawsanayki punchawkamayá, kuyasqayki warmikiwan vidata pasaspa sapa punchaw kusikuy, Diospa kawsay qosusqaykiqa waspiy hina chinkaruqllam. Kay pachapi kawsaspa afanakusqaykipa pagonqa chayllam.

¹⁰Ruwanayki kaqtaqa, kallpanchakuspayá chaylla ruway; sepulturapiqa manañam imatapas ruwankiñachu, manañam llamkankiñachu, manañam imatapas yachankiñachu, yachaypas chaypiqa manam kanñachu.

¹¹Kay pachapiqa rikurqanitaqmi kaykunatapas: Kallpaypiqa manam llumpay kallpaqchu gananku; manam qari-qari soldadokunachu guerrapipas gananku, yachayniyuqkunapas manam tukuy tiempochu tantata tarinku, yachaysapakunapas manam lliwchu apu kanku, allin yachayniyuqkunatapas manam lliw runachu allinta chaskinku. Aswanqa sapakamapaqmi tiempo hamun ganananpaq otaq mana ganananpaqpas, ruway atinanpaq mana atinanpaqpas.

¹²Runaqa manam yachanchu imay horam tukurunantapas. Imaynam challwakuna mallawan hapirachikun, imaynam urpikuna trampaman wichiykun, chaynam runapas qonqaymanta sasachakuyman wichin.

¹³Kay pachapim hatun yachachikuyta rikurqani:

¹⁴Karqam aslla runayuq taksa llaqta. Chay llaqtapa contranpi ancha atiyniyuq rey hatariramuspanmi tropankunata muyuriqninpi churarurqa.

¹⁵Ichaqa chay llaqtapim yachayniyuq wakcha runa tarikurqa. Yachayninman hinaqa librarunmanmi karqa chay llaqtata, ichaqa wakcha kasqanraykum mana pipas paytaqa kaqpaqpas hapirqachu.

¹⁶Chayraykum ñoqa nini: Wakcha runapa yachaynin wischupakusqa kaspa mana pipa uyarisqanña kaptinpas, kallpasapa kaymantaqa yachayniyuq kaymi aswan allinqa, nispa.

¹⁷Mana yachayniyuqkunata kamachiqpa qapariyninta uyarinamantaqa, yachayniyuqpa llampu siminta uyariymi aswan allinqa.

¹⁸Guerrapaq armakunamanta aswan allinqa yachaymi; ichaqa imapipas pantaruyllam ima allin kaqtapas tuñirachin.