Read Biblia Revisión Chuya Qellqa 1992 – Chuya Qellqa 1992 Isaías 28 Bible Online

Isaías 28 - Biblia Revisión Chuya Qellqa 1992 – Chuya Qellqa 1992 bible

Isaías 28

¹¡Ay, Samaria llaqta imaynaraq kanqa! coronanmanta hina Efrainpa alabakunan llaqta, sinkakunapa kanan llaqta, sumaq wayta chakirusqa hina llaqta, tukuy imapa wiñanan qechwapa hanayninpi tarikuq llaqta, vinoman qokuruq runakunapa kanan llaqta.

²Tayta Diosmi hatallichkan huk kallpasapa sinchi atiyniyuq runata. Chay runaqa, runtu para hina dañakuqmi, llumpay wayra-para hinaraqmi, loco para hinaraqmi, manchakuypaq repunti lloqlla hinaraqmi. Kallpawanmi pampaman wikapanqa,

³Efraín castapa alabakunan llaqtatam sarupanqa, sinkaruspan coronanmanta hina alabakunan llaqtatam sarupanqa.

⁴Chakisqa wayta hina kachkaspapas Efrainpa alabakunan llaqtam, tukuy imapa wiñanan qechwapa hanayninpi kaq llaqtam manaraq cosecha kachkaptin, chayllaraq rikurimuq poqosqa higos hinaraq kanqa, pipas rikuqninqa chayllam hapispa mikurunqa.

⁵Chay punchawmi Tukuy Atiyniyuq Tayta Diosqa puchuq runankunapaq kancharichkaq coronanku hina kanqa, paykunapaqmi kuyayllapaq alhajanku kanqa.

⁶Cortepi juezkunamanmi allin arreglo ruwanankupaq yachayta qonqa, llaqtata nanachikuq tropakunatam kallpanchanqa.

⁷Ichaqa paykunam vinota upyasqankurayku pantarunku, poqosqa aqata upyaspam tamsakachanku. Sacerdotewan profetapas poqosqa aqawan machaspam tampikachanku, paykunaqa visión rikusqankutam qewirunku, quejapi sentenciaspam pantarunku.

⁸Mesankupas millakuypaq kutichisqankuwanmi qachallaña kachkan, manam mayninpas limpioqa kanñachu.

⁹Ñoqata kamiwaspankum ninku: ¿Pitataq yachachichkan? ¿Pitataq allin yachachikuykunata entiendechichkan? ¿Anukasqa wawakunatachu? ¿ñuñuq wawakunatachu?

¹⁰Aswanqa kay kamachikuyta yachaychik, asllatapas ruwaychik, kay kamachikuyta kasukuychik, as-asllamanta, chulla-chullallamanta, kaypi asllata, wakpi asllata, nispankuraq.

¹¹Chaynaqa, gagokunapa rimayninpim, mana yachasqanku simipim, kay llaqtataqa rimapayanqa.

¹²Paykunataqa ñawpaqmantaraqmi nirqa: Hawkayayqa kaypim kachkan, samariypas kaypim kachkan, pisipasqayá samarichun nichkaptinpas manam kasukurqakuchu.

¹³Chayraykum Tayta Dios paykunata rimapayanqa, chayllaraq leey yachaq warmachakunata hina: Kay kamachikuyta yachaychik, asllatapas ruwaychik, kay kamachikuyta kasukuychik, as-asllamanta, chulla-chullallamanta, kaypi asllata, wakpi asllata; purisqankupi wasanpa wichinankukama, heridasqa kaspa, toqllaman wichispa, preso kanankukama.

¹⁴Chaynaqa, Jerusalén llaqtapi llapa qara uya kamachikuqkuna, Tayta Diospa nisqanta uyariychik.

¹⁵Qamkunam ninkichik: “Contratotam wañuywan ruwaruniku, wañusqakunapa kasqanwanpas contratotam ruwaruniku, sasachakuy hamuspa mana haypawanankupaq; llulla rimaykunapim amparakuruniku, engaño ruwaykunapim pakakuruniku”, nispaykichik.

¹⁶Chayraykum Tayta Dios kaynata nin: Ñoqam Sión moqopi cimientopaq churani, kuyayllapaq suni takyaq akllasqa esquina rumita. Pipas chay rumipi hapipakuqqa manam hukmanyanqachu.

¹⁷Plomadawan hinam allin arreglota ruwasaq, nivelwan hinam allin kawsakuyta ruwasaq. Llullakuy amparoykichiktapas runtu param tukurunqa, pakakunaykichiktapas yakum tuyturunqa.

¹⁸Wañuywan contrato ruwasqaykichikpas yanqachasqam kanqa, wañusqakunapa kasqanwan contrato ruwasqaykichikpas manaña kaqmi kanqa; chay manchakuypaq sasachakuy hamuruspanmi sarupasunkichik.

¹⁹Tutapas punchawpas rikurimuspam, sapa kutilla rikurimuspam haypasunkichik; uyarisqaykichikta yachaykuyllapas qamkunapaqqa paqway manchakuypaqmi kanqa.

²⁰Chutaparikunallanpaqpas puñunan camapas taksallam kanqa, wankukunanpaq qatapas taksallam kanqa.

²¹ Tayta Diosmi Perazim orqopi hina hatarirunqa, Gabaón qechwapi piñakusqanta hinam piñakunqa, chaynapi mana haykapipas rikusqanku ruwayninta ruwananpaq, chaynapi mana haypay atina ruwayninta ruwananpaq.

²²Hinaptinqa amañayá burlakuychikñachu, yanqañataq watasusqaykichik astawan seqorusunkichikman; kay pachata tuñichinanpaq Tukuy Atiyniyuq Tayta Diospa tanteasqantam uyarirqani.

²³Rimasqayta sumaqta uyariychik, palabraykunata allinta uyariychik.

²⁴Tarpukuq yapuspanqa manam tukuy punchawchu yapun, nitaqmi tukuy punchawchu kurpatapas ñutun.

²⁵Aswanpas kurpata ñuturuspanmi muhuta machqen: Cominostapas eneldotapas, trigotañataqmi suyunpi tarpun. Cebadatapas maymi wiñananmanmi machqen, avenatañataqmi patankunaman machqen.

²⁶Diosninmi paytaqa imaynam tarpunanta yachachin.

²⁷Eneldotawan cominostaqa manam carretawanchu trillana, astawanpas kaspiwanmi waqtana.

²⁸Trigota erapi trillakuspaqa, manam chuyan ñutunankamachu trillana, manataqmi kutakunankamachu saruchina.

²⁹Kay yachachikuykunaqa Tukuy Atiyniyuq Tayta Diosmantam hamun, payqa admirakuypaq kaqkunatam tantean, payqa yachayninwanmi ruwayninkunata qespichin.