Read Biblia Revisión Chuya Qellqa 1992 – Chuya Qellqa 1992 Cantares 4 Bible Online

Cantares 4 - Biblia Revisión Chuya Qellqa 1992 – Chuya Qellqa 1992 bible

Cantares 4

¹¡Kuyakusqalláy, mayna kuyayllapaqmi qamqa kanki! ¡Llumpay kuyayllapaqmi qamqa kanki! Ñawikikunapas veloykipa qepanpi pakakuq palomakuna hinaraqmi, chukchaykipas Galaad law orqonkunapi pawaykachaq cabrakuna hinaraqmi.

²Kiruykikunapas, millwanta ruturuspa chayllaraq bañarusqa ovejakuna hinaraqmi, iskaytakama wachakuq oveja hinaraqmi; manam kanchu hukllapas qolluqqa.

³Simikipas puka qaytu kaqlla pukay-pukaymi, rimaynikipas miski taki hinaraqmi, veloykipa qepanpi uyaykikunapas iskayman partesqa granada kaqlla pukay-pukaymi.

⁴Kunkaykipas, suma-sumaq rumikunamanta Davidpa ruwachisqan torre hinaraqmi; chaypim waranqa escudokuna warkurayachkan, chay escudokunaqa, qari-qari soldadokunapa guerrapi peleanan escudokunam.

⁵Ñuñuykikunapas paris luwichukuna kaqllam, amanqay waytakunapa chawpinpi mikuq luwichukuna hinam.

⁶Pacha achikyamuchkaptinmi, manaraq inti qespimuchkaptinmi, mirrapa kasqan monteman risaq, inciensopa kasqan moqoman pasasaq.

⁷Kuyakusqalláy ¡mayna kuyayllapaqmi kanki! manam qampiqa imapas mana allinqa kanchu.

⁸Warma yanachalláy, Líbano orqomantayá uraykusunchik, Líbano orqomantayá kuskanchik uraykusun. Amana sutiyuq orqopa puntanmantayá qawariy, Senir orqomantayá, Hermón orqomantayá qawariy; leonkunapa, leopardokunapa uchkunmantayá qawariy.

⁹Kuyakusqalláy, sonqoytam suwaruwanki, huk qawariyllawanmi sonqoyta suwaruwanki, kunkaykipi collarnikiwanmi wataruwanki.

¹⁰¡Mayna sumaqmi kuyakuynikiqa, kuyakusqalláy! kuyakuynikiqa vinomantapas aswan miskillañam, perfumekipas miski olorkunamanta aswan miskillañam.

¹¹Warma yanachalláy, rimaynikipas abejakunapa miskin hinaraqmi, qalluykipa ukunpipas lechewan abejapa miskinmi kachkan. Pachaykikunapa asnariyninpas Líbano orqo hinaraqmi asnarimun.

¹²Warma yanachalláy, qamqa kanki: Cercosqa huertam, wichqasqa qocham, pakasqa pukyum.

¹³Qamqa kanki miski ruruq granadakunapa ikllirinan huertam, azafrán waytapa, nardo waytapa wiñanan huertam,

¹⁴nardo waytapa, azafrán waytapa, miski asnaq cañapa, canelapa, incienso sachakunapa, mirra sachakunapa, áloe sachakunapa, miski asnaq sachakunapa tarikunan huertam.

¹⁵Qamqa kanki: Huertakunapa paqarinanmi, kawsaq yakukunapa paqarinanmi, Líbano orqomanta uraykamuq yakum.

¹⁶Hanay lawmanta pukumuq wayra ¡hatariy! uray lawmanta pukumuq wayra ¡kallpamuy! Miskillaña asnaynikichikta huertaypi pukuriychik. Kuyakusqalláy, huertaykimanyá hamukuy, miskillaña rurunkunatayá mikuykuy.