Read Biblia Revisión Chuya Qellqa 1992 – Chuya Qellqa 1992 Isaías 37 Bible Online

Isaías 37 - Biblia Revisión Chuya Qellqa 1992 – Chuya Qellqa 1992 bible

Isaías 37

¹Chayta uyariruspanmi rey Ezequías pachanta llikiparurqa, hinaspam qachqa pachawan churakuruspan Tayta Diospa templonman yaykurqa.

²Chaymantam mayordomo Eliaquimta, secretario Sebnata hinaspa yuyaq sacerdotekunata qachqa pachawan pachasqatakama, Amozpa churin profeta Isaiasman kacharqa.

³Paykunam nirqaku, Ezequiasmi kaynata nin: Kunan punchawqa ancha llakisqa, ñakarichisqa, penqayman churasqam kachkanchik. Wachakunanpaq kachkaspan manaña kallpayuq warmi hinam kachkanchik.

⁴Ichapas Tayta Dios uyarirqa Asiria reypa kamachimusqan runapa Tayta Diosta kamisqanta, allincha kanman chay rimasqanmanta Tayta Dios puchukachiptinqa. Chaynaqa, Diostayá puchuq kaqkunapaq mañakuy, nispa.

⁵Rey Ezequiaspa serviqninkuna Isaiaspaman chayaruptinkum,

⁶Isaías nirqa: Tayta Diospa nisqanta reynikichikman kaynata willamuychik: “Asiria reypa serviqninkunapa kamiwasqanwanqa ama manchakuychu.

⁷Kunanmi Asiriapa reyninta llaki noticiawan hukmanyarachisaq, hinaptinmi llaqtanman kutispa hukkaqninpa wañuchisqan kanqa”, nispa.

⁸Hinaptinmi chay kamachikuq uyarirurqa Asiria nacionpa reyninqa Laquis llaqtamanta asurikusqantaña. Kutispanmi Senaqueribta Libna llaqtayuqkunawan peleachkaqta tariykurqa.

⁹Chaypim rey Senaquerib uyarirurqa Etiopía nacionpa reynin Tirhaca contranpi hamusqanta. Chaymi rey Ezequiasman runankunata huktawan kacharqa,

¹⁰kaynata nimunankupaq: Hapipakusqayki Diosnikim nichkan: “Asiria reyqa manam Jerusalén llaqtataqa munaychakunqachu”, nispa. Llullam chayqa.

¹¹Qamqa uyarirqankim Asiria reykunapa llapa nacionkuna tuñichisqantaqa ¿Chaychu qamñataq ayqewaq?

¹²Manam Gozanta, Haranta, Resefta chaynataq Telasarpi yachaq Edén castan runakunatapas ñawpaq taytaykuna tuñichiptin diosninku librarqachu.

¹³¿Maypitaq tarikun Hamat llaqtapa, Arfad llaqtapa, Sefarvaim llaqtapa, Hena llaqtapa chaynataq Iva llaqtapa reyninkunaqa? nispa.

¹⁴Rey Ezequiasmi cartata chaskiruspan leeykurqa, hinaspam Tayta Diospa templonman apaykuspa, Diospa qayllanpi kicharayachkaqta churaykuspan,

¹⁵Tayta Diosta kaynata mañakurqa:

¹⁶Querubinkunapa chawpinpi yachaq Israelpa Tukuy Atiyniyuq Diosnin, qamllam kanki llapallan nacionkunapi munaychakuqqa. Qanmi ruwarqanki hanaq pachatapas chaynataq kay pachatapas.

¹⁷Dios Taytalláy, qawariwaspa uyariykullaway, hinaspayá rey Senaqueribpa qam kawsaq Diosta kamisusqaykita uyariykuy.

¹⁸Dios Taytalláy, cheqaptam Asiria reykunaqa llapallan nacionkunapa allpankuta purmachirqaku.

¹⁹Idolonkutapas ninamanmi wischuykurqaku, runakunapa kullumanta rumimanta ruwasqan kasqanraykum chaykunataqa chinkarachirqaku. Cheqaptapunipas chaykunaqa manam dioschu.

²⁰Kunanyá Dios Taytallayku, qamlla Dios kasqaykita kay pachapi llapallan nacionkuna reqsinankupaq rey Senaqueribpa makinmanta libraykuwayku, nispa.

