Read Biblia Revisión Chuya Qellqa 1992 – Chuya Qellqa 1992 Cantares 7 Bible Online

Cantares 7 - Biblia Revisión Chuya Qellqa 1992 – Chuya Qellqa 1992 bible

Cantares 7

¹Kamachikuqpa warmi churin, ¡mayna kuyayllapaqmi usutaykipi chakikikunapas! Weqawnikipa muyuriqninpas alhaja ruwaqpa labrasqan alhaja hinaraqmi.

²Puputikipas vinowan huntasqa pukru plato hinam, wiksaykipas amanqaypa chawpinpi montosqa trigo hinam.

³Ñuñuykikunapas, paris luwichukuna hinam.

⁴Kunkaykipas, marfilmanta ruwasqa torre hinam; ñawikikunapas, Hesbón llaqtapi Bat-rabimpa punkunpi iskay estanquekuna hinam. Sinqaykipas, Damasco llaqtaman qawaq Líbano lawpi torre hinam.

⁵Umaykipas, Carmelo orqo hinam, chukchaykipas, puka qaytukuna hinam, qaspa chukchachaykipa chawpinpim huk rey preso tarikun.

⁶Kuyakusqalláy, ¡Mayna suma-sumaqmi kanki! ¡Mayna kuyayllapaqmi kanki!

⁷Sayaynikipas palmera sacha hinam, ñuñuykikunapas sarta uvas hinam.

⁸Ñoqam nirqani: “Palmeraman qespiruspayá rurunta pallakurursaq”, nispay. Ñuñuykikunayá sarta uvas hina kachun, samaynikipas manzanakuna hinayá asnarichun.

⁹Simikipas allin vino hinayá kachun. Vinoyá kuyay yanayman kallpaykuchun, siminpiyá kirunkunapa chawpinta pasaykuchun.

¹⁰Ñoqaqa kuyay yanaypam kani, kuyawasqanraykum maskawan.

¹¹Kuyay yanalláy hamuy, campoman hakuchik, alheña waytakunapa chawpinpi puñukamusun.

¹²Tutapaytañataq, uvas chakraman rispa ikllimusqanta otaq mana ikllimusqantapas qawaramusun; waytakuna sisasqanta, granadakuna sisasqanta qawaramusun. Chaypim kuyakuyniyta qosqayki.

¹³Mandrágoras plantakunapas miskillatañam asnarichkan, punkunchikpiqa tukuy rikchaq frutakunam kakuchkan, chaykunatam kuyakusqalláy qampaq pallapurqayki.