Read Biblia Revisión Chuya Qellqa 1992 – Chuya Qellqa 1992 Isaías 11 Bible Online

Isaías 11 - Biblia Revisión Chuya Qellqa 1992 – Chuya Qellqa 1992 bible

Isaías 11

¹ Isaipa takarpunmantam huk kaspi ikllimunqa, sapinmantam ikllipan wiñamunqa.

²Paymanmi Espiritunwan Tayta Dios huntaykunqa: Yuyayniyuq chaynataq yachayniyuq Espiritunwan, atiyniyuq chaynataq allin consejakuq Espiritunwan, yachayniyuq chaynataq Diosta kasukuq Espiritunwan.

³Payqa Tayta Diosta kasukuypim kusikunqa. Manam qawasqanman hinallachu pitapas juzganqa, nitaqmi uyarisqanman hinallachu pitapas sentencianqa.

⁴Wakchakunatam imam derechonkuman hina juzganqa, kay pachapi wakchakunatam Diospa munasqanman hina nanachikunqa, rimayninwanmi kaspiwan hina mana allin runata ñakarichinqa, siminmanta lloqsimuq atiyninwanmi mana allin ruwaqkunata wañuchinqa.

⁵Allinkuna ruwayninmi kanqa wasan watakun hina, mana pantaq kayninmi kanqa weqaw watakun hina.

⁶Hinaptinmi atoqwan malta carneropas hawkaña kawsanqaku, leonwan uña cabrapas kuskañam waqtapanqaku, leonwan malta toropas kuskañam wiñanqaku, uña warmapa michisqanñam kanqaku.

⁷Vacawan ukumarim kuskankuña pastota mikunqaku, uñankupas kuskañam waqtapanqaku, leonkunapas torokuna hinam pastotaña mikunqaku.

⁸Cobra sutiyuq maqta urupa uchkunpipas ñuñuq wawam pukllanqa, víbora sutiyuq maqta urupa uchkunmanpas chayraq anukasqa wawam makinwan tuqpinqa.

⁹ Sapaqchasqay lliw orqopiqa manañam pipas mana allintaqa ruwanqachu. Imaynam lamar qochata yaku pasaypaqta pampaykun, chaynam Tayta Diospa reqsichikuyninpas kay pachata pampaykunqa.

¹⁰Sachapa sapin ikllimuq hinam chay tiempopi Isaipa mirayninmanta rikurimunqa, nacionkunapaqmi bandera hina kanqa, llapallan nacionkunapi runakunam payta maskanqaku, samasqan sitiopas kancharinqam.

¹¹Chay tiempokunapim, puchuq runankunata reclamananpaq Tayta Dios huktawan makinta hoqarinqa, hinaspam Asiriamanta, Egiptomanta, Patrosmanta, Cusmanta, Sinarmanta, Hamatmanta, Elam lawmanta, lamar qochapa patanpi kaq nacionkunamanta huñumunqa.

¹²Banderatam nacionkunapaq sayachinqa, huklaw nacionkunaman apasqa kasqankumantam Israel runakunata huñumunqa. Judá nacionmanta cheqechisqakunatam lliw kay allpa pachapa patanmanta huñumunqa.

¹³Efraín castapa envidiakuq kayninpas chinkarunqañam, Judá nacionta cheqniqkunapas tukurunqañam. Efraín castapas manañam Judá castata envidiakunqañachu. Judá castapas manañam Efraín castata ñakarichinqañachu.

¹⁴Aswanqa kuskankuñam intipa seqaykunan lawman kallpaspa filisteokunata qepanmanta atacanqaku, intipa qespimunan lawpi nacionkunapa kapuqninkutam qechumunqaku. Paykunam sirvichikunqaku Edomitakunawan, Moabitakunawan. Amonitakunapiñataqmi munaychakunqaku.

¹⁵Egipto lawpi lamar qochapa partentam chakichinqa, Atiyninwanmi rupachkaq wayrata Eufrates mayuman pukuchinqa, chay mayutam qanchis kallmaman rakirunqa, runakunapas usutankuta manaña chutukuspam chimpanqaku.

¹⁶Imaynam Israel castakuna Egipto nacionmanta lloqsimuptinku hatun ñan karqa, chaynam hatun ñan kanqa Asiria nacionpi puchuqkuna kutimunankupaqpas.