Read Biblia Revisión Chuya Qellqa 1992 – Chuya Qellqa 1992 Isaías 40 Bible Online

Isaías 40 - Biblia Revisión Chuya Qellqa 1992 – Chuya Qellqa 1992 bible

Isaías 40

¹Yupaychasqaykichik Tayta Diosmi kaynata nin: Llaqtayta consuelaychik, runaykunata kallpanchaychik.

²Jerusalenpi runaykunata kuyakuywan rimapayaychik, huchankuta Tayta Dios pampachasqantaña, huchankurayku criado kaspa ñakariyninku tukurusqantaña, qaparispa paykunaman willaychik.

³Huk qayakuymi purunpi uyarikun kayna niq: “Tayta Diospa ñanninta allichaychik, Diosninchikpaq purunpi ñanta allichaychik.

⁴Wayqokunata pampayachiychik, orqokunatawan moqokunata pampayachiychik, qenqo ñankunata derechaychik, qachya ñankunata pampayachiychik.

⁵Hinaptinmi atiyninta Tayta Dios qawachikunqa, llapallan runakunam chayta rikunqaku”. Tayta Diosmi chaynata nin.

⁶Qayakuymi uyarikurqa kayna niq: ¡Qayaykachakuy! nispa. Hinaptinmi tapurqani: ¿Imanispaytaq qayaykachakusaq? nispa. Chaymi niwarqa: Llapa runakunaqa qora hinallam, kuyayllapaq kayninkupas wayta hinallam.

⁷Tayta Dios wayrachimuptinqa, qorapas qawirunmi, waytapas chakirunmi. Cheqaptapunipas runakunaqa qora hinallam.

⁸Qoraqa chakiruqllam, waytapas wichiruqllam, Diosninchikpa palabranmi ichaqa wiña-wiñaypaq takyan.

⁹Sionpi yachaqkuna, orqoman qespispa qapariychik; Jerusalenpi yachaqkuna, kay sumaq willakuyta hatunmanta qaparispa willakuychik; ama manchakuspa Judá nacionpi llaqtakunaman kaynata willakuychik: ¡Diosninchikqa kaypim kachkan! nispa.

¹⁰Tayta Diosqa atiywanmi hamuchkan, atiyninwanmi tukuy imapi munaychakuchkan, libramusqan llaqtantam pusamuchkan.

¹¹Ovejankunata michinanpaqmi hamunqa, uñachankunatam marqayninpi apanqa, chayllaraq wachakuq ovejakunatam allillamanta pusanqa.

¹²¿Pitaq lamarpi yakukunata putqoyninwan tupurqa? ¿Pitaq hanaq pachata cuartanwan tupurqa? ¿Pitaq kay pachapi ñutu allpata tupurqa? ¿Pitaq orqokunata romananwan pesarqa? ¿Pitaq moqokunata balanzanwan pesarqa?

¹³¿Pitaq Tayta Diospa yuyaymanayninta yachanman? ¿Pitaq payta umacharqa?

¹⁴¿Diosqa pimantataq yachayta mañakurqa? ¿Pitaq mana pimanpas sayapakuspa allin arreglo ruwayta yachachirqa? ¿Pitaq payman yachayta qorqa? ¿Pitaq yachayniyuq kananpaq yachayta reqsichirqa?

¹⁵Nacionkunapas paypaqqa huk sutuy yaku hinallam, balanzapi ñutu allpa hinallam, Lamar qochapi islakunapas ñutu allpa hinallam.

¹⁶Líbano montekunapi animalkunapas manam kamanmanchu payman ofrecenapaqqa, Líbano montekunapi sachakunapas manam kamanmanchu ofrenda kañapunapaqqa.

¹⁷Llapallan nacionkunapas mana kaq hinallam paypa qayllanpiqa, lliw nacionkunapas mana ima valeqmi paypa qayllanpiqa.

¹⁸¿Piwantaq Tayta Diosta rikchanachiwaqchik? ¿Imaman rikchakuqtataq payta ruwawaqchik?

¹⁹Idolota ruwaqmi metalta chulluchispa idolota ruwarun, alhajakuna ruwaqñataqmi qoriwan llusirun; qollqeta chulluchispam cadenata ruwarun.

²⁰Wakcha runañataqmi mana ismuq kulluta akllarun, hinaspam allin llaqllaqwan mana kuyuriq idolota ruwarachikun.

²¹¿Manachu yacharqankichik? ¿Manachu uyarirqankichik? ¿Manachu qallariyninmantapuni pipas willasurqankichik? ¿Manachu kay pacha unanchasqa kasqanmantaraq yachachisurqankichik?

²²Tayta Diosqa kay pachapa muyuriq patanpim tiyachkan, runakunapas aqaruwaykuna hinallam paypa qayllanpiqa; cielokunatapas tolderata hinallam payqa mastarin, yachanapaq sayachisqa carpata hina.

²³Payqa mana kaqmanmi churan hatun tukuq runakunataqa, kay pachapi kamachikuqkunatapas mana imapaq valeqtam ruwan.

²⁴Paykunaqa chayraq wiñamuq sachakuna hinam, tarpuruptinku chayllaraq sapichakuchkaq hinam. Wayra pukurimuptinmi lliw chakirunku, sinchi wayrapa apasqan qopa hinallam paykunaqa chinkarunku.

²⁵Chuya Diosmi kaynata tapukun: ¿Piwantaq rikchanachiwankichikman? ¿Pitaq ñoqaman rikchakuq kanman? nispa.

²⁶Hanaq pachata qawariychik, ¿Pitaq wakkunata unancharqa? Chaskakunata tropata hina yupaspa hurqomuqmi, sapakamata sutinmanta qayaqmi, chulla chaskapas mana chinkachiqmi. Paypaqqa atiyninpas kallpanpas ancha hatunmi.

²⁷Jacobpa miraynin Israel llaqta, ¿Imanasqataq quejakuspa kaynata rimapakunki: Tayta Diosqa manam imayna kawsasqaytapas qawarinchu, nitaqmi ñoqamantaqa nanachikunchu, nispayki?

²⁸¿Manachu yacharqanki? ¿Manachu uyarirqanki? Tayta Diosqa wiña-wiñaypaq kawsaq Diosmi, payqa kay pachata unanchaqmi, manam hukmanyanchu nitaqmi pisipanchu, yachayninpas mana haypay atinam.

²⁹Paymi pisipasqakunata kallpanchan, pisi kallpayuqkunamanmi kallpata yapan.

³⁰Jovenkunam pisipaspa wañunayanku, kallpasapakunam hukmanyaspa wichinku.

³¹Tayta Diosman hapipakuqkunam ichaqa musoq kallpayuq kanqaku, anka hinaraqmi pawarinqaku, kallpaspankupas manam saykunqakuchu, purispankupas manam pisipanqakuchu.