Read Biblia Revisión Chuya Qellqa 1992 – Chuya Qellqa 1992 Isaías 45 Bible Online

Isaías 45 - Biblia Revisión Chuya Qellqa 1992 – Chuya Qellqa 1992 bible

Isaías 45

¹Tayta Diosmi Cirota rey kananpaq sapaqcharqa, nacionkunapi munaychakuspa reykunata tuñichinanpaqmi makinmanta pusamurqa. Tayta Diosmi llaqtakunapa punkunkunata Ciropa ñawpaqninpi kichanqa, manaña pipas wichqayta atinankama. Paytam Tayta Dios kaynata nin:

²Ñoqam ñawpaqnikita risaq, alto orqokunatam pampayachisaq, broncemanta punkukunatam ñutupasaq, fierromanta cerrojokunatam kuchusaq.

³Pakasqa qori-qollqekunatam qosqayki, Israelpa Tayta Diosnin kasqayta yachanaykipaq; pakaspa waqaychasqa kaqkunatam qosqayki, sutikimanta qayaqniki kasqayta yachanaykipaq.

⁴Akllakusqay serviqniy Jacobraykum, Israel llaqtayraykum, sutikimanta qayayki. Mana reqsiwachkaptikipas ancha reqsisqa sutitam churayki.

⁵Ñoqam Tayta Diosqa kani, ñoqamanta sapaq Diosqa manam kanchu. Mana reqsiwachkaptikipas ñoqam kallpanchasqayki.

⁶Chaynapi llapallanku kay allpa pachapi ñoqalla Dios kasqayta yachanankupaq, manam hukqa kanchu, ñoqallam Tayta Diosqa kani.

⁷Achkiytapas tutayaytapas ñoqallam paqarichini, hawkayaytapas sasachakuytapas ñoqallam rikurichini, ñoqa Tayta Diosmi tukuy chaykunata ruwani.

⁸Tayta Diosyá allin ruwayta hanaq pachamanta chayachimuchun, allin ruwaytayá sullata hinaraq hanaq pachamanta uraykachimuchun, puyukunamantayá parata hina chayachimuchun, allin ruwayá kay pachapi kachun, Tayta Diosyá salvacionta chayachimuchun.

⁹Huk allpa mankaqa, manam ruwaqninta kutipanmanchu. Mituqa manam manka ruwaqta ninmanchu: “¿Imatataq ñoqata ruwawachkanki?” nispaqa. Allpa mankaqa manam ruwaqninta ninmanchu: “Qamqa manam llamkayta yachankichu”, nispaqa.

¹⁰¡Ay! Imaynaraq kanqa taytanta qaqchaspan “imapaqtaq churyawarqanki”, niq runaqa ¡Ay! Imaynaraq kanqa imapaqtaq wachawarqanki, nispa mamanta kamiq runaqa.

¹¹Israelta unanchaq Chuya Tayta Diosmi kaynata nin: Hamuq punchawkunamanta tapuykuwaychik, churiykunamanta cuentata mañaykuwaychik, imaynam ruwasqaymanta cuentata mañaykuwaychik.

¹²Kay pachatapas runankunatapas ñoqam unancharqani, atiyniywanmi hanaq pachatapas mastarirqani, chaskakunapas rikurinankupaqmi kamachirqani.

¹³Rey Cirotam allinta ruwananpaq hatarichini, ñanninkunatam ñoqa allichapusaq; Jerusalén llaqtaytam musoqmanta hatarichinqa, presochasqa runaykunatam kacharinqa, mana imallapaqmi chaykunata ruwanqa. Ñoqa Tukuy Atiyniyuq Tayta Diosmi chaynata nini.

¹⁴Tayta Diosmi kaynata nin: Egipto allpapi qespiq kawsaykunapas, Etiopía nacionpa kapuqninkunapas, Sabá llaqtayuq hatunkaray runakunapas, qampañam kanqaku. Qepaykitam cadenasqa rinqaku, ñawpaqnikipim qonqorakuspanku mañakusunki: “Cheqaptapunipas Diosmi qanwan kachkan, paymanta sapaq Diosqa manam kanchu”, nispanku.

¹⁵Cheqaptapunipas qamqa mana rikuna Diosmi kanki, qamqa Israel llaqtapa salvaqnin Diosmi kanki.

¹⁶Idolokuna ruwaqkunaqa llapallankum hatun penqaypi tarikunqaku, uchuychaspa penqayman churasqam kanqaku.

¹⁷Tayta Diosmi ichaqa Israel llaqtanta wiñaypaq salvanqa, manañam penqaypaqñachu kankichik, nitaqmi pipas usuchisunkichikñachu.

¹⁸Hanaq pacha unanchaqmi, kay pachata ruwaspa takyachiqmi, runakunata chaypi yachananpaq unanchaq Tayta Diosmi kaynata nin: Ñoqallam Diosqa kani, manam hukqa kanchu, nispa.

¹⁹Ñoqaqa manam pakasqallapichu rimarqani, nitaqmi kay pachapa tutayay sitionkunapichu rimarqani; Israelpa mirayninkunataqa manam nirqanichu: “Yanqapaqñam maskawankichik”, nispaqa. Ñoqa Tayta Diosqa cheqap kaqtam rimani, ñoqaqa allin kawsakuyllamantam willakuni.

²⁰Nacionkunamanta lluptiqkuna huñunakuspa asuykamuwaychik. Kullumanta idolokunata llaqllaruspa apaykachaqkunaqa mana serniyuq runakunam, mana salvay atiq idolokunata mañakuqkunaqa mana yuyayniyuq runakunam.

²¹Rimariychik hinaspa pruebakunata apamuychik, kikikichikpura tapunakuychik: ¿Pitaq ñawpaqmantaraq kaykunamanta rimarqa? ¿Manachum ñoqa Tayta Dios chaykunataqa willakurqani? Ñoqamanta sapaq Diosqa manam kanchu, ñoqa hina allin ruwaqqa manam kanchu, ñoqamanta hukqa manam pipas salvanchu.

²²Tukuy hinastinpi yachaqkuna ñoqaman hamuwaychik, ñoqam lliw runakuna salvaq Diosqa kani, manam sapaq Diosqa kanchu.

²³Kikiyraykum juraspay cheqap kaqta rimarqani, cumplikunanpaq kaqtam rimarqani: “Ñawpaqniypim llapallan runakuna qonqorakunqaku, sutiypim paykunaqa juranqaku”.

²⁴Ñoqamantam ninqaku: “Cheqaptapunipas Tayta Diosllapim tarikun munaychakuypas kallpanchakuypas”, nispanku. Llapallan cheqniqniy runakunam ñoqaman hamunqaku, hinaspam penqaypi tarikunqaku.

²⁵Israelpa mirayninkunaqa ñoqaraykum mana huchayuqpaqña chaskisqa kanqaku, ñoqa Tayta Diosraykum alabakunqaku.