Read Biblia Revisión Chuya Qellqa 1992 – Chuya Qellqa 1992 Isaías 30 Bible Online

Isaías 30 - Biblia Revisión Chuya Qellqa 1992 – Chuya Qellqa 1992 bible

Isaías 30

¹Tayta Diosmi kaynata nin: ¡Imaynaraq kanqaku mana kasukuq churikuna, ruwankupas manam ñoqapa kamachisqaytachu, contratota ruwaspapas manam ñoqataqa kaqpaqpas hapiwankuñachu! Chaynata ruwaspankum aswanraq huchallikunku.

²Mana ñoqata tapuwaspankum Egipto nacionman chaylla rinku, rey Faraonpi hapipakuspam yanapakuyta maskanku.

³Aswanqa Faraonman hapipakuynikichikmi penqakuypaqña kanqa, Egiptopi hapipakuynikichikmi pantachisuqnikichik kanqa.

⁴Kamachiqnikikuna Zoán llaqtapi kaptinpas, kachasqaykichik runakuna Hanes llaqtaman chayaruptinpas,

⁵mana imapaq valeq llaqta kasqanraykum llapallanku penqaypi rikurinqaku, mana imapipas yanapaspa penqayman churaqnin llaqta kasqanrayku, nispa.

⁶Neguev lawpi animalkunamantam kaynata nin: Sasachakuypa hinaspa ñakariypa kasqan llaqtantam leonkunapa yachanan lawnintam, tukuy richkaq maqta urukunapa kasqantam, asnokunapi qori-qollqeta cargachkanku, camellokunapim kapuqninkuta apachkanku, mana imapaq valeq Egipto nacionmanmi astachkanku.

⁷Egipto nacionpa yanapakuyninqa paqway mana valeqmi, chayraykum “Manchakuypaq qaparkachaq mana imanakuq animalmi”, nispa suticharqani.

⁸Kunanyá paykunapa qayllanpi kay rikusqaykita tablapi qellqay. Libropi qellqaruptiki hamuq punchawkunapi yuyarinankupaq kachun, wiña-wiñaypaq chayna qepachun.

⁹Kay runakunaqa mana kasukuq kullukunam, iskay uya llulla miraykunam, Tayta Diospa yachachikuyninta mana uyariy munaqkunam.

¹⁰Visionta rikuq runakunatam ninku: Amaña chaypi ocupakuychikchu, nispanku. Profetakunatañataqmi ninku: Cheqap kaqkunataqa amaña willawaykuchu, willawaykuqa munasqallaykutaña, willawaykuqa aychayku kusichiqllataña, nispanku.

¹¹Chay ñanta saqeychik, allin ruwaymanta rakikuychik, amaña Israelpa Chuya Diosninwan uyapurachiwaykuchu, nispanku.

¹²Chayraykum Israelpa Chuya Diosnin kaynata nin: Nisqaykunatam qamkuna wischupakunkichik, runamasikichikta ñakarichiypi hinaspa llullakuypim hapipakunkichik, chaykuna ruwasqaykichikpim hapipakunkichik.

¹³Chayraykum mana allinkuna ruwasqaykichik tuñirunanpaq raqrasqa alto murallaman rikchakun, chay murallam qonqaymanta chaylla tuñiykamunqa.

¹⁴Wichiykamuspam puyñu hina pakikunqa, mana kuyapayarispa pakipasqam kanqa. Chaymanta puchuq kallanaqa nina sansata hoqarinallankupaqpas manam servinqachu, pozomanta yakuta wisinallankupaqpas manam valenqachu.

¹⁵Israelpa yupaychasqan Chuya Diosmi kaynata nin: Wanakuywan kutirimuspa hawkalla kaspam salvasqa kankichik, hawkalla hinaspa hapipakuq kaspaykichikmi kallpasapa kankichik, ichaqa manam kasukurqankichikchu;

¹⁶aswanraqmi qamkuna nirqankichik: “Caballokunapim ayqekusaqku”, nispa. Chaynaqa, caballokunapichá ayqenkichik. Nirqankichiktaqmi: “Utqayman kallpaq carretakunapim lluptikusaqku”, nispa. Ichaqa enemigoykichikpas aswan utqaymanraqmi qatisunkichik.

