Read Biblia Revisión Chuya Qellqa 1992 – Chuya Qellqa 1992 Isaías 23 Bible Online

Isaías 23 - Biblia Revisión Chuya Qellqa 1992 – Chuya Qellqa 1992 bible

Isaías 23

¹Tiro llaqtapa contranpim Isaías kaynata nirqa: Tarsispa barconkunapi llamkaqkuna waqaychik, Tiro llaqtam pasaypaq tuñichisqa kachkan, mayman yaykunapaqpas manañam wasipas kanñachu, [4]Chipre lawmanta hamuqkunam chaynata willakunku.

²Tiro llaqtapi yachaqkuna, Sidón llaqtapi negociantekuna upallaychik. Barcoykikunam lamar qochanta rantiwan kayman chayman kallpakacharqaku.

³Nilo mayupa patanpi cosechakunata hoqarimuspankum imapas kapuqninkuta huntachikurqaku, paykunaqa huklaw nacionkunaman rantikuspam apuyarqaku.

⁴Lamar qochapa kallpan Sidón llaqta, penqarikuy. Lamar qochan nin: Manañam wachakuywan ñakarinichu, nitaqmi wachakuniñachu, Manañam warmaykunaqa qaripas warmipas kanñachu wiñachinaypaq, nispa.

⁵Tiro llaqtapa sasachakuyninta Egipto nacionpi runakuna uyarispankum, llakikuymanta waqanqaku.

⁶Lamar qochapa patanpi yachaqkuna qapariychik, Tarsis lawman ripukuychik.

⁷¿Manachum kay llaqtaykichikqa ñawpaqmantapuni kusikuyllapi karqa? Chakinkupa apasqanmi karu llaqtakunamanraq yachaq rirqaku.

⁸¿Pitaq Tiro llaqtapa contranpi kaynata tantearqa, reykunapa kanan llaqta kachkaptinpas, chaypi munaychakuqkunaña negociantekuna kachkaptinkupas, paykunamanta ancha reqsisqa negociantenkuna kachkaptinkupas?

⁹Tukuy Atiyniyuq Tayta Diosmi chaynata tantearqa, chaypi llapallan hatunchakuqkunata penqayman churananpaq, kay pachapi llapallan hatun tukuqkunata mana kaqman churananpaq.

¹⁰Tarsis lawpi runakuna, chakrapiña llamkaychik, barcokuna sayachinanku llaqtaqa manañam kanñachu.

¹¹Lamar qochapa hawanmanmi Tayta Dios makinta haywariykun, tukuy hinastinpi nacionkunatam katkatatachin, Canaán llaqta tuñichisqa kananpaqmi kamachikun.

¹²Sidón llaqtatam nirqa: Abusasqa sipas, fiestakunallapi kakuyta saqeyña. Chipre lawmanña ripuspapas, manam chaypipas hawkaqa kankichu.

¹³Caldea nacionta qawariychik, manañam kunanqa llaqtañachu. Asiria nacionmi purun animalkunapa sayanantaña ruwarunku; paykunam torrekunata ruwaruspa yaykurunku, hinaspam pasaypaqta purmarachinku; chayna kanankupaqqa kikinkum huchayuq.

¹⁴Tarsis barcokunapi runakuna allwaychik, hapipakunaykichik sitioqa purmarunmi.

¹⁵Chay punchawkunapim Tiro llaqtaqa, reypa kawsasqan watakuna hina, qanchis chunka watakama qonqasqa kanqa. Qanchis chunka watamantam Tiro llaqtaqa, chuchumika warmimanta taki hina kanqa:

¹⁶Yaw, qonqasqa chuchumika warmi, arpaykita hapispa llaqta ukupi muyurimuy, sumaqta tocaspa achka takikunata takimuy, icharaqpas qanmanta yuyarinmanku.

¹⁷Qanchis chunka wata pasaruptinmi Tiro llaqtata Tayta Dios watukunqa, chaymi kaqllamanta negociokuna ruwasqanpi chuchumikayaruspan runakunaman alquilakunqa, kay pacha nacionkunapi kamachikuqkunawanmi huchallikunqa.

¹⁸Ichaqa negociaspa ganakusqankum Tayta Diospaq sapaqchasqa kanqa, huñusqankutapas manañam waqaychanqakuñachu, aswanqa Tayta Diosta serviqkunamanña qoptinkum mikunankupaq achka mikuyta rantinqaku, pachakunankupaqmi fino pachankunata rantinqaku.