Read Biblia Revisión Chuya Qellqa 1992 – Chuya Qellqa 1992 Cantares 5 Bible Online

Cantares 5 - Biblia Revisión Chuya Qellqa 1992 – Chuya Qellqa 1992 bible

Cantares 5

¹Warma yanachalláy, huertaypiñam kachkani, mirraytawan miski asnaq qoraykunatam pallaruniña, abejaypa miskintam mikuruniña, vinoytawan lecheytapas tomaruniñam. Kuyasqallaykuna mikukuychik, munasqaykichiktayá tomakuychik.

²Puñuptiypas sonqoymi ichaqa rikcharqa, kuyay yanaymi punkumanta qayakamuspan nimuwarqa: “Warma yanachalláy, sumaq urpichalláy punkuykita kichaykamuway, umaymi sullapa nuyusqan kachkan, chukchaykunamantapas sullam suturichkan”, nispa.

³Chaymi nirqani: Pachaytam chustukuruniña ¿kasqallanchu pachakusaq? Chakiykunatam mayllakuruniña, ¿yapamantachu qachachasaq? nispay.

⁴Punkupa kaklluntam kuyay yanay makinta haywarimurqa, chaymi sonqoypas ras nirqaraq.

⁵Hatarispaymi kuyay yanay yaykumunanpaq punkuta kichaykurqani, makiykunamantapas mirram suturirqa, dedoykunamantapas mirram punkupa aldabanman suturirqa.

⁶Kuyay yanayman punkuta kichaykuptiyqa manañam chaypiñachu kasqa, pasakusqañam, rimasqanpa qepantam almaypas pasakurqa. Maskaspaypas manañam tarirqanichu, qayaptiypas manañam contestamuwarqachu.

⁷Llaqta waqaychaq guardiakunam tariruwaspa maqaparuwaspanku heridaruwarqaku, wankukusqay mantonniytapas qechuruwarqakum.

⁸Jerusalenpi sipaskuna, kuyay yanayta tariruspaqa, ama hina kaspa kuyakuymanta onqosqayta willaykapullawaychik.

⁹Llapallan warmikunamanta aswan kuyapa warmicha, ¿imapitaq kuyay-yanayki wakin qarikunamanta aswan allin? ¿Imapitaq kuyay-yanayki wakin qarikunata masyan chaynataña niwanaykikupaq?

¹⁰Kuyay yanayqa kuyayllapaq puka uyacham, payqa waranqantin qarikunapa chawpinpipas suti reqsiyllam.

¹¹Umanpas qorim, chukchanpas qaspam chiwillo hina yanay-yanaymi.

¹²Ñawinkunapas, lechepi bañakuruspa kallpaq yakupa patanpi tiyaq palomakuna hinam.

¹³Uyankunapas miski asnaq sachakunawan miski asnaq waytakunawan huntasqa huerta kaqllam. Siminpas mirrata suturiq wayta rosas hinam.

¹⁴Makinkunapas topacio rumikunawan adornasqa qori anillom, cuerponpas marfil zafiro rumikunawan adornasqam.

¹⁵Chakinkunapas qoripi sapinchasqa mármol rumim, rikchayninpas Líbano orqopi cedrokuna kaqllam.

¹⁶Siminpas miskillañam, payqa kuyaychallapaqmi Jerusalenpi sipaskuna, kuyay yanayqa chaynam.