²¹Hinaptinmi Amozpa churin Isaías, rey Ezequiasman kaynata nichimurqa; Israelpa yupaychasqan Tayta Diosmi kaynata nin: Asiriapa reynin Senaqueribmanta mañakuwasqaykitaqa uyariykuykim.

²²Chaynaqa, ñoqa Tayta Diosmi kaynata nini: Yaw, rey Senaquerib, Sión llaqtaqa sipas hinam qanmanta asikun, Jerusalén llaqtaqa qepaykipim umanta aywin.

²³¿Pitataq kamirqanki? ¿Pitataq ñakarqanki? ¿Pitataq kutiparqanki? ¿Pitataq hatunchakuspa qawarqanki? ¡Israelpa Chuya Diosninpa contranpim chaykunataqa ruwarqanki!

²⁴Serviqnikikunawanmi Señorta kamichirqanki, hinaspam nirqankiraq: “Nana-nanaq carroykunawanmi orqokunapa puntanman qespirusaq, Líbano orqo waqtatam qespirusaq, hatun cedro sachakunatam kuchumusaq, sumaq ciprés sachakunatam kuchurusaq, karu-karu orqonkunamanmi chayarusaq, sachankamallaña montenkunamanmi chayarusaq.

²⁵Huklaw nacionpim pozokunata toqospay yakunta tomarqani; saruspaymi Egiptopa mayunkunatapas chakichisaq”, nispa.

²⁶¿Manachu yacharqanki ñawpaqmantaraq ñoqa Dios chaykuna ruwasqayta? ¿Ñawpaq punchawkunapiraq ñoqa tanteasqayta? chaykunatam kunan ruwani qanwan, hinaptinmi murallasqa llaqtakunata tuñichispa purmachimurqanki.

²⁷Chaymi runankunapa kallpankupas manchakuymanta chinkarirqaraq, paykunaqa rikurirunku manaraq wiñayta tukuchkaspa chakiruq qorakuna hinam.

²⁸Yachanim tukuy ima ruwasqaykitapas, tukuy imapi purisqaykitapas, hinaspa ñoqapaq piñakusqaykitapas,

²⁹uyarinim ñoqapaq piñakuspa hatun simikiwan kamiwasqaykitapas, chayraykum argollata senqaykiman churaspay, frenota simikiman churaspay, maymi hamusqayki ñanninta kutichisqayki, nispa.

³⁰Chaymi rey Ezequiasta Isaías nirqa: Kaymi imam pasakunanmanta señal kanqa: Kunan watapas chaynataq hamuq watapas kikillanmanta wiñaq trigotam mikunkichik. Kimsa kaq watapiñataqmi tarpuspa cosechankichik. Uvastapas plantaspam rurunta mikunkichik.

³¹Judá llaqtapi puchuqkunam takyasqa sacha hina kanqaku, sapichakuspam allinta rurunqaku.

³²Jerusalén llaqtamantam miranqaku, lluptiqkunapas Sión llaqtamantam miranqaku. Tukuy Atiyniyuq Tayta Diospa kuyakuyninmi chaynata ruwanqa.

³³Asiriapa reyninmantam Tayta Dios kaynata nin: “Kay llaqtamanqa manam yaykumunqachu, flechankunapas manam chayamunqachu, escudontapas manam hapinqachu, allpatapas murallapa qepanmanqa manam montochinqachu.

³⁴Maymi hamusqan ñannillantam kutinqa, kay llaqtamanqa manam yaykumunqachu. Tayta Diosmi chaynata nin.

³⁵Ñoqam kay llaqtata waqaychasaq kikiyraykum chaynata ruwasaq. Serviqniy Davidta kuyasqayraykum chaynata ruwasaq”, nispa.

³⁶Chay tutam Tayta Diospa angelnin Asiria soldadokunata pachak pusaq chunka pichqayuq waranqata hina campamentollanpi wañurachirqa. Achikyaruptinmi llapallanku wañusqaña kachkasqaku.

³⁷Hinaptinmi Asiriapa reynin Senaquerib, Nínive llaqtaman kutikuspan chaypi yacharqa.

³⁸Huk punchawmi Nisroc idolonta templonpi yupaychachkarqa, hinachkaptinmi Adramelecwan Sarezer espadawan wañurachirqaku, hinaspam Ararat lawman lluptikurqaku, paykunaqa churinkunam karqaku. Chaymi rey Senaqueribpa rantinpi churin Esar-hadonña munaychakurqa.