Read Biblia Revisión Chuya Qellqa 1992 – Chuya Qellqa 1992 Isaías 2 Bible Online

Isaías 2 - Biblia Revisión Chuya Qellqa 1992 – Chuya Qellqa 1992 bible

Isaías 2

¹Diosmi qawachirqa Amospa churin Isaiasman Judá nacionpas, Jerusalenpas hamuq punchawkunapi imaynam kananmanta.

²Tukupay tiempokunapim Tayta Diospa templonpa kasqan orqo, wakin orqokunamantapas aswan hatunraq kanqa. Chaymanmi llapallan nacionkuna hamunqaku.

³Achka nacionkunamantam nana-nanaq runakuna hamuspanku kaynata ninqaku: “Tayta Diospa orqonman hamuychik, Jacobpa Diosninpa templonman hakuchik, paymi allin kawsakuyta yachachiwasun, munasqanman hina purinapaq”. Sionmantam Diospa kamachikuynin lloqsimunqa, Jerusalenmantam Diospa yachachikuynin lloqsimunqa.

⁴Diosmi nacionkunata juzganqa, paymi llapa llaqtakunapa cheqninakuyninkuta allichanqa. Chaynapim espadankutapas rejakunamanña tikranqaku, lanzankutapas rutunakunamanñam tikranqaku. Manañam nacionpurapas wañuchinakunqakuñachu, guerrapaqpas manañam yachachinakunqakuñachu.

⁵Jacobpa mirayninkuna hakuchik, Tayta Diospa kanchayninpiña purisunchik.

⁶Diosnilláy, runaykikunatam saqerunki, Jacobpa mirayninkunatam saqerunki. Intipa lloqsimunan lawpi layqakunapa huntasqan kasqanrayku, Filistea llaqta hina qatipaqkunapa huntasqan kasqanrayku, huklaw llaqtayuq runakunawan hukllawakurusqankurayku.

⁷Kay nacionqa qori-qollqewan huntasqam kachkan, llapa kapuqninkupas mana yupay atiymi. Kay nacionqa caballokunawan huntasqam kachkan, carretankunapas mana yupay atiymi.

⁸Makinkuwan ruwakusqanku idolokunapa huntaykusqanmi allpankupas kachkan, chaykunapa ñawpaqninpim qonqorakunku.

⁹Kayna penqaypim runakuna tarikun, kayna mana allintam ruwarunku, paykunataqa ama pampachayñachu.

¹⁰Llapa runakuna, Tayta Diospa mancharikuypaq qayllanmanta qaqakunapi pakakamuychik, allpamanpas pakakuq ustuychik. Tayta Diospa hatun kanchariyninmanta pakakuychik.

¹¹Hatun tukuq runakunapas uchuychasqam kanqaku, hatunchakuqkunapas kumuykachisqam kanqaku. Chay tiempopiqa Tayta Diosllañam hatunchasqa kanqa.

¹²Tukuy Atiyniyuq Tayta Diospa punchawninmi hamuchkan, hatun tukuqkunata uchuychananpaq, hatunchakuqkunata tuñichinanpaq;

¹³chaynatam ruwanqa Líbano orqopi cedro sachakuna hinaña, Basán lawpi encina sachakuna hinaña kaptinkupas,

¹⁴moqokuna hina, orqokuna hina altoy-altoyña kaptinkupas,

¹⁵hatun torrekuna hinaña kaptinkupas, qaqay-qaqay perqa hinaña kaptinkupas,

¹⁶Tarsis lawpi barcokuna hinaña kaptinkupas, sumaq kuyayllapaq barcokuna hinaña kaptinkupas.

¹⁷Hatun tukuq runakunam uchuychasqa kanqaku, hatunchakuq runakunam tuñichisqa kanqaku. Chay tiempopiqa Tayta Diosllañam hatunchasqa kanqa.

¹⁸Idolokunataqa pasaypaqtam chinkachinqa.

¹⁹Runakunam Tayta Diospa mancharikuypaq qayllanmanta machaykunapi, allpa uchkukunapi pakakunqaku. Diospa piñakuyninmantam lluptinqaku, Diospa chuyay-chuyay qayllanmantam ayqenqaku.

²⁰Chay punchawpim llapa runakunaqa, yupaychanankupaq qorimanta qollqemanta ruwakusqanku idolonkunata wischunqaku. Masukunapa ukuchakunapa kasqanmanmi chaykunata wischunqaku.

²¹Kay pachata ñakarichinanpaq Tayta Dios rikurimuptinmi mancharikuypaq qayllanmanta runakuna pakakunqaku, Diospa hatun kayninpa kanchariyninmantam pakakunqaku; qaqapa raqrankunamanmi yaykunqaku, orqopi machaykunamanmi ustunqaku.

²²Mana valeq runapiqa ama hapipakuychikchu, runapa kawsayninqa huk samay hinallam.