Read Biblia Revisión Chuya Qellqa 1992 – Chuya Qellqa 1992 Isaías 26 Bible Online

Isaías 26 - Biblia Revisión Chuya Qellqa 1992 – Chuya Qellqa 1992 bible

Isaías 26

¹Chay tiempopim, Judá nacionpi kay takita takinqaku: Allin takyasqa llaqtam kapuwachkanchik, salvawanakupaqmi perqakunatawan torrekunata Tayta Dios hatarirachin.

²Punkuta kichaychik, allin ruwaq runakuna yaykunanpaq, Tayta Diospi hapipakuq nación pasananpaq.

³Dios Taytalláy, qamllapi tukuy sonqonwan hapipakuspa mana iskayrayaq runatam qamqa hawkallata waqaychanki.

⁴Diosllapiyá wiña-wiñaypaq hapipakuychik, wiña-wiñaypaq waqaychaqninchik kasqanrayku.

⁵Paymi alto-altopi yachaq runakunata wichichin, hatun tukuq llaqtakunatam penqayman churan, chayna llaqtakunataqa allpatapas akunankukamaraqmi tuñirachin.

⁶Ñakarichisqa runakunawan wakchakunam paykunataqa sarunqaku.

⁷Allin ruwaq runapa ñanninqa mana pantayniyuqmi, qamqa ñannintapas aswanraqmi allichaykunki.

⁸Dios Taytallayku, kamachikuynikiman hina kawsaspam qamllapi sunita sayaniku, qanmanta yuyarispam sonqoykupi yuyaymanayta munaniku.

⁹Tutakunapas qamllapim yuyaymanani, kawsanaykamaqa tuta punchawmi maskasqayki. Allinta ruwaspa munaychakuptikim kay pachapi yachaqkunaqa allin ruwayta yachanqaku.

¹⁰Mana allin ruwaq runakunaqa llakipayaptikipas manam allin ruwaytaqa yachankuchu; kasukuq runakuna qaylla kawsaspapas hina mana allin ruwaqkunallam, Tukuy Atiyniyuq kasqaykitapas manam kaqpaqpas hapinkuchu.

¹¹Dios Taytallayku, qamqa ñakarichinaykipaqmi chaylla kachkanki, paykunam ichaqa mana musyakunkuchu, llaqtaykita llumpay kuyasqaykita qawaspam penqaypi tarikunqaku. Contraykipi kaqkuna ninawan kañasqa kachunku.

¹²Dios Taytallayku hawkallatam kawsachikuwankiku, qamllam tukuy ruwayniykutapas ruwarunki.

¹³Dios Taytallayku, sapaq runakunam munaychakuruwanku, ichaqa qamllatam Señorniykupaq reqsikuykiku.

¹⁴Paykunaqa wañurunkuñam, manañam kawsarimunqakuchu, ñakarichispaykim paykunataqa wichirachinki, manaña yuyarinankukamam chinkarachinki.

¹⁵Qanmi nacionpi runakunata mirarachinki, alabasqa kanaykipaqmi mirarachinki, allpakunapa linderonkunatam hatunyarachinki.

¹⁶Dios Taytallayku, sasachakuypi kaspaykum maskaykiku, ñakarichiwaptikikum mañakuykiku.

¹⁷Imaynam wiksayuq warmi wachakunan punchaw chayaramuptin nanaywan qaparkachasqanta hinam, ñawpaqnikipi ñoqaykupas qaparkachaniku.

¹⁸Wiksayakuruspam nanaywan wachakurqaniku, ichaqa wayrallatam wachakurqaniku, llaqtamanpas manam salvacionta apamuyta atirqanikuchu, kay pachapi yachanankupaqpas manataqmi nacenqakuchu.

¹⁹Qampi wañukuqkunam kawsarinqaku, ayaykikunam hatarimunqaku. Allpa ukunpi kaqkunam rikcharimuspa kusikuyllawanña qaparinqaku, sullata hinaraq kanchaynikita chayachiptikim wañuqkuna allpa ukumanta hatarimunqaku.

²⁰Llaqtalláy, wasikichikman yaykuychik, punkuykichikta wichqakamuspa chaypi pakakamuychik, Diospa piñakuynin pasarunankama pakakamuychik.

²¹Tayta Diosqa maypim kasqanmantam lloqsimunqa, paypa contranpi huchallikusqankuraykum kay pachapi yachaqkunata castigananpaq hamunqa; kay allpaqa manañam wañusqakunapa yawarninta pakanqañachu, wañusqakunatapas manañam pakanqañachu.