Read Biblia Revisión Chuya Qellqa 1992 – Chuya Qellqa 1992 Cantares 2 Bible Online

Cantares 2 - Biblia Revisión Chuya Qellqa 1992 – Chuya Qellqa 1992 bible

Cantares 2

¹Sarón lawpi rosas waytam ñoqaqa kani, qechwakunapi amanqay waytam ñoqaqa kani.

²Imaynam kichkakunapa chawpinpi amanqay wayta, chaynam kuyakusqaypas sipaskunapa chawpinpi.

³Imaynam purun sachakunapa chawpinpi manzana, chaynam kuyakusqaypas jovenkunapa chawpinpi. ¡Mayna sumaqmi llantuyninpi tiyaykuyniyqa! ¡Mayna miskim rurunpas mikuykuptiyqa!

⁴Convido wasiman pusaruwaspanmi ancha kuyakuyninwan huntaykuwarqa.

⁵Kuyakuymantam onqosqa kachkani, pasasmanta tortillawanyá kallpanchaykuwaychik, manzanakunawanyá valorchaykuwaychik.

⁶Ichoq brazonpiyá umay sawnakuykuchun, alleq brazonwanñataqyá abrazaykuwachun.

⁷Jerusalenpi sipaskuna, luwichukunaraykuyá, tarukakunaraykuyá, ancha kuyakusqayta ama rikchachinaykichikpaq juraychik. Kikinmanta rikcharinankamayá hina puñukuchun.

⁸¡Kuyakusqaymi hamuchkanña! ¡voznintam uyarichkaniña! Orqokunapa hawantam pawamuchkan, moqokunapa hawantam kallpamuchkan.

⁹Kuyakusqayqa luwichu hinam, kuyakusqayqa uña luwichucha kaqchallam. Qawariychik, waqaya perqanchikpa qepanpi sayaspan ventanankunata qawamuchkan, perqa uchkunkunata wateqamuchkan.

¹⁰Kuyay yanaymi niwarqa: Ancha kuyakusqalláy hatariy, sumaq warmicha hakuchikña.

¹¹Poqoy tiempom pasarunña, parapas usiaramuspam ripukunña.

¹²Campopi waytakunam iklliramunña, takinapaq tiempokunam chayaramunña; qoqñukunapa waqayninpas llaqtanchikpiqa ñam uyarikuchkanña.

¹³Higospa rurunkunapas poqorunñam, uvaspa sisanpas miskillatañam asnarichkan. Kuyakusqalláy hatariy, sumaq warmicha hakuchikña, nispa.

¹⁴Mana qespiy atina orqokunapi pakakuq urpichalláy, qaqapa raqrankunapi qesachakuq urpichalláy, uyachaykitayá rikuykachiway, rimaychaykitayá uyariykachiway; ¡simichaykiqa miskillañam! ¡uyachaykipas kuyayllapaqñam!

¹⁵Atoqkunatayá hapiramuychik, sisachkaq uvas huertaykuta chaqopaq uña atoqkunatayá hapiramuychik.

¹⁶Kuyaqniyqa ñoqapam, ñoqapas paypam kani, payqa rosas chawpikunapim ovejanta michin.

¹⁷Tutayay pasaptin achikyamusqanman hinayá kuyasqalláy kutikamuy, luwichu hinayá, uña tarukacha hinayá qachya orqonkunata kutikamuy.