¹⁷Chullalla runapa manchachisqanmi waranqa runakuna lluptinqaku; pichqa runakunapa manchachisqanñataqmi llapallaykichik ayqenkichik, orqopa puntanpi chullalla kaspi hina kanaykichikkama, moqopi sayarachisqa bandera hina kanaykichikkama.

¹⁸Chaywanpas Tayta Diosqa llakipayarisunaykichikpaqmi suyasuchkankichik, payqa kuyakuynintam qamkunaman reqsichisunkichik. Allin arreglo ruwaqmi Tayta Diosqa. ¡Mayna kusisqam paypi suyaqkunaqa!

¹⁹Sión moqopi runakuna, Jerusalén llaqtapi yachaqkuna, manañam haykapipas waqankichikñachu. Payqa llakipayakuspa kuyapayakuqmi. Qaparispa mañakuptikichikmi uyarisunkichik.

²⁰Tayta Diosqa, ñakariyta mikuchisuspaykipas, llakikuyta tomachisuspaykipas, yachachisuqnikiqa manañam pakakunqañachu, aswanqa ñawikiwanmi qawaykunki.

²¹Hinaspapas rinrikichikwanmi uyarinki qepaykimanta kayna rimapayakuyta: Kaymi allin ñan, chayninta puriychik, amayá alleqmanpas nitaq ichoqmanpas muyuychikchu, niqta.

²²Qorimanta qollqemanta idoloykichikkunatapas millakuypaqtañam qawankichik. Chaykunataqa millakuypaq qacha latapata hinam wischunkichik, hinaspam ninkichik: Anchuy kaymanta, nispaykichik.

²³Señormi parachimunqa tarpukuynikichikman, chaynapim kawsaynikichikpas allinta qespiptin chaninninpi mikunkichik. Animalnikichiktapas chay tiempopiqa hatu-hatun echaderokunapim michinqaku.

²⁴Llamkaq toroykichikkunawan asnoykichikkunapas palawan chaynataq horquetawan wayrachisqa chuya kawsaykunatam mikunqaku.

²⁵Hatun wañuchinakuy punchawpi torrekuna tuñichisqa kaptinmi, hatun orqokunamantawan alto moqokunamantapas mayukuna paqchamunqa.

²⁶Hinaptinmi killapa achkiyninpas intipa achkiynin hinaraq kanqa, chaynataqmi intipas qanchis kuti mastaraq kancharinqa, imaynam qanchis punchawpi kanchayninta hina. Chaynam kanqa runankunapa isunta kikinpa isuchasqanta Tayta Dios wataspan hampisqan punchawpi.

²⁷Qawariychik, kikin Tayta Diosmi karumanta hamuchkan, piñakuptinmi nina hinaraq uyanpas ruparichkan, simin huntam piñakuynin kachkan, tukuy ima ruparuq nina hinaraqmi qallunpas kachkan.

²⁸Samayninpas llimpariq lloqlla hinaraqmi, kunkakama haypaq lloqlla hinaraqmi. Harnerowan suysuq hinam llapa nacionkunata ñakarichinqa, frenota siminman churaspam llaqtakunata chinkachinqa.

²⁹Qamkunam ichaqa, pascua fiestata ruwasqaykichik tutapi hina takinkichik, sonqomantam qamkunaqa kusikunkichik, qenata tocaspa Tayta Diospa orqonman richkaq hinam kusikunkichik, Israelpa amparakunan Diosman richkaq hinam kusikunkichik.

³⁰Tayta Diosmi, manchakuypaq piñakuyninwan, lenwachkaq ninawan, rayokunawan llipyakunawan, loco parawan runtu parawan, atiyniyuq siminta uyarichinqa.

³¹Tayta Diospa Chuya siminmi Asiria nacionta ñutuparunqa, varanwanmi paykunata waqtaparunqa.

³²Tayta Dios sapa kutilla varanwan waqtaptinmi tamborkunapiwan arpakunapas waqanqa. Tayta Diosmi chaqwallawanña paykunapa contranpi peleanqa.

³³Asiriapaqwan reyninpaqmi ñawpaqmantaraq ancho-ancho hinaspa uku-uku toqo allichasqa kachkan, achkallaña yantawan ratachisqa kunununuq ninam kachkan, Tayta Diospa samayninmi azufreyuq mayu hina chaypi rupanqa.