Read Biblia Revisión Chuya Qellqa 1992 – Chuya Qellqa 1992 Isaías 22 Bible Online

Isaías 22 - Biblia Revisión Chuya Qellqa 1992 – Chuya Qellqa 1992 bible

Isaías 22

¹Revelación chaskina qechwapa contranpim Isaías kaynata nirqa: ¿Imanarusunkichiktaq, imaynanpitaq wasi hawanman lliw qespirunkichik?

²¡Yaw, chaqwakuypa huntasqan llaqta, kusikuyllapiña kawsaq llaqta! Runaykikunaqa manam espadapichu nitaqmi guerrapichu wañurqaku.

³Kamachiqnikikunapas flechamanta lluptichkaspankum preso wichiykurqaku, qamkuna ukupi allinnin qarikunapas karuman ayqechkaspankum lliw hapirachikurqaku.

⁴Chaymi nirqani: Ñoqamanta anchuychik, llaqtayraykum sinchita waqachkani, ama consuelawaychikchu.

⁵Tukuy Atiyniyuq Tayta Diosmi munarqa, revelación chaskina qechwaman kayna ñakariy chaqwa punchaw hamunanta, llaqtapa murallankunata tuñichiptinku orqokunapi uyarikunankama qaparinankuta.

⁶Elam tropakunam flechankuta hapiykunku, carretankumanmi qespirunku, caballonkumanmi sillakuykunku. Kir lawpi tropakunam escudonkuta hapiykunku.

⁷Kuyayllapaq qechwaykikunam carretakunapa huntasqan rikurirun, sillada tropakunam llaqtapa punkullanpiña kachkanku.

⁸Judá nacionpa harkachikunanmi tuñirun. Chay punchawmi, monte wasipi pakasqa armakunata qawarqankichik.

⁹Rey “Davidpa Llaqtanpi” murallakuna raqrallaña kasqantapas rikurqankichikmi, uray law estanquepi yakutapas qocharachirqankichikmi.

¹⁰Jerusalén llaqtapi wasikunatapas yupaspam tuñichirqankichik, chaykunawan llaqta muyuriq perqakunata allichanaykichikpaq.

¹¹Iskay murallakunapa chawpinpim estanqueta ruwarqankichik, chaytaqa ruwarqankichik ñawpaq estanquemanta hamuq yaku qochananpaqmi. Chaywanpas Diostaqa manam kaqpaqpas hapirqankichikchu, nitaqmi ñawpaqmantaraq tanteaq kasqantapas qawarqankichikchu.

¹²Chayraykum Tukuy Atiyniyuq Tayta Dios chay punchawpi qayasurqankichik, umaykichikta rutukuruspa luto pachawan pachakuspa waqanaykichikpaq.

¹³Ichaqa kusikuyllawanñam fiestakunataraq ruwakunkichik, torokunatawan carnerokunata nakakuspam aycha mikukuypi hinaspa vino upyakuypi kakunkichik. Chaywanpas ninkichikraqmi: “Mikukusun, upyakusun, paqarinmi wañukusun” nisparaq.

¹⁴Tukuy Atiyniyuq Tayta Diosmi rinrillaypi kaynata niykuwarqa: Kay mana allin ruwasqaykichikmantaqa manapunim pampachasqaykichikchu, huchaykichikpim wañunkichikpas, nispa. Tukuy Atiyniyuq Tayta Diosmi chaynata nin.

¹⁵Tukuy Atiyniyuq Tayta Diosmi kaynata niwarqa: Palacioman rispa mayordomo Sebnata kaynata nimuy:

¹⁶¿Imatataq kaypi ruwachkanki? ¿Pitataq mañakurqanki sepulturaykita kaypi uchkukunaykipaq? ¿Pitaq nisurqanki kay qaqa uchkupi waqtapanaykipaq?

¹⁷Diosqa imatapas wischuchkaq hinaraqmi karuman wischurusunki, kallpasapa runa hinaraqmi yusuysigota wikaparusunki.

¹⁸Wankusqa kururta hina karupi hatun llaqtakama chamqarusuptikim chaypi wañumunki, alabakunayki carretakunapas chaypim tukunqa, patronnikipa ayllunpaqmi hatun penqay kanki.

¹⁹Maymi kasqaykimantam hurqorusqayki, maymi llamkasqaykimantam qarqorusqayki.

²⁰Chay punchawmi qayamusaq Hilciaspa churin serviqniy Eliaquimta.

²¹Paytam pachaykiwan pachachispa chumpikiwanñataq weqawninta watasaq, paytañam churasaq qampa rantikipi kamachikunanpaq. Chaynapim Jerusalenpi yachaqkunapaq hinaspa Judá runakunapaq taytanku hina kanqa.

²²Davidpa wasinpa llaventa hapiykachiptiymi, paypa kichasqantaqa mana pipas wichqanqachu, wichqasqantaqa manam pipas kichayta atinqachu.

²³Payraykum taytanpa ayllun hatunchasqa kanqa. Ñoqam perqapi estaca takasqata hina takyachisaq, chaymi mana kuyuriq kanqa.

²⁴Paymanmi taytanpa hinaspa ayllunkunapa llapa ima kapuqnintapas, taksanmanta hatunninkama warkunqaku.

²⁵Tukuy Atiyniyuq Tayta Diosmi nin: Chay tiempopim perqaman takasqa estaca chutakaramunqa, pakikuruspam wichiykamunqa, hinaptinmi llapallan chaypi warkusqanku kaqkuna lliw ñutukurunqa, Tayta Diosmi chaynata nin.